Al Balhe de la Baglina

Camelos no Praino i lheinha de Santo Antonho

2012-01-06T19:38:00.000Z

Ajuntában-se no meio l lhugar manhana cedo. Uns traien calagouças, outros maromas, angrideiras, i outros até troçadores nun fura pori aparecer dalgun trampo más fuorte pedir dientes afilados an beç de machadas, por bien grandes i pesadas que fúran. Era assi todos los anhos, nebasse ou fazisse sol, cun cenceinho ou merujeiro i aquel anho tamien assi se cumprie la tradiçon. Serien por ende uns trinta, solo los que yá habien pagado l bino, fuora la garotada que tamien iba para ajuntar menudas i arrastrar galhas até los carros a cargar. Al final de la jornada poderien cuntar cun bino i antremoços, cun suorte cada un roubarie tabafeia ou chouriça para fazer la rambóia serano adrento. Los mardomos botórun senténcia:

- Ei rapaziada! Hoije bamos pula lheinha para Adil Cunceilho i los cepos serán l que sobra de l castanheiro de Tiu Sabastian, l que se secou na carreira de los nuobe. Ála! a camino que la carga ye acerca i l santo nun puode apanhar friu!

Los dous carros, a las bezes más cunsoante las personas de l juntouro, eran puxados pula mocidade: dous a sigurar la cabeznalha i los outros, aparelhados por cuorpo ou eidade, fazien fuorça an stadulhos fuortes que donde an donde eran atados a la maroma que salie de la cabielha, cual sobeio capaç de acorrear ua buona meia dúzia de juntas. Cada un aguardaba l die cumo se dun eisame de abaluaçon de tempra se tratara porque amostrar la fuorça, l génio i la manha era ua maneira de marcar campo i proua no meio de tanto macho.

An menos de dues horas yá habien tornado al terreiro no meio l lhugar cun la carga pronta, los carros quedarien para çcargar apuis de almuorço porque l báfio a pata i botielho salie por chupones i telhados adonde las teilhas se arralában anriba de la chilha, más folhin que madeira afumada i l stómado apuis de tanto rodion yá se iba colando a las costielhas. Habie que aporbeitar porque outro botielho solo l die de la fiesta! De tarde trairien los cepos i a la hora de las trindades l lhume tenerie que quedar pronto a chiçcar.

Era no die de reis, un die que nien era santo nien lomeado, mas que traie agarrada la tradiçon de los reis magos: dar lhembráncias i outras comenéncias, modernices para se gastar l que un nun ten. Cul tiempo, i cumo inda hoije se fai an Spanha, passou a ser neste die la oucasion de dar las prepinas i dalgua anzona para ninos, mercada an Mobeiros ou na feira l Naso.

Apuis l almuorço i de haber passado la manha na jóldia cula mocidade a lheinha, batírun a la puorta. Siléncio!
- Antrai! quien ye? Preguntou mie mai. Nada!
- Bai a ber quien ye rapaç, anquanto you acabo de amanhar l lhume nun baia pori dalgua persona benir cun friu.

Mal botei l pie fuora de la cozina i ambiquei l mirar acuontra la puorta na outra punta de l corredor, bi un selumbron na buraca l gato, abri la puorta debagar, mirei pa riba a ber se bie dalgua persona, mas nada, solo bi l que habien deixado na soleira: un cabalhico malhado, de lhata, anriba de quatro ruodras negras. Bó!! i l que serie aquilho? Quien lo haberia deixado?!?! lhougo a mi que nunca habie tebido cousa tan delei para morar. Anton agora los Reis tamien andában porqui por este fin de mundo que quaije nien camino de carros tenie para poder antrar i salir deilhi? Botei-le la mano debagar, meio cun miedo que se scachasse, mirei-lo de lhado, de frente i por trás, peguei na cordica agarrada al cachaço i lhebei-lo de rede a rodar no cimento de l suolo pa la loija nistante andonada na squina de l scanho. Benie l cabalho, i l rei? pensei, esse se calha habie quedado perdido cun sou camelo no termo que arrodeaba l lhugar porque esse bicho más aquestumado a la arena por cierto quedou mareado nalgua caleija por bias de tanta piedra, anterrado no lhodaçal ou cun miedo de resbalar no carambelo al absedo, trés buonas rezones para afastar essa becheza de l Praino, adonde nunca los bi, ou será que andan çfraçados cumo no antruido?

Buonas nuites

i Reis an paç

No alto las eiras

2012-01-01T18:10:00.000Z

Un die destes andaba por Sant'Amaro quando me dei fé de haber bisto un retrato dua fiesta de l berano sacada más ou menos daquel mesmo sítio. Anton, apuntei l ferragacho i ... chlack yá está!
L resultado ye l que podeis ber: ua no berano i outra nou eimbierno, ou d'alrobés!

Buonas tardes i

que l anho que hpije ampeça, a todos benga de feiçon.

Feliç Natal

2011-12-24T16:34:00.002Z

Los Quatro Eibangeilhos

2011-11-21T13:50:00.003Z

Yá no Sábado que ben se dará cuonta desta apresentaçon.

Camino...

2011-11-16T04:10:00.001Z

Ls Filadeiros

2011-11-05T23:29:00.001Z

Ls Filadeiros

«De l lhino i lhana, ouro mana»,

Dezimos los mirandeses

Cunforme las manos por onde anda

I los gustos de los fragueses.

Eilhas filaban l filo

I tecien-lo nos telares,

Daba pa l nuosso bestido

I para toalhas d’altares.

Ate rendas i lhenços

Se fazien eiqui ne passado

Se bordaba i fazien cuordas

I roupa d’ambierno i de brano.

Mas de l belhon al malhadeiro

Ate chegar al alfaiate

Quanto trabalho i denheiro

Mos custaba cada fato.

Tamien la seda antigamente

Por nuossos abos cultibada

Filada pula nuossa gente

I bendien la que sobraba.

Antonho Luis Fernandes - Tiu Andreia

Estes bersos fúrun publicados l die dieç de l passado més de San Juan, an Bregácia, por oucasion de la apresentaçon de l libro: A TERRA DE DUAS LÍNGUAS - antologia de autores transmontanos.

Quadrados de Riba

2011-10-12T12:14:00.001+01:00

Morában no cabanhal que hoije ye de tie Beatriç. Al lhado de la puorta de casa era la loija de los burros que Tiu Juan guiaba.
Na antrada de berano era el l guardian de las cereijas na cereijeira de Tiu Jin (l genro) i nós assi que lo pescábamos de l alto - cumo l tordo d'atalaia - escundiemos-mos atrás de l galho más gordo i quedábamos calhados até el passar ... mas las cereijas éran tantas que dában para nós i pa la paixarada.

Nota: apuis duns tiempo sien poner nada, mesmo que nun seia mui a menudo, a ber se la jorna a que mos apreponímos (poner todas las famílias eiqui) toma suco outra beç.

Camino de la Cándena

2011-07-19T12:52:00.004+01:00

Eiqui se deixan dalguas falas de las cuontas de l Lhibro "Camino de la Cándena" que quedará pronto no amprecípio de l més que ben. Programado para salir a siete d'Agosto, por rezones de fuorça maior nun se puode afiançar data cierta. L tiempo ditará la hora i l die para que se puoda agradecer de biba boç a todas las personas de Cicuiro, antre outras, porque sien eilhas este lhibro nun serie possible.

L tiempo

“– Que nada! Mira cumo son las personas, que a las bezes por un pelo de lhombo de cochino quédan tan alborotadas que son capazes de poner meio mundo acontra l outro. I sabes? l pior ye botar la purmeira lapada.”

L sacristan i las rezas

“You iba mirando para baixo, mas cumo era pequerrico quaije nun bie nada, solo bie los da mie eidade na purmeira fila, apuis l Regidor i los homes más respeitados de l pobo. De las ties (algũas) solo oubie “Santa Maria… …Santa Maria… Amén.”

Manolielho

“ – Alto, dixo un deilhes, quetico ende i pouca regubiura se nó quedas no sítio cun esta spada atrabessada nas tripas que nien merda se te aporbeita. L home, seco, mediano, sfarrapado, dous uolhos a relhumbrar antre l pelo, la barba de muitos dies, queixadas angurriadas de fame, nien se bulhiu, mirou sien miedo l que parecie l xefe, botou las manos a los soldados cumo quien se ouferece para ser preso – nó que, cumo diç l dito dezideiro, trés a un méten-le ũa palha no culo – soltou nũa lhéngua meio asparcida a la de los soldados:
– Non me fáigades mal porque you bengo an bien. Non sou einemigo, por fabor non me mateis.
I botaba las manos al cielo mirando los soldados.”

Lusbel

“Cada garotico scundie-se atrás de sue mai ou adonde podie, siempre que Lusbel salie de l einfierno. Tembrában cumo las fuolhas de l álamo, paredes meias a la puonte de baixo. Ui que miedo… era pior do que salir a las nuites sien pagar l bino i dar-se de caras cun Tiu Bicente!”

La cabrada

“ Naqueilha manhana, Afonso sacou cedo la cabrada i zde l lhugar anté l lhombo de la sierra (scassos cinco cientos de metros) los animales nun lhebórun grandes rodiones no sou pacer adreitos al balhe de los Guenhotes, adonde l outonho de fin de márcio ampeçaba a cumponer barrigas prenhadas de frius d’eimbierno cun pouca palha, ningun grano i muita urze i carqueija.“

Las Maias

“ Meio a contra gusto, alhá Cepa fui resgalgando de galho na galho até l suolo sien abanar muito porque, a cada rodion más fuorte, le podie cair no lhombo ou na cabeça ũa manada de pelhiços amadurados prontos a soltar-se de l castanheiro. I cumo duolien, á mai á mai, parecien sobelas cun ganas de chegar al sabugo.“

La Mona Negra

“ Anton, solo l relhuzir de las bistas cobraba l mortiço i l negro de la cozina, forrada cun meia dúzia de baras de fumeiro, al menos haberie botielho no Natal i nos Reis, ũa scuridon lharga cumo nuite d’eimbierno adonde antraba pul campo de las teilhas cabalho, que serbien de chupon, ũa racica de lhuna clareada de gelada.“

La Spalda

“Al pie de l celheiro era la nuossa paraige, mesmo eilhi al pie de la scuola de casas berdes ancarreiradas de beta, un campo de la bola i ũa noeira. Tanta gana de bibir na cidade i inda quedábamos a la puorta!”

Antrada

"De las cuontas ressáltan berdadeiras figuras típicas de Cicuiro, antre eilhas l scritor de quelóquios tiu Antonho Delgado, que lhebou Gil Vicente al praino mirandés, ne l sou modo special de ber, cun l quelóquio Todo o Mundo e Ninguém. Ls porblemas de l die a die, las guerras de frunteira, que solo hai mui pouco tiempo deixórun de aflegir la giente mirandesa, las lhuitas antre aldés, berdadeiro terreno assinalado por machos que a las bezes se querien salir de sous lhemites, l abade cumo redadeiro juiç, l cuntrabado, las fiestas, la mala suorte de ls ouportunistas de todas las classes, todo esso i muito mais ye tratado nestas cuontas de l Camino de la Cándena i de muitos outros caminos."

Amadeu Ferreira
Diretor de la Coleçon An Mirandés

A Salto

2011-06-20T13:49:00.000+01:00

Habie salido de Pertual més i meio antes. Cun dezasseis anhos era la purmeira beç que se bie fuora de los alredores de la Ribeira. A fin de tarde al dar ua buolta más loinge fuora de “La Palomba” – essa penson adonde habie ido a parar cun outros cumpanheiros de biaije i de jóldia tantas tardes eilhi nos cerrados de las fraldas de l Sierro – quando todo ampeçou a quedar anubrinado de las eideias i sien sentido. Solico, perdido nua lhéngua que nun sabie falar i nua tierra que fazie cien Mirandas, ua lhágrima escorriu cara abaixo para se esborraçar antre los nuolos de la mano a tembrar de friu. Nun habie andado muito mas perdiu l tino de l sítio de adonde habie salido. I agora? Pensaba cun sous botones, solo cula roupica de l cuorpo, cheno de fame i de grima, sien cuincer a naide l que serie del? I lhougo apuis de tanto trabalhico para eilhi chegar. Los outros de brebe achórun patron, mas a Antonho cumo era de menor eidade naide lo daba, tenerie que aguardar pula outerizaçon que sou pai le mandarie de Pertual.

Yá habie gastado los cien francos que lhebou pa la biaige, más cinquenta que Tiu Carpinteiro l amprestou. L sutento era chouriça cun pan al desaiuno, chouriça cun pan al almuorço i chouriça cun pan a la cena que l denheiro nun daba para más. No amprecípio, quando chegou a la Fráncia inda quemie na penson de l eitaliano adonde siempre demudaba l quemer. Dezie el quando l perguntában l que era l almuorço, l jantar ou la cena:

- Arroz i grão de bico … i chouriça! I tamén há fígado i coração.

L más barato, mas l pior fui quando se l acabou l denheiro. Por bergonha nun dixo nada a naide, saliu sien cenar para nun anaugar a ber los outros a quemer: perdiu-se.

Altas horas de la nuite passa un tiu eilhi i bei aquel garotico aculado antre ua puorta i las escaleiras, míran un pal outro, ganhou coraige i perguntou a querer arremedar l francés adonde quedaba la ruga de La Funténe. L home lhougo l dixo an spanhol que era eilhi abaixo, ua ruga pegada a la que estaba, tantos Antonhos aquel home nun berie por aqueilhas rugas!

No camino a la penson adonde outros çcansában de l duro die de los “chantiers” pensou an quantos más trabalhos tenerie que passar para se dzampenhar de los cuontos de reis que los passadores quebrórun a sou pai pula passaige de l rapaç. I anquanto la outerizaçon nun benie, más ua çpesa, suorte que Apolino le amprestou outros cinquenta francos para que nun se morrisse de fame, yá debie cien francos i de trabalho solo l cheiro. Durante l die, tanta hora sien poder fazer nada, quedaba deitado a dzanobelhar las abinturas que passou zde por que el i Narciso habien passado la Raia até Alcanhiças. Eilhi apanhórun un táxe para se meter no cambóio an Medina de l Campo, cousa yá amanhada cun los passadores. A la hora marcada alhá estában eilhes cun dous belhetes até acerca de los Perinéus. Narciso, más bielho i más espabilado, la eidade tamien l daba outra sigurança, botou sentença:

- Mira! Bamos a mercar uns jornales, ponemos-mos a lé-los no cambóio para que naide mos anquemode i assi passamos por spanholes.

Se bien lo pensórun, melhor lo fazírun: jornal abierto delantre de cada un i calhados que nien ratos. An Balhadolide antrórun dues “chicas” que lhougo se fúrun a poner delantre de los abintureiros quando ampeça ua deilhas:

- Galleguito, galleguito, entonces que dice el periodico?

I soltórun un fu fu fu fu ambuolto de fuorte risada quando Antonho, ancantadico culas cheirosas i anfitadas rapazas más do que cun las amboras de l jornal ye que se dou cuonta que lo habie abierto de cabeça abaixo. Narciso segredaba antre dientes:

- Tu calha-te i nun fales nada que se nó inda mos çcúbren.

Antes de chegar a Paléncia i al ramal que zbiaba adreitos a Lhion, ua deilhas inda lo dzafiou para l fazer cumpanha para Astúrias, mas el fizo-se mudo. Antolhar si se l antolhou i lhougo ua moça tan guapa! Eilhi apanhórun outro cambóio para Pamplona. A las solas oubiu-las buonas de Narciso:

- Mira – falou acenhando l dedo a apuntar – deiqui para delantre nien más ua léria ou lhiebas dues óstias que te rebolco. Tu nun bés que se mos çcúbren, la guarda cebil prende-mos i tenemos que buolber al para trás, sou chapuço.

I cuntinou a ler l jornal, que habie mercado an Medina de l Campo, até la estaçon de Pamplona. Nun era por anteresse de las amboras de l paiç de Franco que l espion de niales de picanço adaptado al nuobo mundo quedaba minutos anterminables nas fuolhas de eiquenomie, mas solo por oubrigaçon i miedo de Narciso. De Pamplona fúrun lhebados por un tal de Manecas de Miranda a ua casa adonde tamien stában más de l lhugar: Manuol Pedro; Chico Maleitas; Marie Cantina; Floréncia Miguela … tantos cuincidos i sien saber uns de los outros ye que era admiraçon! Carai que los passadores tenien las cousas bien amanhadas, pensou. Eilhi quedórun de espera i a la buona bida, nada más que quemer, dormir i cuntar lhonas. Fui al pensar nessa estada que no meio de l çcunsuolo de se ber solo inda soltou ua risica quando se acordou de la figura que habie feito quando eilhi biu ua retrete pula purmeira beç.

Cheno de cagaleira, saliu de l meio de los outros para ber se çcubrie un sítio para dar de cuorpo nun quarto que le chamában retrete, luxos a más para quien solo habie bido loijas de cria i touças para fazer las necidades. Habie ua concha grande a la parde , alta cumo un sintalho, branca cun buraco ne l meio, mas de tan branca nun poderie ser eilhi porque por aqueilha lhimpeza i albura toda al melhor era para un se lhabar, nunca para botar l rosco! De tan apertado que estaba mirou al redor i biu un bacio, la salbaçon de Antonho! era más pequerrico do que l que el tenie ambaixo la cama, mas aperto era aperto i naqueilha hora yá nun habie escuolhas. Eilhi mesmo se amugatou, nalgas más fuora que drento, ora gemento ora resfolgando de alíbio pensou: trés sigundos i yá está! Respirou fondo espreitando pula frincha de la puorta que habie quedado meio abierta, sentiu benir la ama de la casa tamien adreitos al retrete yá de saia meio alhebantada quando parou de estaca pul espanto i pula risada que mesmo eilhi botou al ber aquel purparo.

- Nó se hace ende – falou la espanhola – es en el báter! je je je je je …

Nua corrida a la sala adonde todo mundo aguardaba la hora de dar l salto para tierras de Fráncia – yá habie faltado más – a todos cuntou l que habie bido. Antonho passou a estar nas bocas daqueilha giente toda, ui que bergonha passou por bias de tanta eignoráncia, mas la maior admiraçon era cumo ye que el cunseguiu pousar l puio an tan pequeinho campo! Alhá lo ambolcou no báter aquel, dou ua anxalaugadela al bacio de los ninos de la ama de la casa i tornou al pie de los outros. Mal antrou todos lo mirórun, se tubisse un buraco eilhi por el se atirarie, cumo nun habie tubo que aguantar, custou mas aguantou las falas de todos pula eignoráncia que amostraba, solo que fidalgos eilhi nun habie pul que respundiu botando ua risica:

- Á bós falais assi porque nunca antrei nas buossas casas se nó yá me ansinariedes cumo era la retrete essa.

Remédio santo.Todo mundo se calhou. Quanto nun balie la lhibardade de l Praino adonde nun habie necidade de guardar la merda, solo que essa lhibardade nun atamaba las fomes grandes cumo dies de segada.

Al fin de cinco dies metidos naqueilha casa sien poder salir nien quaije ber l sol aparécen, al scurecer, dous homes a falar ua lhéngua que naide cumprendie – debien de ser bascos porque l castelhano el si lo cumprendie bien – pa los guiar até outro çtino.

Andubírun meia dúzia de quilontros até chegar a uns palheiros, loijas cun bacas i cabalhos. Eilhi quedórun un rato mas acerca de las dues de la manhana dous homes, un alantre i outro atrás, pegórun neilhes a atrabessar cerrados i más cerrados cun auga que an dalguns sítios chegaba até los zinolhos, siempre a chubir nuite fuora até un palheiro cheno de feno puosto no meio de l nada todo escuro. Parece que inda sentie l malo cheiro que muitos outros habien deixado, tanto fertume que nien un se podie deitar no feno sien ampalpar brandura.

Yá manhana cedo eilhi le lhebórun para quemer uas batatas cun chicha mui pegachosa de sabor que nunca habien sentido. Diç Antonho:

- Esta chicha ye de burro. You nun la quiero, solo como las batatas i nien sei se las maçco. Ten pelos de burro ruço, mira á Narciso.

- Burro sós tu se nun la comes, tu nun bés que fui todo cozido junto. Queda cun fame se quieres que a mi pouco se me amporta.

Outro remédio nun tubo se nó atamar la fame cun batatas i chicha de burro ou sien ser de burro, l amportante era quedar farto pus nun sabie quando buolberie a ferrar l diente.

A meia manhana aparécen dous carros pa los lhebar más alhá: un, l de lantre, iba solo cul chofér, ne l outro siete ou uito, Antonho yá nun cabie, i agora? Un deilhes nun stubo cun meias modas:

- Benga! deitado en el cofre! listo que no hay tiempo a perder.

Cumo el balanciasse an se meter no escuro de la mala l carro, bai l spanhol, pon ua mano nas calças de pana, outra na gola de la jaqueta i pumba: se nun bás dua maneira bás doutra, ála! fui mesmo de chafurgo. L carro delantre sien naide debie ser seinha ou batedor se nó nun iba assi, l outro cheno i cun peso nas baras, ou cumo quien diç na mala de trás. Aquilho staba escuro cumo l culo de l lhobo, nien racica de lhuç antraba, l carro ora chubie ora abaixaba siempre a las regubiuras cun Antonho a rebolcos dun lhado pal outro, pumba, trumm, más ua cabeçada na lhata ou um puntapie na tampa de la mala. Tan agoniado quedou que más l apetecie morrer. Los cumpanheiros de biaije inda falórun:

- Cun tanto trumpaço que lhieba, aquel bai a salir bien escalabaçado, cuitadico, ou muorto! sabe-se alhá.

Quando l chofér abriu l cofre i sacou a Antonho deilhi todo mundo quedou assustado quando lo bírun chimpar-se redondo no suolo, más muorto que bibo, a cheirar a perfume de tripa i miedo de tantos dies de biaije loinge de la Ribeira. Acordou deitado cun muita cara al redor del, açarapantado de la auga frie que sentiu na tiesta, branco cumo la cera meio a rebirar los uolhos sien saber se estaba bibo ou muorto, an Fráncia, na Spanha ou an Pertual. Bie todo a remolinar, inda fizo fuorça para se poner de pie mas solo passado un cacho cul cuorpo maçado i delorido de todo tornou a agarrar l sano sentido que lo fizo eilhi chegar.

Al loinge bien-se casas na punta de l carreironico que desambocaba a la puorta de “La Palomba”, la purmeira penson an tierras de Bordéus.

Apuis de se acordar de tanta canseira nun poderie pensar que un reles papelico, ou la falta del, lo oubrigasse a tornar al para trás. Aposte que nun demorarie …

Poste PT

2011-05-21T11:59:00.001+01:00

Ou cumo quien diç: quien zlinda la meada?!?!
.
Buonas tardes
i buonas cumbersas ... al telfone ... se dir

L Tiempo

2011-05-09T00:34:00.002+01:00

- Dius mos dé buonas tardes tiu Eimílio, anton que tal las tenemos porqui?
- Buonas tardes mos dé Dius, Aleixo. Mira, todo bai indo cumo bés. I tu perdiste-te por acá hoije.
- Sí. Ten que ser, de beç an quando hai que que benir a cargar la alma cun estes aires de la Raia, sabeis cumo ye, nas cidades cumo Porto i Lisboua ye siempre un fuge fuge que nien tiempo hai para resfolgar quanto más para dar dues lérias.
- La bida buolbiu-se dessa maneira. Tu nun bés por ende todo a los muntones a bibir an casas que más parecen gaiolas i quando abre ua racica de sol, ála todo mundo de papo al sol esbarrigados na arena cumo lhagartos. Hai quien guste ou nun tenga más que fazer mas para mi nun dába.
- Bós inda andebistes por fuora nun fui? Muito tiempo?
- Inda andei! Bá se andei! Dieç anhos na Fráncia i uito no Canadá. Inda corri uas lhéuguas, ó se corri.
- Fuora se calha dalgua salida para África ou pa la Índia qundo andubistes na tropa …
- Nó! Dessa salbei-me, nien a un sítio nien a outro. Deiqui inda fúrun uns quantos pa la Índia, Eidemundo fui un deilhes, tou abó acho que tamien …
- Esso siempre lo oubi cuntar a mie mai.
- Mas la de ida de tou abó quien la cuntaba bien era Tiu Luissito. Hás de ber las buoltas que la bida dá bida. Se calha tu nun sabes la berdade toda mas esta nun ye diç que, aquilho houbo justícia i todo! Á caralcho que iba dando pal tuorto cula mocidade de Trancas …
- ?!?!
- Sí nun fagas essa cara de admiraçon – cuntinou Tiu Eimílio meio cun risa de lafrau – pus fui bien berdadinha. Tan cierto cumo estarmos eiqui los dous.
- Mas aton l que se passou de tan malo? Para bós ponerdes essa cara …
- Parece que habie acá ua moça que tenie dous ou trés antolhados. Un deilhes era Tiu Luissito, outro era un tal de Peguço de Trancas, eilhes chamában-se por alcunhas … i anton parece que un die alhá para Baldeglina fazírun ua espera a esse tal Peguço que runssiaba la rapaza no cerrado que agora ye de Rodrigo. I tu sabes cumo era naquel tiempo: l que se arrimasse a ua moça doutro lhugar quando se çcuidába fazien-le lhougo pagar l bino, ou anton era xotado por adonde quiera que andubísse no termo alheno i nun era cun bardeiro de barcegos! Se calha cun dalgun estadulho costielhas abaixo.
- Málas mocidades carai …
- Era an todo l lhado, nun era solo acá. Mas anton cumo iba cuntando, nesse die l Peguço lhebou ua lúrtia tan grande tan grande que tubírun que lo lhebar para casa nun carro de bacas.
- Anton esse era l Tiu Apaleado …
- Apaleado apuis daquel die que por bias dessa zaragata, até dezien que nunca más tornou a ser home, las cousas quedórun mui feias i fries, tanto que durante muitos anhos las mocidades nun se chaldórun i siempre que dában de caras ua cun outra aquilho era ber l que más peito fazie. Tanto que los de Trancas, para ir a moler al Molino la Raia porque nun habie outro tan acerca deilhes, tenien que passar pul pie de la Cándena i apuis baixar al Monte senó éran apedreados i tirában-le los sacos de grano. Diç que un die fúrun a lapadas a eilhes até la Touça l Cuco. Era giente mui ruda para se poner a fazer essas málas figuras.
- Anton i miu abó i Tiu Luissito?
- A esses la justícia deportou-los: un pa la Argentina i tou abó pa la Índia. Mas cumo an todo, hai males que bénen por bien. Daprandiu a ler alhá na bida melitar i apuis metiu-se na Guarda. Fui la sue suorte porque no tiempo de la guerra espanhola era de los poucos que tenie seinhas para cunseguir dalgun xabon. I mira que tue abó inda lo trocou a mius pais por meia dúzia de peles de canhona.
- Inda bien que assi fui, el tamien nun habie de ser quien se pinta, al menos a julgar pul retrato que tengo del an nuobo. Mas la mocidade deiqui nunca fui muito de se meter na guerras ora nó?
- Buono … tamien nun se poderien meter muito que la giente era pouca, mas ye cumo diç la cuonta: an cada polheiro manda l galho que alhá está. Fuora tenerien que se aguantar i baixar la crista cumo los outros an lhugar alheno mas eiqui nun era qualquiera un que las fazie. A las bezes si querien alhebantar crista, mormente quando andában a los muntones cumo los de Cruç Branca que inda fazírun por ende uas perradas quando soltórun burros dalguas loijas i los prendírun todos a los uolmos de l meio l lhugar.
- Bó?! mas essas nun fázen mal a naide i até dan para rir. Se nun passássen dende …
- Tu conheces a Tiu Albino Mouco de Cruç Branca? Yá bai antradote mas olha que inda debe dar fé de l die que tamien se quijo armar an fuorte solo que se çqueciu que andaban el i outro solicos porqui i an menos de nada yá estaba de cabeça abaixo agarrado nos pies por Çarafin Galho pronto a deixá-lo cair de narizes no ribeiro. Essa serbiu-le de liçon, anda que nunca más se armou an fuorte.
- Mas cun Cruç Branca nunca houbo grandes atrequidéncias de mocidades ora nó?
- Nó! … mas mira que un die la cuonta quaije que estubo pior que cun Trancas. Por pouco nun iba habendo muortes. I muitas!
- Fui la cuonta de l ouxeio?
- Essa toda! Mas aquilho metie homes casados i todo. Era you garoto i bien lo oubi cuntar a miu pai i a Tiu Floreano.
- Casados tamien?! Anton la zanga si era braba.
- Que nada! Mira cumo son las personas que a las bezes por un pelo de lhombo de cochino quédan tan alborotadas que son capazes de poner meio mundo acuontra l outro. I sabes? l pior ye botar la purmeira lapada.
- …
- Todo ampeçou nun ouxeio que los de acá i los de Cruç Branca fazírun. Peç que eilhi pa la Bicha matórun ua raposa. Tiu Juquin Polreta dezie que era el que la habie matado, Tiu Aperreado tamien dezie que habie sido el.
- Anton … mas esses dous éran de Bal de Palombo! Un deilhes inda bibe i que seia por muitos anhos.
- Á! Sí, mas Polreta yá se habie casado an Cruç Branca i you nun sei las buoltas que aquilho dou para todos quedáren a mal.
- Por causas dua raposa …
- L pior ye que los de Cruç Branca quejírun dzafiar este lhugarico, assi a modos de quien ten fuorça i todo puode. Dezien que íba a benir la mocidade toda de bombo i caixa a la fiesta de Santo Anton.
- Mas esso nun tenie mal ningún! Maior se fazie la fiesta!
- Naquel tiempo esse era la maior oufensa que se podie fazer: ir de bombo i caixa era cumo que a fazer caçoada de todo mundo, nun ye cumo hoije que essas tradiçones yá naide las sigue … Naqueilha nuite you solo oubi a miu pai dezir para que naide salisse de casa sien el chegar. Tenien anton, casados i solteiros naqueilhas cortinas de la Moraige i de l Rigueirino, eilhi adonde ben a dar l camino de la Canhada, un cerco armado cun todas las espingardas que habie no lhugar, dalguas, la maior parte deilhas de cargar pula boca prontas a chacinar quien quiera que eilhi antrasse na caleija chena de lhodo i de pisacadas de la cria.
- Tenien la mandrángula bien armada, tenien …
- L que eilhi entrasse lhebaba chombo.
- Mas pul que sei todo quedou an bien …
- Nun haber ua zgrácia, debe-se a Tiu Maior i a Tiu Caralchas que éran de Cruç Branca mas que se habien casado acá. Mal se ampeçórun a oubir bozes, l bombo i la caixa a tocar eilhi para Bal de Palombino, esses dous agarrórun i fúrun a la cruç de Sant’Amaro a esperar pula mocidade que benie alberotada de todo cumo se fusse ama de l mundo. Sabes que las personas assi a rodiones cumo un ganado perden até la cuncéncia i quedan cumo animales. Fui a la cruç que abisórun la mocidade i diç Tiu Maior: “rapaziada! … bós antrar antrareis, mas mirai que se l fazirdes bai a haber muortes! Apuis nun dígades que naide bos abisou” Dalguns sí querien seguir cula animalada aqueilha, mas apuis alhá la cousa se amanhou a las buonas muito pula faramalha de Tiu Caralchasque tanto jeito tenie para lhebar la giente.
- Antes assi que naide se tenga ferido.
- Diç que apuis inda benírun, beilórun i animórun la fiesta … mas cumo la espera estaba armada, ua buona meia dúzia tenie quedado estiraçado a la antrada de l lhugar.
- Mirai quien dirie que ua guerra se fai por tan pouco! … Buono, bou-me andando a ber se inda tengo tiempo … – i mira pal reloijo – ui que deixei passar la hora! çculpai-me Tiu Eimílio pul tiempo que bos amboubei i que bos fize perder cun esta cumbersa …
- Á Aleixo! Çculpar de quei … tu nun bés que l tiempo dá-lo Dius de balde!

Tiempo de maçacucas

2011-04-27T23:56:00.000+01:00

Ampéçan a esgromar las bergontas de trampo, las queiruolas quelor de binho, carqueijas amarielhas, quegulhadas i chincharrelhizes a fazer nial: ye tiempo de maçacucas.

Buonas nuites
i primaberas chenas de berde

Quadrados - Tiu Ghá

2011-04-13T23:09:00.000+01:00

Morában adonde hoije ye la puorta de casa de Tie Maruxinha. Al lhado de la puorta habie un puial grande i la loija de los burros era adonde queda la casa de Tie Prudéncia.
Tiu Albino, seco de chicha, calças de pana, agarrado a sue guelhada, alhá iba guardando la pareilha de burros anquanto la salude l fui ajudando. De la família, an Cicuiro, resta la filha Prudéncia i an Manique l Padre Zé.
Suobre tie Einácia i Deolinda, hai ua passaige que por bien anhos que biba nunca la squecerei: un die, inda you nun andaba na scuola, estaba cun jóldia a la puorta de riba de Tiu Zé Bríximo, quando oubimos ua grande zaragata adreitos a la Senhora. Las bozes fúrun chubindo chubindo até que a la ramalhada de Tiu Juan Quadrado, Tie marie Furriela i Tie Einácia pegórun-se a la séria quando a páiginas tantas Deolinda, que andaba a chin de sue mai, soltou-se de l xaile i caiu de cuostas no meio l camino, dzamparada de todo no meio de l puolo i de los xeixos. A la chimpa que dou, nunca pensemos que quedasse an bien, chorou i chorou, mas ato cuntino l puxa greinhas i palabras "amerosas" parou. Anton, fui ber qual de las dues, mai i "einemiga" agarraba más dalgeiro la nina, cun miedo que algo malo l houbisse passado. Fui maior la preacupaçon dambas a dues cun la salude de Deolinda do que cun las rezones ou descumbersas que las fazírun esgrenhar.
Essa nun la sabies, á que nó Deolinda? mas cumo diç l dito dezideiro: al nino i al borracho pon Dius la mano ambaixo.

Buonas nuites
i peinetas siguras

2011-04-02T17:56:00.000+01:00

Sí le gustaba la pinga a tiu Antonho Prieto.
Seco de queixadas, la boca meio afunchacada, no queixo uns pelos rúcios ralos, la gorra de oureilhas resguardaba de l sol i de la gelada.
Bibie la bielha curralada antre la bielha casa de los Chilros i las cortinas de la Abadia.
Trés filhos: Tiu Júlio, hoije cun 91 anhos que de nuobo quedou xordo, nun tubo filhos, Tie Mariana, mai de Guimar i Ramiro, bibe a la Fuonte de Tie Rita i Tie Oulíbia na Bila.

Buonas tardes
i buona relba (bai sendo tiempo).

Prietos - Anhos 60

2011-03-21T22:11:00.000Z

De la squierda a la dreita: Tiu Manuel Paulos; Guiomar; Tie Oulíbia; Tiu Prieto, Tiu Júlio; Tie Mariana iTie Carmelina.

Al fundo la ramalhada de Tiu Xanola i los uolmos a la loija de Tiu Modarra, adonde hoije ye la casa de Tiu Purdéncia

Parabienes, cicuirano Alcides

2011-03-20T21:40:00.002Z

09/03/11
Cuncurso de Cuontas de Natal 2010 - Resultado

Cumo pormetido, eiqui stamos a dar amboras subre l cuncurso de Cuontas de Natal 2010, de que fumus nomeada(o)s cumo júri.
Ampecemos por ler cun atençon todas las 20 cuontas, abaluando l domínio de la lhéngua mirandesa, ne ls sous bários nibles, la sensiblidade de cada outor(a), l modo cumo agarraba l assunto i respeitou l tema aperpuosto, la riqueza lhenguística que demustrou i l lhado mais specialmente lhiterairo.
L júri quier-le dar ls parabienes a todos ls partecipantes, puis aparecírun a cuncurso cuontas mui bien screbidas, que dórun un amportante cuntributo pa la lhéngua i la lhiteratura mirandesas. Por essa rezon, l júri cuida que era amportante haber mais cuncursos destes i deixa essa requemendaçon a la admenistraçon de l blogue.
Dada la deficuldade an scolher ua sola cuonta, tubimos que andar por stadas, para mos aprossimarmos de l oujetibo. Assi, purmeiro scolhimos 10 cuontas. Apuis, dessas 10 scolhimos 3 cuontas. I destas trés, por fin, scolhimos ua sola deilhas. I la cuonta scolhida cumo ganhadora deste 1º cuncurso Cuontas de Natal 2010 fui
La Mona Negra, de Alcides Meirinhos
Queremos-le dar ls parabienes a Alcides i ancentibá-lo a que cuntine a screbir, puis muito l mirandés i todos nós tenemos a ganhar cun esse sou trabalho.

L júri,

Alberto Bautista,Alcina Pires,Amadeu Ferreira,Bina Cangueiro,Franscisco Domingues

(In blogue-Froles Mirandesas)

Prietos - Tiu Manuel Paulos

2011-03-17T22:37:00.000Z

Casado cun Tie Oulíbia Prieta, bibiu na Bila i la maior parte de ls deçandientes stá an Fráncia.
.
Buonas nuites
i buono serano

Manolo

2011-03-16T13:06:00.000Z

Nas cortinas de la Moraige

2011-02-17T17:26:00.000Z

Este retrato de finales meados de la década de sessenta de l séclo passsado, fui tirado nas cortinas de la Moraige an frente de la casa que hoije ye de Ramiro que tamien stá no retrato.

Dalgun de bós reconhece a Adriano? I a quien más?

Buonaas tardes

i buonas bistas

Pinafros

2011-02-11T23:53:00.001Z

Morában na casa al pie de las scaleiras de la huorta de la Fuonte, paredes meias cul curral de Tiu Prieto adonde más tarde Tiu Ninete fizo la casa nuoba.
Solo Américo, l pai Alípio i tie Lhuzie quedórum por Cicuiro. Esta última casou-se sigunda beç cun Tiu Cunha i los filhos deilha, criados eiqui, spargírun-se pul mundo: Américo na Suécia, Eisaltina no Brasil ...
i assi las squinas ban quedando cun pencas berdes a falta de quien las ruoba, las pise i las ralhe.
.
Buonas nuites
i buona stado pul mundo

Un retrato de scuola

2011-02-01T15:17:00.000Z

Tamien you beio la scuola dun rinconico arrimado a la Raia cul cruçfício spindurado d'ua brocha al lhado de l "Santo" de Santa Comba.

Ourrieta l Refustedo

2011-01-23T16:57:00.001Z

Hai uns dies que apareciu na anternete más un sítio screbido an mirandés de sou nome "Ourrieta l Refustedo". You mirei para alhá onte i porque andan (i inda bien) por ende personas que nun sáben guardar un segredo, tube que apalabrar la ambora yá que la Ourrieta essa promete un pacer ameroso, seia robido ou yerba berde. Pul que se bei hai alhá dous manantiales adonde merece la pena ir buendo. I l títalo? ... até al sapo l dá la risa.

.
Buonas tardes
i buonas lhonas

Perreras

2011-01-13T10:18:00.000Z

Serie por ende fin de Berano, tiempo de zgalhar a las bacas. T´res ou quatro boieiros habiemos ido adreitos a los Castros, Cabada i por ende. Un deilhes era Félç, fiel guardador de la spingarda de canhos suobrepuostos que sou armano Silbério habie mercado, ou no Canadá, ou anton la purmeira beç que bieno de l Canadá. Era ua marca de la Rússia, diç que buona, i nós assi le íbamos dando uso an tiempos de caça, ora andas tu cun eilha, ora atiro you.
Al fin de tarde, anquanto las bacas íban por sou camino, nós arrodiémos por Lhombo Rodielho zde los cerrados pul carreiron adreitos al alto.
"caíí ... caíí ... caíí ... caíí ..." lhiebreeeeeeeeeee!!!!!!!!
Un lhebron fungaba barreira arriba.
Pum! Pum! polareda i más polareda! la lhiebre tenie siete bidas i nien un chombo le acertou!
No die a seguir diç Félç: fálta-me la mie "cacila", yá zde onte que nun me aparece an casa. Dalgua raposa la apanhou, ou anton quedou-se pul termo.
Dous dies i nada. Adonde se haberie metido l perro?!
Al terceiro die alhá fui achada, caída redonda, crabadica de chombos na barreira de Lhombo Rodielho.
L caçador de lhiebres nunca más atirou un tiro a los animales cun arma de fuogo!

Buonos dies
i buona caça

Eigreija, Abadia i casa de Eidemundo

2011-01-12T11:17:00.000Z

Houmenaige no centenairo

2011-01-03T22:44:00.002Z

Hoije naciu más un rincon an mirandés adonde se bai a falar de l Abade Manuol Sardina, abó de Tiu Calachas i que tamien fui cura an Cicuiro nos finales de l séclo XIX i amprecípios de l séclo XX.
Ye eiqui.

Buonas nuites
i buonas leituras

Cunsoada mirandesa

2010-12-31T03:38:00.005Z

Esta cuonta de Natal yá eiqui fui publicada l'anho passado an pertués. Queda agora la berson nun mirandés meio alinhabado.

La rue St-Laurent staba quaije zerta. Nun fússen ls anfezados anfeites lhuminosos, a pingar de las arbles znudas i famélicas, que pintalgában ls restros de niebe atirados contra ls bordos de los passeios, nien se acraditarie qu'era la nuite de cunsoada.
L home, inda nuobo, quarenta anhos mal feitos, caminaba cun passada tonta, sin çtino, nun remar cansado contra la nuite anfindable, drobado pul peso de las recordaçones que le tenien crabado la dentuça ne l cachaço i teimában, raibosas, an nun le dar çcanso.
Las más antigas, anubradas mas inda assi felizes, éran cacos cada beç más zlidos de las cunsoadas de l'anfáncia an Miranda: la stralhante fogueira acesa pul antusiasmo de la rapaziada, carradas i carradas de lheinha queimadas nua einorme borralheira qu'alimentában nuite fuora las lhabaredas sfameadas de chegar al cielo; la missa de l galho, na Sé atrecida, cun la lhadainha de l padre a ressonhar pulas eimensas nabes, tan anterminable qu'até zacracionaba l saráfico Nino Jasus de la Cartolica cumo siempre regaladamente anstalado na sue guarida; la calhada buolta a casa, la paç pousada cumo palombas brancas ne ls beirales de ls telhados, ls passos a retumbar nas piedras lhisas i slúbias de la calçada mediabal.
Ne ls purmeiros anhos an Montreal, lhar d'eimigrantes atelundrados a saber de sentido pa la nuoba bida, éran nuites tristes, chenas de suidades mal curadas, de lhágrimas furtibas de la mai abafadas pulas squinas de la casa, çfraçadas por sunrisas apagadas.
Yá home feito, nua scapada custante a las fraquezas coladas para siempre a la piel, las nuites de cunsoadas éran passadas, nas más dibersas i einesperadas circustáncias, al sabor de las sues relaçones amorosas fríbolas, ienebriantes, sin cadenas. Quando las cousas corrien pa l tuorto, habie siempre ls braços abiertos de la casa de ls pais, las eiternas bolhas mirandesas, la calor dua alegrie más resignada i l bozeiron sano de l pai cheno de lhembráncias. Era a eilhas que se agarrában todos cula fúria de afogados nun mar stranho a que nunca pertencírun por anteiro.
Staba, agora mesmo, a oubir la boç de l pai: que rapaç este, dás fé mulhier?, nun habie presente de Natal que le serbisse. Solo tenie uolhos pa las faquitas mirandesas, até le saltában ls uolhos de la cara quando bie ua nas manos d'alguien. Inda mal se aguantaba nas piernas, parecie un perrico a saltar atrás de quien le amostrasse l dianho dua faquita. - Las palabras rudas ansopában-se de lhágrimas ternurentas. - Nunca bi ua cousa assi, l garoto parecie ambruxado. Cumo ye que se podie dar ua anzona dessas a ua nino! Solo se fússemos boubos.
La mai, selombra diáfana, sunrie, passaba-le la mano protetora puls pelos i, sin qu'eilhes se díssen de cuonta, iba-se çpedindo als poucos de l filho, de l home, suoltas, zde hai muito, las apeias a los calhos de la bida.
L findamiento de ls pais cobrara la redadeira lhigaçon ambelhigal als balhes floridos de l'anfáncia. L fascínio de las faquitas fura para siempre, assi l'acraditara, bencido pul mistério de las mulhieres. Mas cul correr de la bida, percipalmente nesta altura de l'anho, a caras culas lhembráncias assanhadas, cada beç se daba de cuonta cun mais crudeza de la fraqueza de las raízes que l'agarrában al suolo que pisaba, de la sue solidon. Ua solidon eimensa, delorida, que le arrepassaba las entranhas i abrie sucos fondos de tristeza que nada, nien mesmo las más ambolbientes abinturas amorosas, podie curar.
Quando chegou al Parc du Pertual, las piernas trémulas recusórun cuntinar la caminada sien norte, oubrigórun nel a sintar-se nun talho mesmo a la borda de l funtanairo adonde l lhion de piedra de la bica, seca nesta altura de l anho, lo ouserbaba meio stranho. Mais adelantre, l padron de ls çcubrimientos, scorreito i sbranquenhado, na sue frieza de piedra, era centinela begilante, andefrente a la perséncia del. Ne l telhado de l coreto, los palombos ancolhien-se uns acontra ls outros para se resguardáren de l friu cortante i tamien nun le dában atençon. Solo la manta de niebe que acubrie la calçada de l parque ye que s'arrastraba al ancuontro del pa l ambolber ne l sou abraço frígido.
Atrecido, staba çpuosto a alhebantar-se, cuntinar l calbairo de la caminada, quando, asselumbrado, pressentiu un búltio sintado al lhado del. Sin pinga de sangre, uolhos abiertos de spanto, reconheciu lhougo la figura anconfundible de l Nino Jasus de la Cartolica: rosado, la cartola na cabeça, cheno de proua na sue farpela de setin bordado a ouro de ls dies de fiesta, un sunriso fraterno zenhado ne ls beicicos anfantiles.
Oubedecendo a un aceinho de l Nino, l parque animou-se debrebe. Un grupo d'anjos abaixou de l cielo, aquemodou-se ne l coreto cun un farto strumental de harpas, cítaras i fraitas qu'anchírun la nuite cula magie de la sue música celhestrial. Lhougo de seguida, dous outros anjos, salidos de l friu, zdrobórun alba toalha de lhino anriba la niebe i serbírun an siléncio, ua probe cena de cunsoada cumpuosta de pan de centeno, chouriço i persunto.
L Nino, a dá-le la risa, sacou de la jabeira de la çamarra ua guapa faquita de cabo de madeira trabalhado qu'oufereciu al home.
- Reconheces? Ye la faquita de ls suonhos de la tua anfáncia. Podemos ampeçar a cenar.
L home, cumpassiadamente, nun ritual lhitúrgico, a saborear cada sfergante, cortou l pan an lhargas i gustosas fatilas, l chouriço an rodaixas finas i çumarentas, l persunto an lhascas quelor de rosa, cun firmeza i ua sabedorie que solo podie nacer de l fondo de la mimória ancestral.
Faltaba l bino mas lhougo de la boca de l lhion de l fontanairo ampeçou a manar an bica-abierta fresco i fuorte que arrecolhien na ambuça i sorbien sastifeitos.
Finda la cena, ls anjos arrecolhírun ls restros de quemido i ls strumientos musicales i bolórun, sin rugido, pa las perfundas de la nuite. L Nino Jasus de la Cartolica, un cachico mais quelorado puls eifeitos de l bino, tardou un redadeiro mirar ne ls uolhos de l home i purparou-se para se scapar tamien.
- La faquita - çaçamelou l home.
La suable mano de l Nino topou-le ne l ombro.
- Ye tue. Ye l tou presente de Natal.
Quando, sfergantes apuis, cun passo firme i decedido, l home tornou pa l apartamiento del, cula faquita ne l fondo de l bolso, era l garotico mais feliç de l mundo.

Buonas Fiestas

2010-12-21T22:18:00.000Z

La Mona Negra - ua cuonta de Natal

2010-12-19T22:12:00.000Z

Habie dous cepos no lhume, seinha de fiesta ou matáncia, que l más de la eimbernada l folhin de las paredes i de los canteados se acrecentaba cun l fumo de dous guiços ratunhados no cuncelhiu i alumiado por meio gamon metido nas lhares, an lhança adreitos afuora. Anton, solo l relhuzir de las bistas cobraba l mortiço i l negro de la cozina forrada cun meia dúzia de baras de fumeiro, al menos haberie botielho no Natal i nos Reis, ua escuridon lharga cumo nuite d’Eimbierno adonde antraba pul campo de las teilhas cabalho que serbien de chupon, ua racica de lhuna clareada de gelada. Negras i fries las nuites arrimadas a cada fin de més de las matáncias i de l Nino Jasus, menos aqueilha nuite de lhume fuorte i pote a bafiar l cheiro a polbo cun batatas i berças, candeia a gáç, turron de Mobeiros i meia quarta de nuozes i almendras mercadas na feira l Naso a uns comerciantes de por ende abaixo de las arribas. Á! que la cena si iba a ser de chupita. Tamien poderie spenhicar de las ubas guardadas an ramalhete na prieça de casa zde las bendimas! Todos los dies a mirar para eilhas i solo naqueilha nuite l botarie l diente apuis de tanta cuçpinha tener angulhido manginando l gusto que inda tenerien.

Malgarida, feita lhabandeira abanando l rabo pul lajedo de piçarra de la cozina, ora poulaba dun escanho para outro, assomaba-se a la prieça de casa mirando adreitos los colgadeiros de ubas de rei, ouferecie-se para ajudar a cumponer la mesa, ancabriolaba-se no regaço de sou armano más bielho que benira de Fráncia la purmeira beç apuis de soutranho haber passado a salto, ou anton pedie a Bitór que le cuntasse ua cuonta. Un tarabielho!

- Á! Sabes? perguntou el, hoije si te cunto la cuonta de l Nino Jasus apuis de cenarmos.

Mal maçcou las batatas i l polbo cun las ganas que tenie de oubir la cuonta, Bitór yá andaba no quarto anho de seminairo an Bregáncia i sabie andonar bien la cousa. Ua beç até se escapou de alhá para ir a ser lhabrador, de trator i todo! baliu la mai que mandou rezon a la Guarda de la Bila para que l prendíssen a el i a outro cumpanheiro i por esso tubo que tornar al para trás a saber de la sucada de las letras que deixara a meio. Si la pensou mas al fin saliu-se mal, agora que tenie faramalha isso tenie. Dezie-las tan bien que quaije todo mundo se ancreditaba nel. Nien l sermon de l bispo no Naso ancandilaba tanto cumo las palabras sérias de Bitór. Aposque si iba a dar un cura de purmeira auga.

Inda l azeite relhuzie na pocica de l queixo de Malgarida quando l armano antre dues garfiadas ampeça cun ar grabe i sabedor de cuontas:

- Sabes que fiesta ye hoije?

- Hoije nó! Diç que que manhana ye die de beisar un l Nino znudo que punírun nuas palhicas de centeno no presépio que fazírun l outro die na eigreija. Tenie tanto mofo que traírun nuns cestos de las paredes ambaixo l lhugar! Quien me lo cuntou fui Tie Bárbela. Bien que se me antolhórun dalguns monicacos para morar: uns canhonicos, un burro, ua baquita, até habie uns que estában bestidos de reis! I nien me deixórun pegar neilhes. Assi, tengo que me baler de las piedras i de las bolhacas para monas.

- Pus esse Nino bai a nacer esta nuite!

- Anton nun naciu yá? Perguntou Malgarida de l alto de sous cinco anhos acabados de fazer.

- Sí, buolbiu Bitór, mas sabes que todos los anhos l Natal ye la fiesta de l Nino Jasus. I cumpassiou la boç. Tamien todos los anhos quando nace, l Nino Jasus abaixa pul sítio de l lhume i deixa cousicas i lhembráncias nos çapaticos que las personas pónen a modos al pie de l murielho, ou na chubineia.

De cuntino ls uolhos de Malgarida parecien dues centeilhas i cumo un caramonico eilástico debrebe saltou de l escanho, botou-se a correr adreitos al quarto i an menos de nada se apresentou cul sou único par de çapatos, uns çapaticos de agulhetes feitos an calfe amarielho que sou pai habie mercado na feira de l Naso a fin de Berano. Arrodiou la mesa, barriu ua esquinica al pie de l estrefegueiro i yá se purparaba pa los deixar eilhi, nó un mas los dous, porque se esse Nino que dezien deixaba cousas nun çapatico, anton nos dous melhor parte l tocarie. I lhougo a eilha que nunca naide l habie dado nada a nun ser sue mai, ua beç, ua caiata de arrebuçado de San Marcos, agora más que esso nien l bestido d’ua mona sequiera … i se fur ua mona? Pensou. Tanto cumo eilha querie tener ua mona cun piernas, braços, pelo para peinar, bestidos para tirar i poner, lhabar, coser. Á mai! que buonas tardes de monas passarie.

- Nun los puodes deixar inda, porque El solo ben apuis de todo mundo estar na cama a dromir. Sabes que se bei giente espanta-se i apuis deixa todo nuas casas i nada nas outras!

- You tamien l quiero ber – tornou eilha – i bien gustarie que astanho me deixasse algo, el que nunca me deixou nada!

- Mira, apuis de cenar i de mos irmos a la cama, bonda deixares un çapatico tou ende na esquina de l estrefegueiro a ber se manhana ten algo alhá.

Outro remédio nun tenerie, mas solo un? I tan pequerrico? Inda cabie alhá ua monica ou anton ua bolsica de necras de bidro, ou l que l Nino Jasus pudisse abaixar pulas lhares, mas la mona siempre era más lebe que las necras.

Comiu de las ubas que tanta gana tenie, nuozes i terron, mas la eidiea iba siempre a parar no çapatico amarielho que haberie de deixar al pie de l borralho. Apuis de más uas cuontas, cepos feitos brasa i tiçonicos, quedou l siléncio de la nuite tan solo cortado donde an onde pul piar de l moucho no uolmo de la ciguonha. I Malgarida de oubido fuora de las mantas a ber se sentie un tlincar de las lhares ou l zbiar de las teilhas para que l çapatico nun quedasse anaiunas … até que se dromiu.

Manhana cedo, antes de sue mai acender l lhume, Malgarida atirou-se de la cama cumo un foguete adreitos al çapatico amarielho, agarrou-lo mas nun biu nada, apuis chocalhou un pouco, andrento ua moneda de croua.

- Á Bitór!! Bitóóó… solo me deixou ua croua!!

- Al quei?! ... Á! Sabes? respundiu l armano, ye que l purmeiro anho deixa siempre a pouco.

Anfeixou-se la boç, apetecie-le chorar, mas dado era dado.

- Mira que fui bien garunho cumigo l Nino Jasus. Se fai assi an todas las casas nun haberá muitos ninos a gustar del!

Quando tubo la purmeira mona, noutro Natal talbeç, negra, trazida de Martinica por ua francesa patrona de sue mai, bieno a la mimória l negro folhin que cobrie las paredes de la cozina an Pertual i la croua a chacolhar no çapatico cumo quien fai caçoada i atira un çton pulas frinchas de las teilhas. Tan loinge moraba l Nino Jasus de Malgarida!

Alcides Meirinhos, Dezembre de 2010

Cuncurso de cuontas de Natal 2010

2010-12-17T23:58:00.000Z

L cuncurso de cuontas de Natal 2010 está ende a espera que todo mundo bote faladura. I escrita tamien.
Las andicaçones para partecipar estan eiqui.
Toca a poner essa eimaginaçon a bulhir i tirar las aranheiras de las cuontas de serano.

Buonas nuites
i toca a passar la cuçpinha an letras.

Gooooooooooooolo

2010-11-28T23:23:00.000Z

Goooooooooooooolo

Buonas nuites

i buona bola

Os dois Manos

2010-11-18T10:22:00.001Z

18 de Nobembre de 2010 - Nobenta anhos de bida muitas alegrias para mos dar: d'hoije nun anho Senhor Padre Zé

Augusto e Manuel eram dois irmãozinhos nascidos numa aldeia serrana. Rapazes como os demais da sua idade, viviam uma infância despreocupada, como os pardais na romaria, ou como as ervas do ribeiro. Dormiam de noite e sonhavam, brincavam e sonhavam de dia, excepto quando, por vezes, acordavam bruscamente para a dura realidade. Vida bem amarga. Tinham por dom o céu, uma mãe carinhosa, que os nimbava de beijos, mas também um pai que os enternecia dum amor violento, rude e autoritário com a estaca nodosa dum feijoal florido. Chefe e ditador da família, usava com os filhos a pedagogia herdada dos antigos, talvez dos velhos lusitanos. Assim precedia:! Nada de ternuras ou carícias. Nada de elogios. Poucas palavras, ordens secas, sem admitir desculpas “Nem mas” nem meio “mas”. Vais a correr e voltas a fugir. Ainda estás aí. Sempre a dormir! Brutos que nem portas. Não sei a quem saíram. Mais lorpas que aquele seu tio tonto que fugiu para Andaluzia. Não sentem cobiça para nada. E pela mínima falta zurzia neles como em centeio verde. O Augusto bem se lembra daquela vez: por causa dum passarinho encantador ia olhando e tropeçou. Tropeçou caiu e partiu a bilha junto da fonte, entre uns ramos secos. O pai tomou dum galho e deu-lhe tantas, tantas…ai Jesus. Parece que matava o garoto e não digo menos se a mãe, Ti’ Angelina, não acode a tempo a tirar-lho das mãos, daquelas mãozorras pesadas e calosas afeitas a britar pedra na mina dos Raposos. (Chamava-se Ti Domingos Mineiro)

– Deixa-me o rapaz – dizia ela – ainda os vais aleijar. Tens uns modos de bater. Deixa-o, já te disse. Oh raivas de homem este. E colocava-se no meio cobrindo o filho até passar a tempestade.

A mãe como que adivinhando dizia muitas vezes ao pequenos: – S’eu um dia vos vos venho a faltar, quem há-de cuidar de vós?

E aconteceu. Veio uma doença grave à Ti’ Angelina a que não resistiu. Os dois choraram ao princípio, mas em breve esqueceram aquele dia triste. Voltaram a dormir, sonhar e brincar. Brincavam um dia no ribeiro aos moinhos. Tinham, a seu modo, muitos sacos miúdos, feitos de pedra, junto dum cachão de escuma. Preparavam-se para os transportar no seu carro de lata que fazia um grande “chi-ó”, quando o pai os chamou com alta voz. Deixaram tudo e correram. Ti’ Domingos Mineiro que casara novamente quase em segredo, apresentou aos dois filhos outra mamã, desconhecida, que sorria para eles. Entretanto enchia-lhes os bolsos de confeitos.

Poderiam ter amor aquela nova mamã? Tivessem ou não, para eles pouco pouco importava contanto que, ao menos, lhes não batesse. Pancadaria de aquecer, já tinham que bastasse. Verdade seja dita que os garotos dos rapazes também faziam por merecer. Os títulos vulgares de piléus, lafraus calabreses ou escacha-pedras, se de todo os não mereciam, também por vezes não lhes assentavam.

Um dia chegaram com as calças rotas de andar aos ninhos enquanto as vacas andavam aos pães por onde lhes apetecia. Descuidados da vida iam-se para as penhas a deixar-se escorregar ou como dizem resgalgar. Saltavam os silvados e os ribeiros. Encabriolavam-se nos muros. Balançavam-se nas ramagens. Magoavam-se pintavam... a canastra.

– Ai se o pai o sabe.

– Tu não digas nada.

Em casa, sentiam-se presos, falavam pouco e baixo, monossilabicamente. Nos campos, consideravam-se livres e senhores. Procuravam a jolda. Expandiam-se em termos que lhes acudiam a boca, às vezes, atrevidos e de que nem sempre suspeitavam o sentido.

– Tu não digas nada! Olha que se o pai sabe!...

Mas Ti’ Domingos veio a saber muita coisa… e nem tudo. Ele que também de língua não fora circunciso, não tolera atrevimentos. De pequenino se troce o pepino e os maus rebentos.

Naquela tarde, ao chegar do trabalho, resfolegando, toma o soveio do carro e chama os dois para o quarto de dentro que obedeceram a tremer e chorar, sabendo de antemão aquilo que os esperava. Passou-lhes pela mente o pensamento da mãe, que Deus perdoe, tão carinhosa e compassiva. Ah! Se alguém os viesse libertar naquele aperto! A madrasta, essa não, não possuía entranhas de mãe; por isso nada havia a esperar dela! A nova mamã, não fazia caso, não se importava dos seus choros aflitos, não se confrangia dos soluços sufocados, ao compasso de golpes que começavam de estalar, tremendos, como tempestade que tomba.

– Deixai que eu vos ensino! Nem um pio, já disse! Nem um soluço. Malandros. Ides aprender. Tomai outra vez… que vos prendo daquela viga! Haveis de ver…daquela viga se não tomardes cuidadado!

E tomaram, olé, se eles eram rapazes… de pés no chão e cabeça na lua! Tinham de pagar caro o tributo (o tributo) da idade, idade inexperiente pela qual todos nós passamos…se procuram recordar-se.

– Ai se o pai o sabe, é que são elas.

– Desta vez mata-nos. Ao Manuel, mais novo já lhe parecia ver a figura do pai alto magro e seco, cabelo em desalinho, olhos em chama, cordoveias inchadas de cólera, soveio na mão, dentes semi-serrados: em volta, o ar torvo, depois a terrifica viga, a viga da cumeeira… fuliginosa.

– Anda cá, anda cá.

Augusto sentia o coração golpear no peito quase à boca da garganta: anda cá, anda cá. As pernas flácidas recusavam-se a entrar em casa. Por três vezes tentou… ouviu vociferar lá dentro e correu a esconder-se. Chamou o irmão que espreitasse e entrasse em casa pela janela das traseiras, agora mesmo que a madrasta foi à frente e o pai saiu com o picão. – Mas não faças barulho.

Foram-se esconder numa vinha, amarados à terra, que ninguém os visse. Cochichavam, à espaços, baixinho. Uma torda pedresa, veio poisar na sebe, ali perto, sem saber indiscreta. Augusto pegou num torrão para lhe atirar.

Depois esgarçou uma verjôntea tenra de videira, deu metade ao irmão, tiram-lhe a casca e começaram a saboreá-la com muitas caramunhas por causa da acidez. Olhavam-se mutuamente.

Seria engraçado se… mas naquelas circunstancias… pisavam o risco e a demora nele, cada minuto, votava contra. – Voltar, não voltar? E agora? Eles já sabem tudo! De certeza.

– Para casa não! Para onde?

Anda cá! Anda cá! Lembra-se quase ao mesmo tempo, de ter ouvido falar dum tio que tinham em Sevilha, irmão da falecida mãe, tão carinhosa! E por isso também, como ela, o tio havia de ter bom coração, de certeza! Mas tão longe.

– Nem por isso! Eu a pé em dois dias era capaz de lá chegar.

– E sabes o caminho?

– Não tem nada que saber, por ali pela serra – e apontava o norte. Atravessa-se a fronteira. Depois pergunta-se: é acerca!

– Vamos lá? – Vamos! – Mas se o pai descobre.

– Não se diz nada a ninguém.

– Em estando com o tio, ele defende-nos.

Anda cá! Anda cá – pulsava o coração na garganta e nos ouvidos.

Tombou a noite silenciosa, povoada de mistérios. Na casa do Ti’ Domingos arde um candeeiro de azeite sobre o limiar da porta. Á luz bruxuleante entrevê-se do postigo uma mesa tosca com quatro malgas de caldo que arrefece!

Espera que espera e eles não aparecem

– Onde se terão metidos esses tunantes? Que sova, que sova vão apanhar.

Nas casas dos vizinhos já não se fala de outra coisa à hora da ceia, quando se resumem os factos da jornada.

– Amontoaram! Diz-se que… é o tema obrigatório da conversa.

– Têm-nas feito bonitas.

– Mas também levam coça.

– Não é com muita pancada que se endireitam. Eu nunca toquei nos meus e eles bem se criaram. O pai impertinente faz o filho desobediente.

– Mas também não é com o galardão, deixando-lhes fazer todas as vontades!

Alguém que passa na rua pergunta.

– O Ti’ Domingos, então os vossos filhos ainda não apareceram?

– Vão apanhar uma tapona. Só me fazem arreliar. Roem-me os fígados.

– Não lhe deveis bater. Se não agarram medo e ainda é pior.

– Eu já só os queria ver em casa! Já vejo que bater não adianta. Tanto eu queria faze-los uns homens!

– Não se terão escondido no palheiro! Quem sabe … caído nalgum poço, na ribeira… o burburinho aumenta e faz sensação naquele após-ceia. Nas casas dos parentes ou vizinhos não se encontram. Juntou-se muita gente. Resolveram tocar os sinos a rebate, correr os campos com lampiões. Disparar tiros no ar, não tivessem adormecido, por aí, por esses barrancos, debaixo dos freixos ou castanheiros. No dia seguinte de manhã assomaram-se outra vez às minas e poços, furnas, matagais. Nada! Passou um dia, uma semana. Passaram meses. Ti’ Domingos, já de luto, continuava a procurar pelas minas, devesas, povoações vizinhas, tapadas, barrancos.

Fez promessas a todos os anos, aos santos à Senhora da Luz e do Livramento, a Santo António e S. Ciriaco. Mandou rezar missas!

Deixou crescer a barba, pôs gorjete preta e uma gorra de viseira caída na testa a cobrir as rugas.

Assim o vejo passar todos os dias a caminho da mina. Fala pouco e não sabe rir.

Muitos anos passaram. Quantos não sei. Certa manhã, a mulher do Ti’ Domingos, ao levantar-se muito cedo, viu dois vultos, a dormir no curral, cobertos com uma manta. Supôs tratar-se de pastores ou contrabandistas e não quis acordá-los. Passadas duas horas voltou e encontrou-os ainda dormindo.

– Pastores, levantai-vos, que são horas de soltar os rebanhos. Vamos, e dizendo isto descobriu-lhes o rosto. Pareceu-lhe… O coração deu-lhe um baque. Augusto, Manuel, sereis vós? Os meus filhos que voltaram, que julgava perdidos. Ai os meus filhos!...

Os dois mocetões, já de buço a pontear, sentiram um frenesim.

– Não quereis ver como os meus filhos voltaram. E que mocetões estão. Oh pobrezinhos todos esfarrapados, quanto sofreram por esses caminhos do mundo! ...

Ti’ Domingos alvoroçado com os gritos da mulher, aquela hora, levantou-se à pressa da lareira e abre a porta. Houve um momento de pausa. Depois estendeu os braços e exclamou com voz embargada: – Meus Filhos! E imprimiu um beijo na fronte de cada um, único, tão bem impresso que eles jamais, olvidarão o primeiro que guardaram de cor.

Padre Zé, Porto 20 de Novembro de 1961

Los triteiros

2010-11-04T22:09:00.000Z

Cuonta salida no Jornal Nordeste de 28 de Outubre de 2010

Chegórun un die los triteiros a Cicuiro. Trazien un martielho i ua sartián, batien neilha i dában la buolta al lhugar para fazer propaganda. Habien pedido un curral para atuar i fui-les dado l de la Tie Fona (l curral de Tiu Bara, ambaixo de la eigreija) i alhá íban fazendo propaganda. You i miu armano bien mirábamos para miu pai mas nun teniemos coraige de l pedir. Al fin de cena dixo assi el:

- se quereis ir a ber los triteiros anchi las gorras de patatas i ide.

Nós, cumo denheiro naquel tiempo nun habie, alhá fumos adreitos al curral para ber los artistas, mas la mulhier de l triteiro dixo que patatas yá tenie muitas i nun mos deixou antrar. Quedemos eilhi a la puorta a espera. Antrórun alguns que tenien denheiro, cumo Tiu Donis Marcos (que se morriu no die de la boda de tie Sabel Pedrica quando botaba uns foguetes … rebentou-le na mano, amalingrou-se … desso se fui) i nós nada. Fumos para casa, alhá habie ua fogaça de centeno anriba la mesa tapada cua toalha de lhino. Nuossos pais yá estában deitados, miu armano más nuobo que you, cul faco cortou un cacho, apuis you cortei outro i alhá tornemos nós cul pan a tener cun la tie de l triteiro. La mulhier mirou pal pan que nós lhebábamos i pal denheiro que eilha tenie, agarrou-lo i dixo: - antrai!

Antremos. A la punta de baixo de l curral habie un grande munton de estierco yá furmentado, l estierco tamien furmenta quando bien feito, tem un cheiro acidulado caratelístico. L furmiento fai calor, l curral tenie un calor moderado cun sou cheiro próprio. Los lhabradores yá están aquestumados, nun estranhában. Los romanos até tenien na sue relegion un Dius Estercorário. Eilhi estaba resguardado por palos, tabras i galhas adonde las personas se íban aquemodando los que antraban a espera que ampeçasse. Por fin antrou l triteiro i dixo:

- you preciso duns rapazes! quien me ajuda? Ben acá, tu que antreste sien pagar, dixo para mi. You habie pagago mas sien denheiro, era solo troca de predutos porque denheiro nun habie.

- Ben, ajuda-me a fazer l que seia preciso i you mandar.

Saltei para alhá.

- Bamos a quemer este jornal! Coraige, mas cuidado! sien lo angulhir.

Atirei-me al jornal por ua punta i el por outra. Faziemos que quemiemos i apuis atirábamos fuora.

- Catanxo! Pareces un lhambon, tu sabes lo que comiste? Este jornal estaba ambenenado. Agora tenemos que tirar l beneno.

Miu armano, dous anhos i meio más nuobo que you, quando oubiu que aquilho estaba ambenenado ampeçou a chorar:

- Ai! Ai! miu armano nó! You nun quiero que se muorra, ai ai que inda se bai a morrer.

You, todo calmo porque sabie que nun era sério, sabie que era ua tramóia. Los que estában alhá rírun-se cun miu armano i dezien que el era l que más fazie rir. Mandórun-lo calhar.

- El está ambenenado mas nun se bai a morrer, dixo l triteiro.

Miu armano, cun cinco anhos i meio, nun defrenciaba l que era de beras ou a representar.

- Quieres que te tire l beneno José? Anton bira l culo pa la giente para que eilhes beian salir l beneno.

Dou-me un copo de auga a beber, you bebi i apuis cul funil na parte de trás de las nalgas apanhou ua auga amarielha para outro copo. Alhebantou alto i todo mundo batiu palmas, l beneno habie salido i miu armano parou de chorar.

Chamou outros rapazes i dixo para tiráren las gorras que puso colgados nun cordel. Quando puso l último caírun-se todos.

- Deixai-los cair, dixo l triteiro.

Passado más un cachico i apuis de fazer uas gigajogas dixo:

- Agarrai-los i esfregai-los na cara cumo you fago!

Esfregórun i quanto más esfregában bás anfarruscados de carbon quedában. Risada giral de doler la barriga!

Apuis dun espetáclo de robertos que fazírun rir i ancantar todo mundo, alhá acabou más un serano i l miu purmeiro die de magie a troco dun carolo de centeno.

Cuonta ditada pul Padre Zé, dando fé de sous tiempos de nino.

Castanheiro Garrido

2010-11-01T15:13:00.000Z

Estaba assi onte l castanheiro garrido, na Canhada, un de los que fazien parte de la Carreira de los nuobe. mas l que más me chamou a la atençon fui tener mirado para el e dar cun aqueilhas galhadas todas secas i podres de l tiempo, de la belheç i de las patifarias que los homes le teneran feito para que nun asselombrássen las tierras de riba (diç que ...).
Ye berdade que l retrato fui "untado" mas solo lo fize para trazer a la bista los rebentos que parece querer caçoar de los anhos i de los homes.

Buonas tardes
i buonos magostos

Praceta

2010-10-31T21:26:00.001Z

An Tires, ne ls alredores de Lhisboua,eisiste ua praceta d'houmenaige
a la lhéngua mirandesa. Fui l miu cunhado Alberto, tamien mirandés cumo nós,
que la çcubriu.

La casa de Tiu Faustino an 2010

2010-10-22T20:26:00.000+01:00

An Abril de 2010 era este l calantriç de la casa mai de los Cebolhos, cun sou canelheiro a arrebentar las teilhas a camino de l cielo.

Buonas nuites

i buona suorte

Cebolhos

2010-10-19T22:46:00.000+01:00

Morában nua curralada no bárrio de la eigreija, antre la casa de Tiu Agusto Xanola i l carreiron de l Lházaro.
Ua de sues filhas, Tie Marie, fui la mie purmeira teta. Inda l pasado més de Agosto, an casa deilha na Pruoba, me dixo: á carai que tamien mameste desta Cebolha!
I bien que me ten feito.

Buonas nuites
i buona suorte

Tiu ...

2010-10-18T18:35:00.000+01:00

Andaba un die destes pul Praino i dei cun este retrato dun tiu de Cicuiro. Quien ye?

Padre Zé - Al correr de la bida III

2010-10-14T19:10:00.002+01:00

Mie prima Bárbela - cuonta passada na era de 1928 no termo de Cicuiro

Un die estábamos a la selombra dun uolmo al pie de las nuossas casas i eilha tenerá chamado madrina a mie mai. you nun gustei, aterei-le ua lapada i deixei-le ua marca na cara. Ralhórun-me muito i unca más me anraibei cun eilha ...
Outra beç, teneriemos por ende uito anhos, andábamos cul ganado de los pais deilha, tie Marie Teresa, mulhier de tiu Antonho Pequeinho, deixórun-mos solos todo l die i toda la nuite no Cerrado de Mingç i nun teniemos miedo. Cun nós andában dous perros, l Turco, de carrancas afiladas al cachaço, i la Raposa, nós dous achegadicos na cabanha anroscados a la manta anriba de l cuolmo que fazie de xerga i los perros al redor.
De bien ninos mos botában pul termo i pul mundo!

Pepes

2010-10-03T17:02:00.000+01:00

Morában todos assi cumo n'ua pracica, meio puorta cun puorta al pie de la eigreija.
Por adonde pára Oulímpio i Armando? ´Hai quanto tiempo que nun bénen a Cicuiro? percipalmiente l purmeiro.

Buonas tardes
i amboras frescas

Calças de Pana

2010-09-26T17:37:00.003+01:00

Habie salido de Mobeiros cun metro i meio de pana para que Tiu Chico Coixo le fazisse uas calcicas de estrena na fiesta de fin de Berano i que serien l agasalho de l eimbierno daquel anho de mil nuobe cientos i cinquenta i uito. Passada la Raia, de carabineiros nada (esses deixában passar quiaje todo para Pertual), ua preacupaçon a menos. De l alto de la sierra abistou l lhugar, más uns cientos de metros i chegarie a la huorta adonde sue mai ponie ua lheira de freijones i meia dúzia de pomenteiras, mas para tanto faltaba atrabessar l çcampado de los panes que abaixában até la passaige de los Lhameirones. Metiu-se marcacion abaixo, meio amugatado no centeno espigado que lo ancubrie quando tropeçou nun marco i d’ua rastreira fizo un rebolcadeiro. Á c’un dianho, la pana al redor de la cinta tolhie las piernas i la andadura, inda por anriba la camisola de sou armano más bielho fazien daqueilhes bracicos delgados i salagres braços de espantalho sien manos, l que tamien nun ajudaba a caminar no carreiron quanto más no meio de l pan. Mas inda se aporbeitou deilha, meia buolta, an beç de fazer aguçadeira nas cuostas de la mano quando lhimpaba las muormas, la manga de lhana ye que las pagaba. Anda toma que para outra beç nun me acusas a mai quando boto açucre no carolo molhado!

Inda pensaba nos arresbunhos de la chimpa no meio de la senara quando desambocou na passaige que haberie de atrabessar para poder chegar a las lhatas que fazien teçteira cun las huortas, quando …

- Aton! andas a niales de perdiç ou fuste a espreitar la peguça nas touças spanholas?

Batie fuorte l coraçon de Miguelico, habie dado de caras cun Tiu Fachuco, l guarda más malo que habie an toda la raia. Tenie que passar la pana se nó quedaba sien calças nuobas pa la fiesta.

- Fui a ber se habie corriuola a la punta de riba desta tierra para benir a segar pa l bitelico que la Marela acabou de zmamar.

- I sie tenie? diç l guarda, mas mira, tu nun andas malico nien nada?

- Nó senhor guarda!

Olha agora esta, malo you, pensou cun sous botones, malo quedarie se nun l deixasse seguir camino.

- Tenes quemido demás porque essa gordura toda nun ye natural … Tira la camisola para ber l que trazes ende rapaç! Mandou l guarda.

A ls poucos sacou las mangas i arrefuciu l cuorpo deixando a la muostra l metro i meio de cuontrabando. Alhá se habien perdido las uito dúzias de uobos que deixara an Mobeiros i de calças solo l cheiro que l panho eilhi quedou quien sabe para quien i a fazer l quei. Talbeç un die las cousas demudássen! I para melhor, bien cierto, que para fames i miséria que queden solo las tristes mimórias.

Buonas tardes

i buono die de las lhénguas

Miranda

2010-09-22T21:00:00.001+01:00

Ua cuonta de l Padre Zé, dezida, i bien, por Duarte Martins no die de la Lhéngua Mirandesa l die dezassiete deste més.

... Einemitable tue pacéncia!
Lhougo quien sós tu? Feia, fuorte i afamada?
Fuorte! Afamada! I feia!
Ye guapo l tou deber!

Ls Lusíadas i la fiesta de la Lhéngua

2010-09-20T23:31:00.000+01:00

La perdiç i l Abade Sardina

2010-09-06T18:23:00.001+01:00

Alhebantou-se cun las pitas naqueilha manhana de finales de San Juan para ir a rezar ua missa a Cicuiro, ua lhéuga bien andada que fazie a gusto ouserbando un touçon eiqui, los homes na outra galaza, l cuco buscando nial ou la quetobia a sbolaciar alto nos ceremoniales de acasalar.

Fui ua missa rezada de brebe que l tiempo nun andaba de feiçon a grandes demoras pus la yerba iba medrada i l pan meio amarielho. Se calha tamien la família de la almica rezada mal tenie denheiro pa la missa quanto más para dalgun oufício más demorado. Al nacer de l sol yá tornaba al para trás porque la criada i dues filhas habien de ir a alhumbrar la binha que tenie no Camino l Lhombo i el cumo buono patron ua mano inda le darie a las “salagres” mulhieres.

Para nun arrodiar muito, l desaiuno serie un carolo scadarçado de la meia fogaça que haberie de ser l almuorço, botou-se adreitos pulas Porqueiriças. Al passar ua parede, a meia barreira, sentiu bulhir a modos dun sbolaciar rouqueinho no meio de folharascas i fenascos. Quaije se assustou, parou i apurou las oureilhas para se anteirar de adonde benie mesmo aquel rugir. Antre uas queiruolas, yerba seca i uas bergontas de silba sanjoaneira reparou nun canheiro seguido adreitos a un nial de perdiç i a la antrada, anlhaçada, alhá staba l probe animalico quaije a dar las últimas por bias de l lhaço que la prendie. Bendo tamanho sufrir de la mai perdiç, agarrou-la, afrouxou l lhaço i de manos abiertas pensou cun sous botones:

- Dou-te la lhibardade i la bida, mas se calha quien te botou l lhaço tamien stá meio muorto de fame i al melhor tu perdiç serás la pouca chicha que alguien comerá até la segada! Tamien nun ye justo que tire la quemida a quien te lhaçou.

Mal nun habie pensado, mirou l animalico assustado, abriu las manos i ajudou-lo a ganhar un bolo cumo nunca habie botado an sue bida. Ato cuntino, metiu la mano no bolso de la batina i de l lhenço brumeilho que serbie de carteira sacou los dieç reis que habie ganhado cun la missa rezada an Cicuiro, agachou-se, mirou l nial i de manos no lhaço inda preso a ua staca atou-los alhá i pensou que cun aquel denheirico l caçador poderie al menos mercar un toucino an Alcanhiças i atamar la fame a el i a los sous por más dalguns dies.

Até que la perdiç poderá anjeitar l nial – fai outro, pensou – mas cierto cierto ye que hai rezas que mátan fames.

Adaptaçon d’ua cuonta dita este berano por tie Brígeda Sardina, de 88 anhos, nieta de l Abade Manuol Sardina.

Los Çaramontaina "quando un lhibro ye ua fiesta"

2010-08-29T23:27:00.004+01:00

No passado die siete fui un gusto mui grande oubir los Çaramontaina no recreio de la scuola an Cicuiro.

Buonas nuites
i bailes fuortes

Nomes de Leon

2010-08-17T23:20:00.001+01:00

Veguellina de Orbigo, na strada antre Astorga i Benavente, probíncia de Leon. L que tenerá l nome a ber cun este Balhe?! Al melhor nada mas até me daba ganas de armanar este rinconico cul de l retrato.
Á!! mas las cuincidéncias nun quedan eiqui: uns quilontros alantre, nó muitos, trés ou cuatro talbeç, hai un riu que a bien dezir ye un ribeirico: l Riu Duerna. I que tenerá esto a ber pal causo?!
Buono, Veguellina i Baglina quaije se dízen de maneira eigual i cumo ye que bós dziriedes Duerna an mirandés? Pus la Duorna ye tamien l chamadeiro de l termo de San Martino na ribeira acerca de l Molino de ls Terrones.
Los nomes deilhi i deiqui stan a más de cien quilontros … el hai cada ua!!!

Saliu l lhibro

2010-08-09T17:27:00.003+01:00

Tal cumo habie sido apregonado, no sábado passado, na scuola de Cicuiro, saliu l lhibro de l Padre Zé - La Mona l Maio - na preséncia de arrimado a cien personas de l lhugar i de fuora, acumpanhadas pul grupo musical tradicional "Trasga", outros amigos i antidades oufeciales. A todos los que alhá stubírun, l nuosso oubrigado.

Bloguers no Praino

2010-08-07T19:26:00.005+01:00

É sempre agradável recordar que os "Ancuontros de Bloguers Mirandeses" são um rebento do blogue "Al Balhe de la Baglina". Como está florido...

L Bui de Tiu Pio

2010-07-23T23:49:00.001+01:00

D - Esse cabo Carbalho era l quemandante de l posto quando aprendírun l bui de Tiu Pio …

M – Mas el stubo acá por dues bezes.

A- L bui de Tiu Pio?! Aton cumo ye essa de l bui de Tiu Pio?

M – Tiu Pio i tie Trindade nun tenien filhos i criórun a Tiu Abelino. I cumo lo criórun cunsideraba-se filho único.

D – Tiu Abelino lhieba l bui, baliente bui, a la Feira de l Naso i negociórun-lo alhá para Rabanales, ou o carai. Quien lo negociou – habie porqui dous gegociantes, Dius los perdone, Tiu Trasgo i Tiu Pilanca, - quien lo ajudou a fazer l negócio denunciou …

M – Hai siempre traidores …

D - … ajudában i cun aqueilha faramalha toda “agarra l denheiro” i esto i todo más, pus alhá acobardában las personas i las lhebában a negociar … ua beç a Tiu Modarra até le cortórun l rabo a un bitelo, nunca oubiste cuntar essa? el anganhou-se no précio i apuis para lo fazer bender cortórun l rabo i lhebórun l animalico por aquel preciico …

M – I ua beç a Tiu Charrano péç que tamien le fazírun eigual …

D - … negoceian l bui anton para Spanha.

A – I nun puodien bender para Spanha?

M – Nien se puodie ir, quanto más …

D – Solo pagando los dreitos … nun sei …

M – nun serie fáçl.

D – L bui lhieban-lo para Rabanales ua nuite aí a las dues de la manhana, nun fui lhougo naquel die, mas apuis de la feira quedou aquel zun zun “mercórun-lo los spanholes …” i cun seis guardas eiqui nun era defíçl tocar la notícia.

Nos processos, quien disse la denúncia tenie dreito a dieç por ciento de la tomadia i podie quedar çcuincido no processo se assi quejisse. L bui lhebórun-lo a las dues de la manhana, más ou menos, saliu pula Canhada, tenie miu pai un carro de cepas a la puorta i l bui a ouliar … uuuuu uuuuu “aí bai el, diç miu pai alto para nós oubirmos, á que inda me rebolcas l carro ladrón”, bui grande …

M - .. Negro …

D - Chubiu a la cereijeira de Tiu Miguel, los carbalhos de Tiu Tamboriteiro, Malhada l Meio, al lhado de l Castielho, alhá fui el. L diabo ye que se scapou i quando tornában a lhebá-lo outra beç apanhórun-lo. Fui na altura uns oitenta i tal cuontos!!

M – Tiu Ché tubo que bender l ganado para fazer denheiro i cunseguir ajudar a pagar la cuonta se nó Tiu Pio tenie que bender la receita toda, uns quinze mil cuontos ou más nos dies de hoije! Andubírun muitos anhos antrapaçados … báá …

D – A el amolórun-lo … porque l contrabando era de seis a doze bezes l balor de los direitos … aplicórun lhougo doze bezes …

A – Nun sabie you la cuonta essa de l bui de Tiu Pio …

M – Aquel? á mai, atraicionaba qualquiera un … Senhor Carbalho nun tubo muito por onde mexer, fui oubrigado …

Buonas nuites

i muito cuontrabando

Patarrins / Coxos

2010-07-18T14:56:00.000+01:00

Ye berdade que yá debere haber puosto los Coxos porque sigún la orde de l abecedário bénen purmeiro. L que passa ye que resulbi poné-los todos no P de Patarrins porque la maior parte destes son coxos (de nome).

Coxos son estes todos que eiqui se apreséntan i l nome bén de Tiu Chico Coxo, alfaiate que bibie nas últimas casas de la Pataca a salir para San Martino. Tenie la alfaiatarie nua casica a la dreita, de l lhado de las cortinas de la moraige, soalheira, adonde se fazien capas, jalecos, calças (a mi inda me fizo un par) i muita outra questura antremeada de renda. Hai un dito de Tiu Chico que quedou afamado i ye más ou menos assi: un die chegou un farrusteiro amigo al lhugar, a ua fiesta talbeç, quando le pregunta, "bai un copo á Chico?"

- "Sí, bai a casa que stá alhá Bárbela!"

Quanto a los Patarrins, la mai, Tie Sabel Patarrina tubo ua filha cun tiu Ribas de San Martino: Tie Marie, que se casou cun Tiu Albino Coxo. Dende la lhigaçon antre las dues famílias.

Buonas tardes

i buona séstia

Lhibro de houmenaige al padre Zé

2010-07-14T15:31:00.002+01:00

Apuis de mirar l cartaç ende an riba, dei cuonta que le faltába escrebir ua cousa: "todo mundo stá cumbidado, seia de l lhugar ou farrusteiro".

Son cuontas de la Raia i de toda la Praineira, screbidas por quien las bibiu i oubiu nos anhos binte i trinta de l séclo XX.

Cuntamos cun la preséncia de l Presidente de la Junta de Cicuiro, l Presidente de la Cámara de Miranda, la Bereadora de la Cultura i l porsor i escritor Amadeu Ferreira / Francisco Niebro / Fonso Roixo, que ye tamien l antoante de la antrada ou antroduçon.

Muito gusto haberie an cuntar tamien cula cumpanha de l nuosso cunterránio i escritor Manuel Carbalho (Manolacas), mas por rezones familiares astanho passará l més d'Agosto no Canadá. L anho que ben será l lhibro del, "Montesinos".

I se nun fur antes, anton até die siete a las cuatro i meia de la tarde.

Buonas tardes

i colheitas fartas.

Probidéncia

2010-07-08T14:40:00.003+01:00

Antes de ampeçar a poner l soneto abaixo, solo ua pequeinha splicaçon: recebi-lo hoije mesmo no correio i nun l cunsegui guardar por más tiempo. Siempre son nobenta anhos de se tirar la gorra.

Oubrigado Senhor padre Zé por nos dardes más este prebileijo.

Puso-me Dius por sue Probidéncia

Neste mar de malinas i de amor
An que la alegrie se ambuolbe cul delor
I la sprança ye eiterna cunfidéncia.

Tengo ua armana chamada Pordéncia
I ua filha chamada Alma Flor.
Bibo na lhuita, antre l tirar i l poner,
De ls miedos i un sunriso an cumbibéncia.

Passei grandes peligros i apuros
Cumo la yerba que crece an bielhos muros.
Siete bezes cruzei los ouceanos.

I se alguien me pregunta l que you fago?
Na mie sfera acupo un campo
I ando agora a fazer nobenta anhos.

No oureginal

Pôs-me Deus por sua Providência
Neste mar de cruezas e de amor

Em que alegria se mistura com a dor
E a esperança é eterna confidência.

Tenho uma irmã chamada Prudência
E uma filha chamada Alma Flor.
Vivo na luta entre o tirar e o pôr,
Dos medos e um sorriso em convivência.

Passei grandes perigos e apuros
Como a erva que cresce em velhos muros.
Sete vezes cruzei os oceanos.

E se alguém me pergunta o que eu faço?
Na minha esfera ocupo um espaço
E ando agora a fazer noventa anos.

Escrebido a 24- 03-2010 na sala de spera de l cunsultório CLINAG quanda andaba a fazer fisioterapie de 10-03 a 30-03-2010
José Francisco João Fernandes – Padre Zé.

Na Raia Seca

2010-07-05T17:06:00.000+01:00

- Que será feito de Lhourenço Brás que nun drumiu an casa esta nuite?

- Ai de mi, palpita-me nun sei l quei!

- Alhá estais cun palpites. Deixai alhá: un rapaç nun se perde, para más cun dezuito anhos amproados.

- Hoije mesmo los fai, die de S. Lhourenço.

- Bien ampregues! Cun dezuito anhos está un home feito.

- Dezis bien, de brebe terminará l sétimo anho de l seminario. Apuis Dius saberá. Pan que le resta pa la bida yá lo ten! Pa la alma i pal cuorpo. Assi you tubisse cierta la salbacion!

- Para más filho de pais ricos: nun necitaba de studar. Mas cada cual cun sue anclinaçon. I ye ancarreirar por eilha!

- Palpita-me que nun la seguirá. Mirai l cabo Cepeda de la Guarda Fiscal.

- Nun hai cumparança. Esse nun se botou el de los estudos superiores, alhá sáben porquei, punírun-lo na ruga. Pouco tiempo alhá parou, mala frasca.

Deixemos no sou camino esta cumbersa de jineleiras al sol adonde nada se acaba.

Era manhana cedo de l die dieç de Agosto de 195 … (i tantos) quando esta cumbersa se passou.Tie balbina Brás madrugou nesse die, más do que era questume, agarrou l xal scuro, tapou-se, i ancaminou-se por atalhos adreitos a la sierra. Pul camino cruzou-se cul Padre Mário que fura dezir missa cedo no lhugar bezino.

- Aton, tie Balbina, madruguestes!

- Nien tanto, Sr. Padre Mário.

- Que amboras buscais pula fresca?

- Codessos! Para bardeiros.

- Tomai atento culs guardas. Puoden julgar que negociais dalgun contrabando …

- You nun les fago mal, solo busco cudessos.

Dezindo esto saltou ua parede de cortina i metiu-se pul restrolho. Padre Mário, al béla ir, tornou a abisar. Mirai, tie Balbina, nun báiades parende por causas de los guardas. Ye melhor tornar al para trás.

- Nun fai mal!

- Tie Balbina, scuitai-me. Diç que hai na Sierra nun sei l quei … qualquiera cousa cumo de contrabandistas … ferido … esta nuite. Falórun até de … un home … talbeç até muorto.

Esta ultima palabra fui cumo ua bala sien que P. Mário tebisse tiempo de se dar de cuonta. Tie Balbina quedou-se, retorciu-se alhebantou los braços retesados.

- Á! Sr. P. Mário, nun me dígades que se calha ye l miu filho a quien you busco. Miu probe filho!

Padre Mário caiu nel que se adelantrara demás i spurmentou ua salida bagarosa i cuidada: qualquiera salida daquelha semuostra. El tamien nun tenie la certeza firme. Solo querie eibitar un ancuontro nada deseable para quien quiera que fusse. Tenie bido ou antrebido essa “qualquiera cousa” de que habie falado por antre touças, mas por prudéncia, ou melhindres de justícia hourror, si, hourror ou ganas talbeç de çquecer, retirou-se a tiempo i calhado. Dezanfelhiç de quien alhá quedou, alguien que a estas horas stá aguardando cun cuidados, i nun torna, nun tornará más, para sue casa. Padre Mário anganhou-se porque assi quijo, i por que la amisade, que tenie al studante, lo anganharie.

- Tie Balbina, mas que pensar esse: inda onte falei cun Lhourenço! Onte a la tarde cumbersemos juntos. Siempre alegre, bien çpuosto. Deixai-bos desso! Tornai para casa. Se calha está el a buossa espera. Cousas de rapazes. You conheço a Lhourenço: nien tal eideia se bos atrabesse no pensar.

Tie Balbina suspirou.

- Ye l que bos dixe! Deixai-bos de eideias. Se fur berdade la cousa que dízen, talbeç, nun sei, deberá trtar-se dalgun contrabandista de Mobeiros, desses cacharreiros amportantes. Se ye berdade … dízen-se tantas cousas.

- Los anjos bos ouban, Sr. Padre. Mas you nun torno para trás. Onte Lhourenço pediu-me para ir a Mobeiros c’uns amigos … porque fazie anhos. You apuse-se, mas el tanto ateimou, mas tanto ateimou … aguardemos até que horas pula buolta. Nada! Toda la nuite sien dromir. Que tormento d’ua mai que cria los filhos! You tengo que ir a ber.

Nesse momento chegórun a correr, quaije sien resfuolgo los dous cumpanheiros de Lhourenço. Quejírun arrecular, mas nun tebírun tiempo. Todos eilhi buscában ua pregunta i tenien miedo, miedo de la achar. Eilha andaba a la flor de los pensamientos i cada cual tenie miedo de dezir l que pensaba, ou que los outros lissen claro no sou andrento. Todos baixórun la cara i los uolhos, mirando los cudessos … muorto?! Dúbida terturante!

- Que ye feito del, de l miu filho, pregunta Tie Balbina.

- Los dous ancuolhen-se aculados.

- Nun sabeis? Nun quereis dezir! Se nun tebíssades ateimado cun el, a estas horas el staba an casa assossegado. Dezi-me adonde lo deixestes? Adonde? Adonde drumiu?

Houbo un siléncio lhargo, molestador.

- Eiqui … na Sierra! Onte!...

Tie Balbina c’un gemido xordo fui-se pul restrolho, cumo ua seta, adreitos a la raia. D’alhá benie más giente apressiada. Passórun dues patrulhas de spingarda al ombro, caminando. Bieno l pai de Lhourenço a correr, sien falar. Más giente. Andaba un diçque diçque nos aires que nun se antendie. L cabo de la guarda preso. Mas ua patrulha de la G.N.R. para refuorço i alhebantamiento de l outro! Dezien-se cousas i lousas. Ye assi, i nó assi! Ye! Nun ye! Los cumpanheiros de Lhourenço cobrado más l ánimo splicórun:

- Nun sabemos nada. Solo sabemos que onte al scurecer íbamos a passar la raia. Lhourenço fazie anhos i lhebaba cien eiscudos para un die alegre – dezie. Apareciu l cabo i dixo assi: alto! Para trás sous canalhas. Nós spliquemos a las buonas que nun lhebábamos cuntrabando, mas el tornou antre dientes: canalha. Lhourenço adelantrou-se que nun eramos canalhas que tornariemos para trás, mas al menos que mos tratasse cun modos de giente.

- Astrebidos. Inda saco desta pistola!

Fugimos cun miedo, tropecemos. Oubimos tiros. Sentimos un baque. Nós dous nunca paremos, paremos nas fraldas, até altas horas, a spera. Nun tebimos coraige de aparecer an casa sien Lhourenço. Batimos a la jinela de casa de l Sr. Padre Mário! …

Pulls alredores yá nun se falaba noutra cousa. Todos cundanában l cabo Cepeda, fuorte, repentista a puntos que la própia mulhier del, pus yá era casado, sentiu hourror.

Baliu estar preso pa lo arrancar a bias d’ua bingança. Un béu de tragédia tombaba no assossegado lhugar i nos bezinos, a lhéugas de çtáncia: un béu de amargor de ampedernir, anregelaba.

A derretir aquel carambelo, de nada balien los raios de sol ardiente, teçtemunhando mudo nas alturas, daqueilha deçdita.

Un home muorto na raia. Eilhi drumiu, solo cun dezuito anhos staba un home feito. Deitado de borco na tierra mai que l buiu l sangre, parecie abraçá-la nun adius redadeiro i perdoná-le essa mancha deilha tener frunteiras. Ua cruç cun tabuleta reza eilhi solica: suidades de sous pais.

Dalgun tiempo apuis, passada la maré alta de l rebolhiço, todo tornou al que era. Cada cual cuntinou a pensar no sou: sue casa i família sou terrón i souto, parreira i carrasqueira. L cabo Cepeda fui suolto i mudado para outro posto bezino.

Los jornales nun dan fé dun causo antre mil defrentes de cada die, porque, an grandes parangonas, s’acupában de lhargos noticiários cula criaçon de l Mercado Quemun Ouropeu – la grande ambora daquel anho de 1956. L estudante Lhourenço, nun lie jornales. I nunca, yá más “los lerá”.

Porto 31 de Dezembro de 1961
José Francisco João Fernandes - Padre Zé

CANTA L CUCO NO MOLINICO

2010-07-02T13:19:00.003+01:00

A la purmeira hora de la manhana, nun die de San Juan, fuorças stranhas mos lhieban pul termo a cunsolar los sentidos no meio de canhas frechas, augueiras, freixos paredes i sonidos que son prumas.

Cicuiro a acordar

2010-07-02T13:07:00.001+01:00

cinco i meia de la manhana,binte seis de San Juan: hai sonidos que mos ampuntan de la cama.

De sol a sol

2010-06-28T00:15:00.000+01:00

Sacados de las eiras de la Cruç a ua çtáncia de cinquenta metros un de l outro, un die anteiro los aparta i ajunta.

Buonas nuites

i un santo spertar.

Ninetes

2010-06-22T22:56:00.000+01:00

Morában a la punta de baixo de l lhugar, na Pataca, decendientes de un de los antenados de La Marçuola, antre las cortinas de la Moraige i de l Rigueirino no camino bielho para San Martino. Más tarde, ende pul tiempo de la boda de Guiomar mudórun-se pa la casa adonde inda hoije bibe Tie Mariana junto a la Fuonte de Tie Rita.

Buonas nuites

i buonas lhonas

Liçon III

2010-06-13T19:24:00.001+01:00

cuntinuaçon

L lhugar staba dzerto. Habi-se zbaziado pal termo casando-se a la naturaleza na sinfonie de la lhuç.

Marie Lónsia antrou an casa sien topar an naide. Sintou-se al lhume adonde ardie un tiçon, ancarou los uolhos nas brasas e quedou-se pensatiba no scanho ambuolta na lhuç anubrinada. Por adonde andarien, naqueilhas horas, ls sous armanos i sobrinos: toda la família.

Tenie un sobrino, Ferradosa, tomado pul gusto de la caça.

Aquel die los caçadores fazírun un ouxeio, cumo dízen, a los lhobos i cun tanta suorte que lhougo l Ferradosa chimpou, d’ua bala certeira, la más guapa muostra daqueilhes montes: un forçudo lhobon. Cargóran-lo nun carro de bacas, mas estas assi que lo fareórun, nun lo querien trazer. Fui neçairo tapá-lo cun xaras i urzes, queiruolas i muita ramada para que las bacas nun çcunfiassen i nun se spantássen daquel muorto, que mesmo muorto amponie respeito i un miedo de aflorear los nérbios. Los animales puxórun cuontrafeitos, scorniando i scoucenhando mesmo cun los uolhos tapados cula jaqueta i l colete de l amo. Nun tenie más nada a la mano para l amansiar ls sentidos. Mal sentien por esso un filo de sangre durante ua lhégua a assinalar l camino.

Chegados al lhugar la besta-fiera quedou ancerrada nua casa solica no terreiro, no meio de l lhugar. Ferradosa rodrou dues bezes la chabe e fui-se. Tumbou l siléncio de la nuite no lhugar. Drumen assossegados ls sous moradores.

Mas, ende pulas dues de la manhana todo mundo fui nun repente spertado c'un oulear de delorido de cortar la respiraçon i anregelar l sangre. Dalguns caçadores alhebantórun-se a la jinela, agarrórun las spingardas i bíran passar al strelhumbre de las streilhas, ua lhoba einorme, ouleando, correndo, anraibada. Bírun-la sumir-se nas rugas streitas por adonde habie passado l carro i dar buoltas al terreiro, arrodeando la casa sola ua i muitas bezes, chamando an altos bózios zasperada, ancunsolable por aquel, que nun oubie más, nien arrespundie, de l abraço de la muorte!

Naide se astrebiu a lhebantar-se aqueilha nuite i nas que se seguírun passou l mesmo anquanto nun queimórun las sobras de l lhobo que aporbeitórun para fazer unto – un unto mui buono que cura l rematismo, cumo aquelha liçon fuorte cura las miolheiras dzriguladas … e até la de l Charca que al antrar an casa cuntento de la bida iba cantando l tró-la-ró-la-rá.

Las androlinas naqueilha hora roçában na baranda fugindo assustadas.

José F. Fernandes - Padre Zé

Porto 4 de Febreiro de 1962

Liçon II

2010-06-10T20:44:00.001+01:00

cuntinuaçon

A la hora marcada inda mui cedo cumparecírun los dous antes de clarear l die.

Ajoeilhórun-se nas lajas fries aguardando cun pacéncia l benir de la lhibardade.

L Sr. Abade alhá apareciu tamien mui ancapotado, mas sien grandes priessas.

Agarrou un desses lhibros bielhos de piel angurriada i de letras gordas an que los sés i los fés, los us i los bés se baralhaban, i, por el rezou, rezou, todo un saltério dun lhatin misterioso.

De quando an beç alhá spargie auga benta, nas rezas, para melhor sortir eifeito, para pegar: pus claro!

L zditoso par speraba dzapaçanciado que aqueilha cerimónia lharguíssema benisse a acabar; i muita admiraçon fazie de que para se casaren bastara un si i, para se çcasar nun chegaba la reza dun lhibro anteiro de eigreija i toda ua pila d’auga benta.

Eilha anrebulhada nun xal de estame tritaba de l friu que chubie las lajas húmedas, el sentie ua delor fuorte a atrabessar nos renhones, i ls zinolhos, adromecidos de stribar-se ora neste, ora naquel.

L Sr. Abade de la freguesie cuntinaba sério, sintado na cadeira de suola, no tabrado alto tocando los lábios, segredando i çpejando caldeiricas d’auga benta pa riba i pa los lhados. Eilhes mirában-lo assujeitados, perguntadores.

Nun habie modos de rumper aqueilha fuorça, aquel nuolo quinze anhos atado. Atar na eigreija nun ye pándiga ningua.

L sol yá daba pulas jinelas. Ls dous casados buscában ler nun sei l quei na cara de l Sr. Cura, sério, cumo la státua de Santo Amaro. Perscuitában-lo i percuitában-se na meditaçon, cun cerimónia.

Por fin, pregunta el birando-se:

- Dezi-me, Sr. Reberendo Abade, inda demora muito?

Ningua respuosta!

- Quanto tiempo falta para acabar, Sr. Abade?

- Siléncio.

De quando na beç l heissope bolába-les na cabeça scurrindo auga frie.

- Sr. Reberendo Abade, suplicórun dambos a dous, acabai cun esto.

- Por fabor!

- Nun puodo más. Ui! Quando acabará, parece que me muorro.

Senténcia de l belhico: - acabará efetibamiente lhougo que un de ls dous eiqui presentes se morrrir, anton l outro queda çcasado “dzanforcado” i quite para se casar sigunda beç.

- Nanja you!

Alhebantórun-se ls dous dun poulo: - Nien you! – Bá, bá, aton?

- Aton you nun bos abisei no amprecípio? Sereis bós ls purmeiros casados a dar scándalo na nuossa tierra i nestes alredores, adonde ningun casado dou nunca que falar, nien un cachico assi?

I apuntaba l branco de la unha.

Se nun podeis bibir juntos bibi apartados de casa, mas siempre home i tie, siempre casados “anforcados” até morrer, rostro alhebantado i cuncéncia lhimpa.

Por esso diç l pobo: “antes que te cases mira l que fazes”.

Saliran dambos a dous de la eigreija, dezírun adius a la francesa, birando las cuostas partírun ls farrapos i las bidas i spurmentórun nunca más se topar no camino. Era ua destas guapas manhanas de eimbierno nas biesperas de la primabera sien aire, de gelada branca i l friu seco, nubrina adelgaçada. Cada un de los dous tornou adreito a la sua antiga casa, pulas caleijas más scónsias adonde las carriças chilriában, cuntentas, buscando ls sítios pa los sous niales.

ten cuntinuaçon

José F. Fernandes - Padre Zé
Porto 4 de Febreiro de 1962

Liçon

2010-06-09T11:43:00.003+01:00

Casar-se, diç l pobo, ye “anforcar-se”.

Habie muitos anhos que Manuol Charca i Marie Lonsia bibien “anforcados”.

Nun tenien filhos i l amor i amisade dun pul outro longe de crecer arrefeciu cul somar de ls anhos i l cair de la niebe de ls eimbiernos.

Arresulbírun por esso nun triste die “dzanforcar-se”, quedar libres i quites. Cumparecírun, sigun se diç, delantre de l reberendo Senhor Abade Cura (assi l dízen)! I cumo hai giente capaç de todo tamien you sou capaç de acraditar, mas zde yá declaro que nun pongo la mano no lhume!

- Sr. Reberendo Abade, nós benimos eiqui … si! … ou melhor. You nun sei se me splico. L Sr. Reberendo Abade, nun sei se dá fé … ye que mos casestes. Pus nós benimos … si …

- Nós benimos, splicou rexerta la cumpanheira, para que l Senhor Abade assi cumo mos casestes mos tornassedes agora a çcasar. Nun podemos bibir juntos …

- Nien más un die! Nun mos damos bien … yá bimos que nun fumos feitos un pal outro!

Admiraçon de l reberendo belhico de pelo branco que iba para quarenta anhos pastoreaba aquel lhugar de Alhá-Santo i nunca l habie passado un causo semelhante.

- Anton los mius amigos querien agora çcasar-se, apuis de tantos anhos que bibírun felizes? Santo Dius, que eideias tuortas bos chubírun a la cabeça! Pus nunca oubistes dezir que aquilho que Dius ajuntou, l home nun aparta? Casar-se ye “anforcar-se”! unir-se para siempre!

- Diç l Sr. Abade: anhos felizes? Amargosos cumo la fiel de l mundo! Solo me tem relado la bida i lhebado a las puortas de la perdiçon este home, de cabeça zmiolhada.

- Calha-te xodairo! Tonta! Se nun stubisse eiqui l Sr. Abade, you te darie ansinarie.

- Bien bedes Sr. Reberendo Cura que nun podemos bibir juntos. Çcasai-mos quanto antes pul amor de Dius i de quien alhá teneis, por fabor de las buossa almas.

- Sr. Sr. Reberendo Abade dai l dito por nun dito i l feito por nun feito!

- Nun puodo!

- Cumo? Nun fui Buossa Reberendíssima que mos anuolou yá alhá ban quinze anhos? Passo más mal dado de la mie bida! Quien ata tamien dzata. Ora ua cumo essa.

- Mira Manuol, tu nun passas d’ua cabeça uoca, un bazbaque, un simplico que nien sequiera antendes para que beniste a este mundo; todo esto porque an pequeino nun fuste a la doutrina cumo debies. Mas tous pais ye que tebírun la culpa; i tu; Marie Lonsia, outro tanto.

Ide para casa, ganhai tino i pacéncia i nun torneis acá cun essas boubadas a dzanquemodar. Solo assi bos puodo cumbencir.

Por ua temporada las cousas cumponírun-se mas apuis bulbírun al mesmo. Tanto maçórun l Reberendo Abade que este se arresulbiu a dá-le ua liçon pimpona, de beras i nó de palabras.

- Beni acá no die tal que you bos çcasarei na eigreija. Bou-bos a dzatar.

ten cuntinuaçon

José F. Fernandes - Padre Zé
Porto 4 de Febreiro de 1962

Monteiros

2010-06-06T23:21:00.003+01:00

Morában a la punta de baixo de l lhugar, quaije a la antrada pa la caleija de los Uolmos de la Rodeira.

Nun stan puostos por orde de eidades porque tamien nun sei "ancarreirar" bien la família yá que a bien dezir solo cun Tiu Aldino ye que tube i tengo l prebileijo de falar i de tomar cunseilhos siempre que me arrimo a sue casa, bezina de la que me biu nacer, por sinal feita por el antes de ir para Angola nos anhos sessenta.

De la família de Tiu Zé, haberá biznietos i tataranietos, mas cumo stan todos para Fráncia... Tie Demetilde se ancargará desso no més d'Agosto.

Hai un par d'anhos, an Cicuiro, staba todo mundo de l lhugar acupado culas bandimas, you más andeble c'ua pruma nua airaçada, quando chega al terreiro un carro: Tiu Aldino! nun sfregante me puso no spital an Miranda.

L outro die an cumbersa diç assi el: "pus mira que de la maneira que stabas nun cuidei you que tornaries acá por tou pie."

Se calha fui l tiempo que bos "roubei" anton, l culpado por esso i alhá tenereis que me aturar dalgues bezes más quando mos birmos.

Buonas nuites

i buona suorte

A las áugas!!

2010-05-21T18:42:00.002+01:00

A las áugas, a las áugas, a las ááááugas!

Bai a correr giente apressiada naqueilha direçon bozeando a boca chena este grito.

- Miu Dius andará d’algua casa a arder? Pergunta-le d'adonde ben l fuogo!

Las bozes crecen de todos ls lhados, esparige-se, acorda ls bezinos de la mardomia de la séstia, cul rechino de l sol!

A las áugas, a las áugas!

Dezirie-se que l fuogo pegou de l cielo de l braseiro ampiedoso de l sol molestador que sorbiu las fuontes naquel fin de berano i parece querer calcinar ls que bíben na tierra i até, las piedras. Cumo eilhas chiçpan! Ls xeixos queiman! Arden las arenas!

Júlio secou ls rieiros; Agosto las fuontes; Setembro ls poços, rius i montes.

A las áugas, a las áugas, a las áugas!

No azul bacento, mesmo para acolhouca suobre ls montes, gordos bleinhos de fumo anobielhan-se no aire a modo de rocos einormes, medrando assustadores, ancarramelados.

Yá ancúbren l sol de anubrado negro. Las campanas tocan a rebate i las bozes de ls homes, ties i garotos, ambuolben-se al trompetear de l campanairo, chamando ls sous filhos.

Todos a las áugas! A las áugas que arden ls montes.

Cherrincában las puortas, chocálhan lhatas i caldeiros relhuzen ls filos afilados de las machadas.

Ls uolhos ansiantes craban-se no hourizonte adonde crece, abançando la scuridon i por baixo deilha retomba la boç de alerta.

A las áugas. Todos a las áugas! Al fuogo! Alhá, alhá se amostra l que puoden las chamas. A eilhas!

Mas quien eirá rejistir a la fuorça de las lhénguas burmeilhas que atiçadas de l aire, se anroscan nos Cousses, chubírun a la romarie nun abraço sfamiado, assucando un rastro de muorte desolaçon i negrura? Cumo l home se sinte pequeinho. Lhinha eirresistible de tragédia, essa que abança d’algeira, majestosa, cumo serpiente tenhida de cinta la raposa i las siete cores bibas, cuçpindo rábias fumegantes que apestan ls aires dun oulor agre atafanhante!

Eipopeia de l fuogo! Sublime i hourrible.

Quien l eirá a rejistir?

Cruzar ls braços, nó!

Ls de más coraige rebézan-se na lhuita de cortar trampos berdes. Cun essa arma fai-se un eisército an cordon que abança an lhinha, siempre cumpassiado çcargando golpes seguidos na munstruosa queluobra!

Lhuita de gigantes. Cobrada la espina eilha spurmenta inda alborear-se an retorcidos mas la cadena de galhas lhougo murchas i lhougo repuostas bai le apeando l ambibecer.

Coneilhos i lhiebres assustados saltan donde a donde la barranca i perden-se nas gorjas escuras, facinante, tragados de las chamas.

Mas quien tenerá ampeçado semelhante calamidade?

Hourroroso!

I se l aire rebolbendo la atirar suobre ls lhugares? Quien l scapará?

Homes amprudientes que jogan cul fuogo nestes meses an que arden las arenas i ls caminos solo merecien la forca naquel carbalho. Apunta!

Mirai cume se chiçca spetacular. Eilhi, ou no einfierno debie de se atar l respunsable.

A golpes de coraige, por fin, ls homes mangórun. Ningun faltou de cada casa naqueilha lhuita. Çpejou-se auga nos cepos a fumegar i ampeçou la pándiga de la busca al coneilho assado. Ua cuonta a más na bida a guardar de cada un.

A la tardechica outra beç las campanas i las bozes de las personas cháman:

A las áugas! A las áugas!

L fuogo i l aire, armanados, sacudida la mortalha de cinza, ambibecírun.

Yá naide ls adomina. Quatro lhugares an peligro.

Mas quien tenerá sido l chabasquito? Repergunta-se! Quien?

Dai-mos un caldeiron de azeite para ferber eiqui yá l creminoso.

Dezi quien fui.

Marmuriaba-se a boca pequeinha que Tiu Manuol Mangancha, pula manhana, habie feito lhume naquel sítio para tostar ua guelhada. Tornou a meio die cun eilha al ombro nuoba an fuolha, çcascada, dzampenada i donzel. Muitos l bírun a passar.

Ora Tiu Mangancha era un probe diabro sien tener adonde cair muorto que nada tenie de sou más que ua baca fraquita, ua perra sfameada i un palheiro terreiro para morrer ls trés. Amigos ninguns. Defesa solo la guelhada maldita i agora preciosa. Bibiu siempre solo. Amisades, nien cuntar cun eilhas. Probe de quien ye probe!

Dzarmado i einofensibo, axagado, acarreou más estas rábias a la caduca belheç.

Adonde se esconde? Que nun aparece?

Tiu Mangancha tubo la prudéncia ou l miedo de se saber zbiar.

Cunsuolo tamien saber que ningun de ls bezinos l atraiçonou.

Tiu Mangancha lie a menudo ls eibangeilhos, anquanto guardaba la baquita i se nun ls praticaba, al menos falaba neilhes.

Ls bezinos, al robés nun lien, ralos sabien ler, mas por cierto, ls soubírun praticar an parte, cuntentando-se de poner nel la lhéngua i nó la cuorda.

Que grande çcampado de hourrores nesses matagales! Un mapa negro!.. de hourrores!

An buona hora ls lhugares se salbórun, cousas, animales i personas nun passórun peligros! Mas l chiçcador, que se libre! De la sanha! Será rejado bibo nun caldeiron.

L bielho negou-se siempre, resguardando-se, ancolhindo ls ombros, nun deixou çcoser ls lábios: nun sei! Nun sei!

Juntos na zgrácia ls moradores de ls lhugares, mirando las touças ardidas, dantes chenas de fuorça, sentírun lhágrimas purmeiro, apuis aquemodórun-se i, de seguida arregalórun ls uolhos cobiçosos a las tierras znudas, negras, cinzentas.

Rumpírun las tierras para le sentir l coraçon a bater. I ampeçórun a amar la barriga de la tierra cun ánsias de bida.

Dai-mos bida nuoba – suspirában cul coraçon a bater fuorte.

Çcobierta dun suonho.

Caírun nel las purmeiras augas! Bieno l Outonho!

Ls lhabradores namorados i agoniados de l alberoto, atirórun al bientre de l stierco l trigo a manos chenas que lhougo acubrírun cun dedicaçon.

Á! Belheza i floracion. Las senaras fazírun óndias al aire, aquel aire que atiçou l fuogo. Esparige-se no aire un oulor a pan i un agarimo suable i fuorte.

Aton ls bruticos bezinos de las aldés pedien an gordas bozes eimocionadas que querien a Tiu Mangancha: querien lo ber i abraçar, beijar, agradecer a el que nunca tubo l alisar dun agarimo. I cumo paga querien le trazer ua cuba d’azeite para le dar, para que biba i coma i tenga salude i anhos de fartura i alegrie aquel que transformou un monte escuso, nua tulha de pan! Milagre! Milagre!

Feliç çcuido!

Ningun santo até eilhi se tie acordado.

José Francisco Fernandes – Padre Zé

10 de Janeiro de 1962

Nos Uolmos de la Rodeira

2010-05-19T21:38:00.001+01:00

Buonas nuites
i oubidos atentos

PEINHA REDONDA

2010-05-16T18:47:00.000+01:00

Hai uns dies atrás diç que adebírun a caminos. I si ye berdade: An dalguns sítios l camino parece un corta fogos de tan lhargo que l punírun. Mas you cumo andaba a pie, alhá me botei ribeiro abaixo: Molinico; Beia Grande; Funtaninas; Peinha Resgalguina; Molineira - á, la puonte stá partida, ls carros nun pássan alhá - i Peinha Redonda. A la ancruzelhada dou-me cun dous rebolos bien ne l meio (até parecie un desses redundeles modernos! que hai muito nas cidades, pa ls carros). Carai, agora stá bien a las bistas porque se chama assí.

Buonas tardes

i dar la beç a quien stá más acerca de ls rebolos

Migueles

2010-05-06T23:02:00.000+01:00

Morában no Bárrio Alto, antre l meio de l lhugar i la cortina de la Quinta. Al lado a la casa de morada, pegada, inda hoije stá ua de las más guapas i antigas portaladas de Cicuiro.
Muitos anhos la manténgades tie Eirene.

Buonas nuites
i buona sembra

La Mona l Maio III

2010-04-30T10:55:00.001+01:00

...cuntinuaçon...

Manhana cedo, bénen pa la ruga a spreitar.

- Mira! Alhá stá, alhá riba, no uolmo más alto! Era eilha cun muitas rendas, sbolaciando, al aire. Nas medidas, sien tirar nien poner, eigualaba a Zulmira. Ampeçórun a boziá-le:

- Ei! Á Mona de l Maio! Ei! Ls dous armanos adbertien-se, de beras, scuitando la sue própia boç. I tornában: - Mona! Á Mona de l Maio! Á garota! Que fazes ende? Bén acá para baixo. Toma! – Mandában-le un beijo nos dedos juntos! Mira! Nun quieres?

- Fazien-le ua perrada cula mano!. Íban i tornában.

- Anton nun oubes? Adius!

Passados dous dies, fizo-se la fiesta de N. Senhora de fin de Berano. Ls dançadores corrírun las puortas de las casas botando un lhaço para sacar smola, cumo dezien. Chegados a la de tie Andeza, que tenie l sou tiu eimigrado na Argentina, an atençon rezórun un padre Nosso para que tornasse de brebe i sacórun, ou ansacórun un alqueire.

Nas casas ricas beilában las “rosas” i la “bicha” cun castanhuolas, al redor de l alqueire aquegulhado i anramado i, saltában por fin, “l castielho”. Pul camino ponien l chapéu de fitas na cabeça de quien passaba para l deixar más lebe la jabeira i sacar ajudas.

Que guapo i antolhado chapéu, guapas gualdrapas i lhenços i ramos i fitas, abanando, quien ls anfitou? Que dedos milagrosos, cun tanta purfeiçon?

L tamboril, tocando, arrimou-se … donde a donde un stouro de foguete. Manolico cun letcidade no cuorpo, assigura-se bien cuntando ls stouros (que nun le rebenten na mano) çprende-se atrás de la canha. Que l’amporta la roupa nuoba i la armanica naquel die? Cuorre pulas paredes i ls telhados. Oustenta un manolho deilhas, pa ls subiotes de Natal que ha de fazer culas sues manos.

Esto si que ye fiesta.

Alhá riba, amouchada de rendas, jabeira de seda na mano, la mona de l Maio quedaba cuntenta solo de ber. Bie passar ambaixo la prociçon coudalosa, ls dançadores de castanhuolas, lhebando ls andores de la Senhora i de l Menino, balanciando cumpassos an óndias, quaije beilando. Alantre l pendon. No fecho la gaita de fuolhes, l home de la fraita i tamboril. Dançadores no sagrado! No fin de la funcion!

- Cuidado cun ls palos! Palo falhado, cabeça rachada – acunselhaba un dançador bielho de papo cheno.

- Tenei bós más cuidado culs pratos de arroç-doce que naide bos ls quebra. L remoque fizo saltar la risa i quando este acabou l sinal tenie ampeçado. Tiro-la-ta-ri-to-tin, tan! Dalgun más bielho relhembrando soudades, pedie permisson para rendir un dançador na parte por el sabida. Si que dantre las miles de cumbinaçones possibles, cada cual sabe la sue i solo la sue parte. Rábias de l diabo se iou cumprendo este androminar de palos que se cruzan i outros até se parten!

Naqueilha nuite, la mona cun grande nobidade de todos dzaparciu de l uolmo, misteriosamiente: saltou!

Soubo-se más tarde que fura roubada por uns moços angraciados perruchos de l lhugar bezino de Alhá-de-la-Touça.

Manolico i Zulmira, al ir a dá-le ls buonos dies de l questume dórun cula bara sola, tesa, sclamatiba.

Yá nun dezírun: “mona de l Maio” baixa parqui, mas si: áá!... á nina para donde fuste? Nun lhebórun a bien ls de Fuonte-Frie cumo nun podie deixar de ser, que ls moços de Alhá-de-la-Touça les roubássen la mona de l Maio. Era ua spéce de caçoada, fazendo pouco de l lhugar pul que las relaçones antre ls dous lhugares quedórun amonadas. Que mal l tenie feito? Quien scapaba cula mona de l Maio debie tener un sentimiento reles! Capaç de… si nun staba cierto, mas que fazer?

Ls de Alhá-de-la-Touça eran más, l lhugar más rico, más … çcarado, reles! Por fin la cuncéncia mordiu-les, passado meio anho, i tornórun a mandar la mona. Rota ambergonhada i feia que nien se deixou ber. Rodrou l tiempo. Agora todo çqueciu. I más. Passados binte anhos, bieno un moço de ls más guapos de Alhá-de-la-Touça i lhebou tamien a Zulmira an casamento cun grandes bodas i fiestas i las aquestumadas corridas de rosca. I más ua beç lhebórun la rosca tamien.

Manolico casou-se pouco aspuis para Spanha i deixou la tierra. “Probe tierra” malincólica antre uolmos i choupos, i ls brimaleiros debruçados a la borda dun ribeirico marmoriante, serpenteante, que solo esses nun se scápan i son siempre ls mesmos. Agora ls dous armanos, para dáren presentes un al outro i a ls sobrinos, precisian licenças.

Solo las almas quedórun juntas, nun se apartan, nun ténen frunteiras.

José Francisco Fernandes - Padre Zé

01 de Deziembre de 1961

La Mona l Maio II

2010-04-29T22:30:00.001+01:00

...cuntinuaçon...

L purmeiro lhaço al son de tamboril i gaita cantában assi:

Jasus miu, Jasus Cristo

Dius i home berdadeiro

Criador e redentor

Salbador de l mundo anteiro,

A Ti dedicamos

Este lhaço purmeiro

An nome de l Pai, amén

I de outros dous tamien.

Segui-se lhougo l “binte cinco de ruoda” i l “binte cinco abierto”, dous lhaços birils, decedidos capazes de cansar ls más pintados dançadores. Bieno apuis la “yerba”, lhaço pequeinho mas custoso an que ls guias precisian de muita i sabida ginástica, i de poular a sério para nun perder un pique. Scuita:

Se quieres que te segue la yerba

Trai-me la gadanha

Cula tue piedra

Para aguçar

Trai-me l carro

Pa l cargar

Que segada stá

Que segada stá.

Seguiran-se apuis outros cumo la “anramada” la “lhiebre”, la “carmela”, poema dedicado a la Birge, tan sublime cumo custoso, i al final “ls quatro oufícios”, oureginal i angraciado, pa ls garoticos ríren. Digo por fin, porque Tiu Tamboriteiro negou-se a acumpanhar “la pomienta”; alhá sabie porquei e mesmo l títalo nun çfraçaba!... i bonda home sério, fazírun-le la buntade. Acabou.

- Bamos-mos! Fizo Manolico.

- I la mona?

Zulmira, que an todo l tiempo nun çprendira ls uolhos de ls dançadores, tamien de la mona, muito menos, çpregou l pensamiento.

- La mona, quiero ber la “mona de l Maio”

- Nun podemos.

- Porquei?

- Agora ls dançadores stan cansados i ban a quemer las sardinas i l arroç-doce. Apuis de la meia-nuite, alboran la mona, para naide ber. Agora nun deixan.

- Aton bamos-mos.

Pul scuro de la nuite i al strelhumbre de las streilhas, Manolico iba assobiando i cantando ls lhaços que habie daprandido… la letra i música que las buoltas i piques esses!... quien atina cun eilhes?

... ten cuntinuaçon ...

José Francisco Fernandes - Padre Zé
01 de Deziembre de 1961

La Mona l Maio

2010-04-29T00:55:00.000+01:00

Manolico tenie ua armanica más nuoba que el tan guicha i tan alegre cumo l sol de Maio. Habie nacido an berdade naquel més quando la naturaleza se cubre de froles; más un boton a quien ponírun l nome einesquecible de Zulmira. Zulmira parecie querer dezir: mirai pal cielo, mas Manolico, para sentir satisfaçon bastaba mirar l rostro de la armana, morena de uolhos lhimpicos, quelor de café amuldorados an farta madeixa, rúbia, ancaracolado. Andaban juntos i, l más de las bezes morában… a ls burricos. Manolico fazie-se de burro i la armanica, de cabalheira, solo repetie: - “arre burrico, pal molinico”. Nun se sabe qual de ls dous más se adbertie. A bezes anraibában-se, ye natural i Zulmira fazie cara de mona cun uns uolhos!... Anton Manolico, chamaba-le a spicaçá-la, Mona de l Maio. Mira la Mona.

- Nun quiero saber, dezie eilha, i batie l pie.

Aquel nun quiero era dito cun tal assento que bien se bie que Zulmira tenie, ua catadura, buntade fuorte i quaije eirresistible. Quando dezie: quiero, querie mesmo! I era neçairo, a las bezes, para haber sossego respeitar la real gana de la Senhora D. Mona. Manuel, al cuntrairo, deixaba-se ir cun facelidade i pagaba-se solo, de le chamar pula ultima beç: mona! Mas a la cautela.

Cuntinaban anton, a brincar. Para esso bibien para esso eisistien. Mas al fin, eilha curjidosa, siempre quijo preguntar quien era essa “mona de l Maio”.

- Ua garotica que saliu de casa por ser mala. Mas houmildou-se i chorou tanto, tanto que quando tornou parecie feia. Eilha pormetiu ser buona, i outra beç se quedou guapa.

La armana sunrie.

- Agora, todos ls anhos ls dançadores l fázen ua fiesta i pónen-la an riba dun uolmo, para ser bista de toda la giente, la nina guapa, mona de l Maio.

- I quando fázen la fiesta?

- No fin de berano. Ls dançadores, yá se andan a ansaiar.

- I nós nun podemos ir a bé-los?

- Nun deixan. Solo na quinta de sardinas, quando “alboran” la “mona de l Maio”.

- Quien son ls dançadores?

- Ls moços!

- I quantos?

- Uito. Cuatro guias i cuatro peones. Forman assi meia dança, an dues carreiras. Ls guias alinhan, dun lhado i de l outro, nas puntas, i apuis un deilhes salta l “castielho”.

De nuite, al serano, oubírun-se ls dançadores ansaiando ls palos, picando ou cruzando, cunsante, nun andamiento cumpassiado, seco, marcial. Bulhie no sangre, i parecie que la “quinta de sardinas” nun más chegaba.

Bieno an fin. A la nuite, fizo-se l purmeiro ansaio pal pobo, a la lhuç de lampiones, no terreiro, al pie de la casa de l mardomo. Las mardomas, por dar las últimas demanos, an segredo a la mona de l Maio, nun aparcírun.

No purmeiro bleinho de giente, a la ruodra, bie-se Manolico cula armana a las carranchinas, cun todo l natural. Eilha cuntenta batie las pequeinhas palmas.

- Tate! Bai ampeçar.

... ten cuntinuaçon ...

José Francisco Fernandes - Padre Zé
01 de Deziembre de 1961

Miranda III

2010-04-25T00:39:00.001+01:00

... cuntinuaçon ...

Bamos, bejitar la cidade.
- Esta ye la famosa ruga de la Costanielha – apuntaba miu tiu que mos acumpanhou, aquel que trabalhaba na “repartiçon”.
Eiqui pára muita giente a admirar, giente granuda de Baixo, de ls lados de l Porto i Lisboua. Mirai eiqui reparai naqueilha figura na jinela, stais a ber? – andicaba un oulhal. A que s’asparece?
Baixando un cachico la boç spremiu l sentido: diç que stá a arrear l calhau… cuontra Spanha. Cousas de l tiempo! A bien dezir la ruga mira acuontra Spanha.
Rimos-mos.
Reparei no nome dessa ruga. Eilhi hai ua anscriçon amportante!
- Ruga de l Teniente Valadim!
- Nun será l de la Guarda republicana que stá no cumbento? – preguntou Ferraç!
- Ou de la Guarda Fiscal!
???
Paremos no lhargo de la Sé que se alhebantaba maciça a la nuossa frente, respeitosa cumo un dogma. L guia sclareciu-mos que staba cunstruida na stilo renacença posterio, i todos cuncurdemos.
L pai de Ferraç chamou inda la atençon para aqueilha piedra suolta no alto de la torre naciente. Eilhi stourou la bomba dun canhon, por esso la piedra recibe ourdenado.
Assi iou ganhasse cumo eilha.
Nessa mesma data ls spanholes derribórun l castielho mas ls nuossos amostrórun-se balientes porque, dezie l chefe que, solo, un muorto chegou para cuatro bibos.
Transpunimos l portal.
Ls nuossos uolhos quedórun presos dun zlumbramiento nunca bido ou sonhado.
La Sé, la magestosa Sé, que ralas bezes se anchiu, abriemos de drento, l lhaberinto de las nabes oupolentas, anleadas de quelunas.
De la croç lhatina, de l presbitério, manaba ua claréncia fuorte até se zbalir na meia lhuç.
- Mirai las figuras an relebo de l altar-mor, tantas i parecen bibas, parecen falar.
- Mirai ls cadeirales, l altar dourado, aqueilha pintura.
- L Nino Jasus de la Cartolica! Todo amproado!
Arrimei-me. Tantos faticos que el tem, jaquetas de bárias quelores i çapaticos.
- Tamien ganha denheiro por ser un de ls mandantes acá de la cidade! Ls nuossos parabienes. Adius Nino Jasus, queremos, melhor pedimos, que mandes anhos buonos cun muitos fruitos i poucas décimas i nun mandes raposas a ls studantes, cumo l passou eiqui al nuosso amigo! Adonde stá?
Al salir de la nabe central demos de repente culs uolhos na carranca de la Sé i más se me aclareou la lhembrança de Matracas sbugalhando lhágrimas nas cuostas de l coreto.
Aqueilha bision alumiou-me l mil passado sbcunciente cumo se l tubisse atrabessado un claron.
De berdade an nino iou tamien chorei muito.
La mie prima dezie cun cierta eironia que iou tenie l curaçon mui tienro. Miu primo falaba graciando que iou trazie l coraçon nas gorjas! Al pie de la boca.
Mie tie al robés: chora, chora más! Ai que cara tan guapa tu pones, pareces mesmo la “carranca de la Sé”.
Iou miraba-la mui admirado cuns uolhos de de bidro i paraba mesmo a pensar na carranca.
- Chora, chora más – pedie eilha. Hás de me anchir la concha de la mano. Que guapa carranca de la Sé! Eilha tornaba i ou porfiaba, calhando-me que nun le farie la buntade i era anton mesmo que la fazie.
A abaluar por aqueilha cabeçorra de mostrengo que sobrepassaba la puorta de antrada i se tuorce i geme, heircúlea, apertando ls musclos de la cara, para aguantar suobre l quegote todo l peso de l uorgano, uolhos zgazeados, caneiros apuntando de cada lhado de la penca, cara arrepuxada, feia catadura; a abaluar por eilha quien nun scunderie ua tremura de quaije hourror, buscando scunder-se? Fugir? Mudar?
Feia na berdade, mas l que admira ye que la afamada carranca no fin de cuontas mos prendiu i facinou más que l própiuo Nino Jasus de la Cartolica, de cara tierna i serena. Bai-se alhá cumprender la nuossa psicologie de garotos! Quien quejir que mos stude i faga un buono eisame.
Guapo-feio, carranca, á home dexa-mos salir. Dás licéncia?
Queremos inda bejitar ls sborrelhados de l paço de l bispo que tenie tantas jinelas, tantas cumo dies tem l anho.
Agora solo se amostran ls arcos agachados i piedras suoltas picadas – seinha eiloquente daqueilha que chamamos Miranda.
Las piedras drumen un suonho prefundo i la lhama presa aguarda, sonhando, ls clarins dun clarear i un sol de redençon.
Cierta manhana la princesa de l Douro acordou rebigorada, ancaminou-se eilhi, abaixo a la corriente de las augas, batiu cula bara de cundon i mandou:
- Alto! Senhor cabalheiro, abintureiro de las Spanhas, miu D. Quexote de triste figura, que nunca faziste nada de grande nestas andanças, pus queda sabendo que iou sou Dulcineia ancantada, la cidade mendinha, prisioneira de l Frezno, mas agora bou-te a tapar la passaige. Tu bás a defender la mie honra i l nome; quiero ser rainha.
Dzde aquel die la cidade mendinha partiu la muralha de cintura, que la sganaba cumo un colete de fuorças, abaixo al riu casou-se cul Douro, ampeçou ua bida nuoba tornando-se capital de la letecidade.
Carranca de la Sé nun chores más suobre l passado, baste de gemer! Busca alhá nesses sbarrulhos ua alma tan grande, tan sforciada cumo l tou cuorpo de gigante!
Hai quatrocientos anhos – dás fé? – quatrocientos cumpridos anhos carregas l peso dessa stória!
L sfuorço dun home nun se perde nos sbarrulhos!
Mas tu sós más que un home! Quien sós tu?
Hai quatrocientos anhos cuntemplas, de cada lhado, l Douro i l frezno a passar, scabando ls sous beneiros – las augueiras ou galatones de la tue solidon, de la tue lhibardade, an fin, i nuossa.
Tantas einergias gastas!
Tantos quilobátes que las augas i ls séclos arrastrórun al mar, nesse anterbalo. I tu quedeste! Decedido a cumprir un deber. Quedando oubindo chiar ls ratos i l bornaciegos, nesses canhos, aguantando aguardando que alguien benisse de nuobo dzferir sonidos nou tou uorgano – nesses “úrganos”.
Ye feia la tue máçcara de ébano i ye guapo l tou deber!
Einimitable tue pacéncia!
Lhougo quien sós tu? Feia, fuorte i famosa?
Fuorte! Famosa! E feia!
Ye guapo l tou deber!

José Francisco Fernandes – Padre Zé
01 de Febreiro de 1962

Miranda II

2010-04-23T19:30:00.001+01:00

... cuntinuaçon ...

Chegou l die de l nuosso eisame. Alhebantei-me cedo cuntento, sastifeito!

La camarada puso-se a camino de la cidade, angordando, cumo an dies de feira, ou romarie.

Al chegar al alto de la Cabreira que adomina la cidade, l praino quebrou-se a ls nuossos pies i aparciu un biston anteiramiente nuobo, suprendiente i horrible.

L termo a la squierda derretie-se an arribas fragosas, por adonde arrogaçaba l Douro, alhá no fondo, cumo serpiente scundida, nun lhaberinto de sbarrulhados.

A cachos sentie-se brabear an roncos xordos i arrastrados que parecien salir de andrento dua desorde, de ls fins de mundo.

Tube mesmo la impression que eilhi acabasse l mundo.

A la nuossa frente l casariu renacentista.

Houbo yá quien acumparasse Miranda a uns currales de cabras i oubeilhas. Na berdade, dou-le ua cierta rezon, até cierto punto, al robés: ye claro!

Cintada ancanhiçada an gordas muralhas bedes l ganado de casas brancas sestiar al sol de Julho; alhá no meio apruma-se graciosa, cumo Pastora sbelta, la Sé, de braços alhebantados.

Deste lhado ls sborrelhados respeitables de l castielho, lembram esses pastores gastos pulas grandes eimbernias, que duran seis meses, i de las calmarias de l berano.

Al transponer l galaton de antrada cortado d’ua strada croneira, nun me detube que nun birasse ls uolhos para baixo, pal abismo facinante, scabado a mius pies, aton çcubri, por marabilha ua fita sberdeada, de la quelor de l lhino, seco, dar la buolta ambaixo de l fraguedo para lhougo se scunder.

La serpiente parecie ancantar-me; se iou me deixasse rebolcar!...

Matracas abistou nesta borda un sguicho de escuma, mas era ua azeinha colmeada de palha.

Iou senti naqueilha agonie l coraçon apertado, de quei!

De ls abismos i fraguedos adonde habitan las aiglas, solo abistadas pulas cuostas?

Pul mapa iou cuincie l riu Douro cume ls dedos de la mano. Corrie ls sous afluentes cul andicador, sien tropieços até de uolhos cerrados.

Miedo de quei? De la cidade de muralhas majestosas i torreones?

Nun serie antes, de l eisame?

Si, a miu lhado na sala grande, l Ferraç, miu bezino, antrou a tremer, cumo de maleitas, tanto que la senhora eisaminadora tubo que dezir alto a dá-le coraige:

- Á rapaç, pul amor de Dius, deixa de abanar essa carteira; queda assossegado que, naide te bai a fazer mal; nun bengas acá cun miedos, que nun bamos a quemer a naide!

Senti alíbio i nun fui solo! Tantos eisames yá passei.

Matracas mal afertunado, durante la redaçon, arramou, por afelcidade la tinta na carteira, l que fizo aparcer la pauta de la proba, un grande mapa çcuincido, de algun país que inda nun eisiste.

Mal abinturada redaçon i mal abinturada geografie!

No anterbalo fumos a jogar para junto de l poço de l castielho.

Este tem al redor uas scaleiras an caracol para abaixar. Un apostou que habie de porbar l’auga fresquita, tan fonda que mal se bie.

Deixou cair ua piedra i tamien cuçpinha para remexer las óndias que fazíssen raiados.

Bistes? Alhá baixo, a relhuzir?

Matracas sintado no parapeito ditou un problema deficílimo a un liceísta de la sue eidade que falaba grabe por tener bibido siempre no meio de la cidade.

Apostou que naide de la cidade l resuolbe! Naide! Alboriou!

Trés bicas stan a correr para un chafariç. Ua inche-lo nua hora, outra an dues, i outra an trés, ua de cada beç. An quanto tiempo l anchirán se corríren juntas?

Tocou. L cuntíno bieno a crabear ls resultados a la puorta. Demos un poulo de alegrie, mas lhougo la retebimos para ler un risco brumeilho suobre l nome de Manuel Loureiro Matracas i alantre na nota de reprobaçon.

An atençon resulbimos nun botar foguetes cume staba cumbinado, esse die.

Matracas de aspeto brutico, mas no fondo buono coraçon, dixo que nun se amportaba, que podiemos atirar foguetes que fazíssemos la nuossa fiesta, que nun se sentirie oufendido.

Dues lhágrimas teimosas rodórun pula cara i apartou-se eimocionado para trás de l cureto. Nós zbiemos-mos a cumbinar. Que nó, que nun chiçcariemos foguetes.

Afinal an ningun treato ou soto habie daqueilha mercadorie i para más precisiaba d’ua licéncia.

- Arrebuçados, queremos arrebuçados!

... ten cuntinuaçon ...

Miranda

2010-04-20T22:52:00.001+01:00

- Anton, stás buono?

- Buono! I tu?

- Tamien sien nobidade!

- I la família, toda rija?

- Tamien, sien peligro: naide quier morrer.

- Baia! Baia! Pus anton más bal!

- I donde benes?

- Bengo de Miranda.

La cumbersa passou-se al pie de mi. Era la sigunda ou terceira beç que me acordaba de oubir falar na Miranda.

Puls modos debie tratar-se d’ua tierra amportante, eilhi para aqueilhes lhados.

Yá doutra feita tenie oubido amentar na “repartiçon de Miranda” adonde se falaba grabe ou fidalgo, al cuntrairo de la nuossa fala más simpres i por esso me parecie más natural!

- Gustaba de ber a Miranda! Dizen que ye cidade! Aposte que ye guapa!...

- Nien por esso! Si ua cidade, assi… más ou menos – atalhou miu tiu: - Tu yá biste la bila spanhola de Alcanhiças?

- Bi, no die de ls touros. Ten ua praça no meio i uas casas altas cun barandas i un pequeinho jardin a la antrada.

- Pus por ende yá sacas ua eideia! Miranda nien chega al rastro de Alcanhiças.

- Alcanhiças bal muito más – acrecentou mie tie. Ten moaige, quemércios i letecidade de nuite.

- Se tirarmos la sé a Miranda, aton tamien te dou rezon – amentou alguien de l munton. Mirai que la Sé ye cousa amportante. Aposto que nien Lisboua ou l Porto cuntan c’ua eigreija tás guapa!

- La Sé acá para mi ten ua cousa digna de aprécio, i que bal la pena: aqueilha carranca que sustén “ ls uorganos”.

- Á! “ls uorganos” cumo tocában bien quando, yá bai para uns anhos – dás fé Marie? – se ourganizou la prociçon de las Nuossas Senhoras de l cunceilho a pedir chuba. Oubírun-se trompetas por toda la cidade.

- Dou fé mui bien. Chobiu tanto que demoremos trés dies sien tornar, que nun se rumpie puls caminos.

- Mirai! Tanta era l’auga!

Esta cumbersa passou-se no cerrado de las Chanas nun die de l més de San Juan quando fumos a cargar feno! Miranda quedaba para aqueilhes lhados.

Ora iou cuincie cumo dixe, Alcanhiças. Truxe d’alhá muitos jornales cun retratos que espetei na cabeceira de la cama.

Truxe tapones feitos a máquina i lhatas screbidas, lhatas de escabeche i pelotas de caramelos presas nun eilástico!

Mas de Miranda… yá bieno dalgua cousa buona?

. Si, de Miranda

. benien las licéncias

. benien las pagadas

. i ls manifestos;

. benien las guias pa ls animales

. i las chapas pa ls carros;

. las suortes pa ls moços

. i las taxas i las cadernetas;

. benien ls acusos, cuntribuiçoes i multas;

. einfantários i transmissiones;

. benien ls registros: sisas, décimas;

. relaxes

. i ls juros de demora.

Moras que amargan que nien brunhos berdes. I l probe diabro que tebir l gusto de quemer pus que aguante.

Ora todo esto se pagaba puls uolhos de la cara!

Benie por fin la temida Guarda Republicana.

Ls garoticos rotos, al bé-la scundien-se an casa ou atrás de las saias de la mai.

Las ties parában cul feixe, ou de cántaro na mano, quando benien de la fuonte. Pasmaban-se a mirar sérias, al bé-la atrabessar ancuiraciada, relhuziente, oinipotiente.

L lhabrador no die marcado, chobisse, nebasse ou fazisse sol, tomaba de la burra arracionada arresignada cumpanheira de biaije, la buona jumenta que çpensaba licenças, i el alhá percorrie, a cabalho, trés, quatro léguas puxadas… até Miranda!

A la nuite regressaba culs bolsos bazios mas libre, libre para outra i semelhantes.

Lhieban-mos todo, mal mos deixan çton para mercar: ua camisa, ua bara de pardo, ua saca de guano; i uns lharegos quein chega a eilhes? Todo comen esses de Miranda, todo lhieba sumiço.

- Houbo un chabasco de lhéngua amprudiente i torpe que se astrebiu a falar cumo pensaba no jerico i lhougo quemiu pula maquila gorda: ye natural!

- Bien feita! – dezien-le ls outros – quien te manda ser fáto nien torpe. Cun esses de uolho guicho debe de se ousar respeito i eiducaçon. Se nó, cadena!

I la lhibardade ye tan guapa! Nó, que la lhibardade, senhor, ye mui guapa!

Miranda nó! Cumo poderie ser guapa ua cidade, cun mil habitantes, donde mos chega todo esto?

De Alcanhiças, al menos, para alhá de tapones i albarcas, de cacharros i caramelos chega-mos algo de buono! Las panas de cuntrabando, por eisemplo, trocadas por farrapos.

I ambuolto chegórun eideias abançadas cun demónio na barriga que apuis stouran na más sangrenta reboluçon, que las Spanhas nunca biran.

Dezien: quien quier çapatos, bai al çapateiro que los dá de graça. Quien quier ua jaqueta ou calças nuobas, eirá al alfaiate, ua reilha, al ferreiro, un remédio al boticário. Todos dan, todos trabalhan i naide paga. La Spanha bai a tornar-se un paraiso, portuguesitos!

Beni a ber! I quien quejir acender un cigarro na paç i assossego i amor de la família? Si, aton que baia para ls einfiernos de Belzebu que l deia lhume! Arrespundiran ls nuossos. Até esto mos chegaba de la assossegada bila de Alcanhiças, cuincida, na stória de ls purmeiros reis, puls tratados de paç. Até esto d’alhá mos benie (l que amostra que siempre para delantre ye l progresso).

De Miranda!... quei?

Un die chegou a la puorta de la scuola un fidalgote mui angurbatado, a cabalho, nua potra.

Nós jogábamos a la segurielha culs piones.

El sien se abaixar preguntou: -por favor, dizia-me onde fica a casa tal?

Matracas, mui lampeiro, sien perder la lhaçada arrespundiu, acenhando: - “par’ende”.

- Obrigado! Bocé anda aqui nesta scola?

- Ando!

- Na quarta classe?

- Si.

- E já encontrou alguma vez nos livros de leitura: “par’ende”?!!!

- Se soubisse nun bos tenie andicado! Estes de Miranda!... Solo mos trazen esto. Fizo zolar l pion i cuntinou jogando.

... ten cuntinuaçon ...

José Francisco Fernandes - Padre Zé

01 de Febreiro de 1962

Lhienda (Naso) - II

2010-04-20T20:52:00.004+01:00

La lhienda de l crestiano i de l mouro-Naso

2010-04-20T00:48:00.003+01:00

Pa la Romarie

2010-04-18T18:34:00.001+01:00

- Atón, siempre se bai al Naso.

- Inda stamos a ber. I tu?

- Para dezir la berdade, tamien inda nun sei. Bé-lo ende que si, ou bé-lo ende que nó!

- Mas a la feira bás?

- Percisaba de ir, percisaba, mas cume nun tengo nada para bender, nien denheiro para mercar… quedaremos assi! Se nó repara: die seis ye feira de ls burros (claro, salbo seia). Die siete, la de las bacas. Die uito, de la giente. Agora cume faltan las patacas!..

- Atón bai no die seis!...

- Nó, que nun tengo alhá parientes desses. Irei, se fur, no die uito; talbeç inda arrange quien me deia ua posta de bitela i, cun uns copos deiqui i deilhi … yá nun cuorre mal!

- Nesse causo, á! Home, fazemos sociedade i bamos juntos.

- Atón bamos!

Esta cumbersa passaba-se an fins de Agosto, nun lhugar assossegado de l nordeste stramuntano.

Naso ye nessas paraiges ua palabra, animadora, mui asparcida culs prémios que se dan a ls ninos por studar las liçones. Para muitos outros, Naso ye un acalmador cumo pírulas preciosas apuis dun grande trabalho de nuite. Acabórun las lhimpas, l cobradeiro de cabeças. Que çcanso!

Ir an romarie a la Senhora de l Naso, bejitar l santuairo, i oubir l sermon, ber las capielhas al redor i las nobidades de la feira, sintar-se de qualquiera maneira a la selombra dun freixo ou dun carbalho ou de l mesmo santuairo, sacar de la merenda: un galho assado, un chouriço mirandés, arregá-lo cun bino agre que mata la sede dun golo; oubir i admirar dues bandas a tocar al dzafio que até fazen poular i a la nuite l arraial cul foguetes de lhágrimas, que alumian léguas al redor; falar cun parientes de loinge, oubir i trocar las amboras; ber modas, gientes, questumes, todo esto que se chama romarie de l Naso pon las cabeças moças nun remolino boubo. I atrás de ls moços alhá ban tamien ls homes sérios i ls bielhos de pierna coxa a dous passos de l barranco. Montan na burra i, ála! A la romarie. La romarie sastifai todos ls gustos i eidades. Eilhes, ls romeiros bénen chegando de loinge, de todos ls lhados, cobiertos de puolo, de las grandes caminadas. Usan de todos ls stransportes, dzde l moderno altemoble a la camioneta de carga i al atrelado i dzde l bíblico jumento até l carro de S. Francisco, l más ousado que son ls dous pies.

- Á mai! deixai-me ir al arraial!

- Nun te deixo ir.

- Deixai-me ir a la fiesta.

- A la fiesta iremos juntos se tu fazires eisame.

Fui.

L Santuairo alhebanta-se nun sierro al abilado, boleado que ten de cumprido alguns quilontros por un meio más ou menos de lhargo i que, na direçón norte sul debide las freguesies de la Pruoba i Zenízio mirando a la esquierda ou poniente l lhugar de la Speciosa. Pruoba i Speciosa fazírun de l santuairo an tiempos idos, un meio de zangas, tebírun lhuitas sérias pula sue posse, pul que tubo que se meter la outeridade. No final la Pruoba por ser maior, siempre lhebou de bencida, mangou: stranportou l marron cinquenta metros para lhá de la eigreija i, cun grandes festanças eilhi mesmo celebrou la bitoriosa façanha, la maior de la stória de l bielho lhugar. Stou portanto nas marras de la Pruoba, na lhinha que debide las ourrietas de l Frezno i de l Angueira. De l punto más alto çcubre-se un panorama grandioso i respira-se un aire lebíssimo que parece benir de l cielo clarico i azul; perde-se la bista nos diçtantes hourizontes formados nas sierras afumadas i andçtintas. Mira al loinge las sierras de Nogueira, Bornes, Montesinho, i Culuebra na Spanha, cubierta de niebe.

Para cá deste grande redundel alhebantan-se cabeços arredundados, a ls quadros de monte i lhaboura scaldante, cun restrolhos amarelhentos, requeimados de l sol. Eiqui i eilhi, loinge nas ourrietas fondas, muntones de casório antre manhuços de berdura a dá-le selombra. L freixo, l carbalho i carrasco cobran la monotonie eiremítica de las praineiras i lhadeiras, adoçando-la de matizes bariantes, d’ua risica reserbada. Por esso la giente ye tamien reserbada. A norte a atrabessar, la sierra de la raia ou Cicuiro cula capelhica de la Senhora de la Lhuç no punto más alto, sobranceira a Leon.

Senhora de la Lhuç, Senhora de l Naso i Senhora de la Sierra son, no dezir de l pobo, trés armanas bien dadas d’antre las outras bezinas, al todo siete que cronan ls cabeços de la grande redundeza.

No die uito de Setembro las buonas armanas alegran-se i alegran ls montes de fiesta: cumbersan uas pa las outras cun lhágrimas relhuzientes de arraial.

Ye guapa esta armandade! I nós sous filhos bamos cun fé a assestir a la cumbersa santa de la tierra cul cielo, nesta nuite de santa Birge renacida.

- Yá dixe: nun bás al arraial. Solo te deixo ir a la fiesta, se fazires l eisame.

- Diç que l Sr. Bispo de Bregáncia quier acabar cul arraial no Naso.

- I nun farie nada mal. Andan ls garotos atrás de las canhas de ls foguetes i quantas bezes eilhes stouran nas manos, cume iou yá bi. Ten habido desordes nessa nuite de stróina, zgrácias que nun se scríben. Nun farie nada mal se acabasse.

- I que ten que ber l Sr. Bispo cul arraial. L pobo quier-se adebertir.

Apuis na fiesta, alhá haberá quein cumpra las sues promessas, dando buoltas de joeilhos, al redor de la eigreija cun alqueires de centeno a las cuostas. Hai missas, oufícios, cunfissiones a la farta. Mas deixai: N. Senhora quier alegrie. Deixai.

- Pus si, nesse antretiempo l arraial que dantes se fazie na nuite de siete para uito, passou a fazer-se de uito para nuobe.

- I cun esso?

- Perdiu muito!

- Outros dizen que nun perdiu nada!

- Seia cumo fur.

- Nun bás al arraial yá te dixe, mas solo a la fiesta.

Iou staba radiante, nesse die. Nien sentie l cansácio. Cun uito çtones atados no lhenço, no bolso falso de la jaqueta (nun ls baia a perder ou alguien inda me ls roube) dei buolta al terreiro, para ber las nobidades, la chamada feira de ls homes. Que antuolhadas ubas queloradas i brebas de Sendin eiqui nesta tienda. Naqueilha más alhá licores dourados; i la ruodra de la fertuna (de la zgrácia tantas bezes, cunsante)… Nó, debo poupar ls çtones pal die anteiro i inda oufrecer a la Senhora, i mercar arrebuçados i porbar de la balanciga i de las ubas i de ls licores. Han de chegar. Mas se iou jogasse naqueilha ruodra de la fertuna, aqueilha faquita de meia lhuna fazie-me proua… i jeito. Bou-me solo a arrimar.

Repican las campanas an fiesta. Entro no santuairo spacioso, antes que se incha de giente a ls ancuntrones. Lhougo a la puorta de l lhado squierdo, beio retratada la lhienda de l crestiano i de l mouro de que tantas bezes oubi falar an pequeinho. Alhá stá l moumetano façanhudo de cemitarra ira dreita.

Nos tiempos de la recunquista un mouro apresou un crestiano. Metiu-lo nua arca apeado de pies i manos; apuis puso-se a camino cun el nua carroça, para tierras de mourarie. L crestiano rezou, rezou muito i fizo promessas. Pormetiu fazer un santuairo a la Rainha Celeste, se l balisse i junto abrir un poço para matar la sede a ls pelegrinos. L mouro sintado na arca, drumiu-se, perdiu-se i, quando se acordou oubiu ua doce melodie de campanas dztantes, a tocar.

- Crestiano, pregunta alborotado – crestiano que stás andrento dessa arca, di-me se na tue tierra hai cincerros. Querie dezir campanas.

- Hai, si. I tocan tal i qual cumo estes.
- Pus se na tue tierra hai cincerros, an tue tierra antramos.

Trocórun-se ls papeles. L mouro passou deilhi por delantre a catibo de l crestiano, este alhebantou l santuairo naquel mesmo lhugar de las campanas i oubrigou l anfiel, scrabo, a abrir ua lhagona pa ls animales i abrir pa ls homes un poço tan fondo, trinta ou quarenta metros até achar auga. Auga fresquita na secura de l sierro, nunca se acaba: l copo a çton. Tantas bezes porbei deilha. Tantas bezes me sintei nos resguardos de l poço feitos de cantarie. Deilhi scuitei ls fados de la tentaçon, cantados al dzafio antre un nano de dous palmos a las cuostas dun latagon i un fadista, de ls lhados de Palaçuolo. Quaije todos acudien pul nano i acentuaban cun risicas ls sainetes de caçoada jogada dun pal outro. A ber cual de ls dous purmeiro se calha. Tamien gustaba de saber! Horas i horas a filo, al sonido dedelhado de guitarra ou gaita de beiços, ls trobadores de fado, pegan na deixa i a las bezes na rima, truocen a sou modo mas nun cobran.

Alhá stourou un foguete. Sal la prociçon. Las bandas de Chacim Eizeda ou Miranda marcan l andamento deboto, solo anterrumpido pul repetido restralhar de l fuogo. Gordos animales i béstias reles golfiadas de la pirotécnica nabegan arrastrados pul aire i la garotada, deiqui i deilhi, cuorre a siete pies a alcançar l troféu daqueilha zoologie de l aire, ye un de ls ancantos que abaixan crecendo i sbaziando fumo ls quales se sparrufan nas touças i se çfázen an papel quelorido. Buonos artistas esses bianenses.

L juntouro afoga, no santuairo i nas capielhas ye neçairo abrir camino, furar la sebe houmana para passar ou salir. Ls moços de lhugares defrentes repican las campanas a cuncurso. Quien eirá a ganhar?

Ls ritmos açuceden-se atressacan-se suobre bincen-se. Conheço mui bien quien tubo la honra de l sigundo lhugar. Usou an carreira todos ls ritmos, de preferéncia l binário, ambulbiu, trocou, fizo ls creciendos i ralintamientos, ls çcansos i ls rumpantes, fuortes i pianos, atirou pa ls aires ua chuba de harmonie a las óndias, ora assossegadas ora an tempestade, ora cun assento i a prepósito cume a marcar un pensamiento, l que espremie culas notas grabes na dreita anquanto cula squierda poulaba nun baile cuntento.

Antretanto ls mius uito çtones acá tlincan inda. Bou a fazer la fiesta. Darei dalguns a la Senhora an troca dun retrato para poner no chapéu para que, a la tardechica quando buolba todos puodan dezir: bem de l Naso. La Senhora quedará cuntenta. Tem l manto azul de tamanho más que natural todo acolchonado de notas lisas. Guarda nas tulhas muolas de pan: trigo i centeno. Tem propiedades rendosas: lhameiras, cortinas i lotes.

Mas an paga quanta alegrie i abundáncia çtribui puls sous filhos desta region stramuntana. Léguas i léguas al redor, até na Spanha, quien nun conhece la Senhora de l Naso? Quien nun tem un retrato puosto a la cabeceira. Eilha ye médica de ls alredores, adonde outro nun hai nun raio de bárias léguas ye adbogada i rainha nuossa. Cuntenta-se tan solo cula gratidon de ls sous filhos, alguas smolas i debuçones manada fé no çcutida ( mas talbeç nien siempre sclarecida) dun pobo houmilde, dun pobo sufredor i buono que La i tembra cun afeto filial.

Adeus Senhora de l Naso, se tubir salude, pal anho tornarei.

José Francisco Fernandes – Padre Zé

Porto, 9 de Dezembre de 1961

L Galhinácio de Matracas

2010-04-15T16:36:00.000+01:00

Senhor Pursor, nós beniemos a pedir licença para l oufrecer un galho an die de “deimingo gordo”. Era l questume de todos. L Senhor Pursor marmurou un: “nó, oubrigado” que nós traduzimos cumo un si. No “deimingo gordo” pula manhana, stábamos todos al pie de la scuola. Que cunsuolo! Ls lhibros nesse die nun pesaban i iou quaije me preguntaba se nun me tenerie anganhado antrando na sala sien cerrona al ombro. Nun me anganhei, nó. Matracas, eixecutor, yá eilhi staba a miu lhado a pedir-me l denheiro para acabar de pagar. Será neçairo cuntan que iou tenie l oufício de tesoureiro, ua spéce de menistro de las finanças aquel estudante.

Na chamada Moral ou Euducaçón Cíbica studórun-se ls menistérios. A mi tocou-me la pasta de las finanças. L galho staba anfitado pulas nuossas cumpanheiras, a primor, nó propiamente na casa de Matracas, mas acerca dun cabanhal, anriba d’ua padiola cubierta de rendas, lhaços, fitas. Faltaba mercar arrebuçados i stouretes para aquilho ser de arrebenta i nun quedar atrás de ls anhos atrasiados. Matracas alhá se ancargou de todo i nun perdiu. Corrimos l lhugar cume an prociçón, cul galho na padiola, pal Sr. Pursor. “Bombas” stourórun de las paredes i altos, dun i doutro lhado, cun grandes bózios. Gastou-se nesto toda la manhana, sien priessas. Priessas naqueilha eidade? Para quei se la bida era tan cumprida! Cheguemos por fin a la scuola. L Sr. Pursor aguardaba-mos cuntento. Mandou çtribuir bolhos i arrebuçados i, nun me acordo bien, mas se nun me anganho, tamien licores. Quedaba-le caro. Iou guardei dous bolhos para mius armanicos i para maizica i chuchei dalguns arrebuçados cun gusto. Estes eran melhores que ls outros que mos daba aqueilha “nina de ls cinco uolhos” ou “santa luzia” que nós por fin çurripiemos i scundimos nua frincha. Eideia de Matracas. Hoije, nó, l Sr. Pursor staba quaise a rir, mas siempre mercedor i senhor de l sou lhugar.

Ampeçórun las trobas. Nabiças zdobrou un capacete de papel que spetou na cabeça até l quegote i puso-se a ancarreirar bersos i más bersos “àquelas penas bonitas, áquela crista bermelha, àquelas prumas douradas aquelas esporas de cabalheiros, etc., etc.

Por sue beç saliu-se Matracas, repentista i declamou repimponado un amprobiso de la sue cabeça i de l momento:

Este galo galharóç

Tem patas de retrós

Quando bai para o polheiro

Bai cantando para bós

Cantando – eimendei iou, cun palabras brandas, mas el ye que botou ua risa restralhada pul realismo einédito, ou melhor surrealismo anbersando un outro berbo que ampeça no mesmo sonido i que la decéncia i l respeito nun deixa que seia eiqui puosto. Arrematando: l galho de Matracas que nunca poderie dar uobos, darie qualquiera cousa menos poética cume sustantibos amprudientes. Andábamos an gramática a daprander ls graus i el tubo la feliç suorte de lhebar muita reguada de calcer ou seian bolhos para topar algua cousa neilhes. Brabo Matracas, brabíssimo. Çculpa que te diga: siempre saliste un brutico. Pus até mereciste ua cuonta i quedar na stória de ls galhinácios.

L galho nun iba cantando mas cagando.

José Francisco Fernandes – Padre Zé

26/11/1962

Raia

2010-04-13T20:40:00.001+01:00

Alcídio Simprício Terrón Madureira, ou solo Madureira, era naquel tiempo un guarda fiscal de sous binte siete anhos guichos i mimosos. Usaba un bigotico de acento cincunflexo que abrie todo quando Terrón Madureira se arreganhaba a rir cumo un lhonas perdido. Tenie grácia l pándigo de l madureira.

Naquel tiempo quemandaba la caseta ou Quartel de la Raia un sigundo cabo que daba pul nome de Demingos Brandão, home sério de spessa bigoteira, antradote de eidade, dreito, statura mediana. Dambos eran quelorados. L cabo, daba sustento a ua grande família: tenie que anchir muitas bocas sien fondo que nun le dában tiempo a perder-se an cumbersas mofosas. A las bezes bie-se i deseaba-se. Botaba l serbício i andicaçones a prepósito, scalaba la patrulha: cumprie i ála, para casa. De passaige siempre, mas, botaba un dito sentencioso, ua grácia, un saludo i olé! Tenie an buona medida, cumo chefe, l don de la lei cuncenciosa. Era l que se chama un home de questumes, trabalhador, sien priessas, fino, abisado i respeitador i, a bien dezir tamien, senhor de l sou nariç i dar-se al respeito a toda la giente. Era bé-lo a passar a camino de la sue tierra, sítio adonde bibie, nó ralas bezes armado cun dues fogaças para matar la fome al ganado de filhos. Alhá bai l Sr. Demingos Brandão, cabo de la guarda fiscal.

Alcídio Simprício Terrón Madureira, si, na squina cuntraira, quedaba no quartel de plantón a ber las horas a passar?! Esso quedaba mas era la selombra del. Mal l cabo dzaparcie na lhomba, Madureira daba dous poulos, anfilaba l capote i toca para casa, noutro lhugar más loinge. Antes, tenie todo l cuidado de ancerrar bien las pitas que ls guardas tenien juntos i nun se çquecie de cuntar ls uobos para ua frejolada: pensaba antón, an quantos uobos habie tirado na raia.

Ei bai el a camino. Pie lebe galgueba l camino an meia hora, inda l cabo nun habie feito metade, yá l praça pisaba la soleira de la puorta i çfechaba ua graçola a quien purmeiro bisse ou fusse la tie ou la garota, ua pequerruchuca dzanquieta que inda andaba de gatas.

Buonos tiempos aqueilhes, poucas canseiras!

Meia fogaça de pán, por die, era más que bastante para andar alegre i tirar inda fuorças para, de nuite a la ida i benida, cantar puls caminos. Assi bencie l miedo que cunfessaba, agabando-se, nunca l tener bido.

- miedo de quei? De las buostas paradas? De la cruja ou bornaciego? De l semitério, de ls muortos? Iou? Nien de ls bibos!

Solo tengo miedo que me falte la fogaça i uns tragos de augardiente de manhana, pal desaiuno, i a las bezes l friu. Nó que eilhes ruoben.

Ye cierto que naqueilhas paraiges rondaban lhobos i estes storbeiros, medruncos de die, que até se scápan de ls berreios dun nino – cobardos – naqueilhas horas de la nuite, pulas ancruzelhadas, podien traer ua surpresa mui pouco agradable.

Storbeiros digo i brincalhones: si, porque la nuite fui feita por Dius, percisamente, pal lhobo se adbertir de qualquiera maneira i, cumo criatura que nun tem lhugar al sol, gozar al menos, a la lhuç de las streilhas, la sue lhibardade.

Parecen dues streilhas ls sous uolhos: i gela tanto! Aquel mirar. Toma de surpresa l caminante i acumpanha-lo a ua cierta lunjura, ora al lhado cumo un perro, ora atrás (óstias!) ora delantre. A las bezes dá-le la tuntura de parar, sintar-se no meio de l camino arreganhando la bocarra, cumo ua fóia, amostrando la dentuça afilada adonde sálen ls caneiros cumo facas de aço, relhamposas.

Coraige! Nesses sfregante nun bireis cuostas.

Aguantai-bos. Benci l miedo cun outro maior bien einebitable que serie l de fugir. Nien l aticeis. Amostrai solo que teneis sangre friu i pacéncia, mirai-lo de frente i boziai, até que sue real senhoria, juiç de la nuite, se resuolba a dzampedir la passaige l que fai cun aires de caçoada i bagaroso… que cuntrasta cun ls buossos nérbios todos an feixe, cumo nun feixe teneis pelos – assi cunfessaba Madureira i ye berdadeiro.

- Mas tu biste-lo?

- Más que ua beç: fareou-me i acumpanhou-me cume un perro de guarda. No purmeiro ramal, pouco sastifeito, anojado de la cumpanha, tube cuidado de l eibitar zbiando-me a la dreita pul camino que lhieba al lhugar de l nuosso cabo. Desse staba iou siguro que naqueilha hora drumie cume un animal. Atrabessei l lhugar julgando-me çafo. Mas de l outro lhado l animalaço torna-me a farear, eilhi al salir d’uas huortas. Berdade berdadeira, senti uns arrepelos cumo queluobras passar-me de alto a baixo. Se eilhi tebisse ua arma! Tenie-la deixado no quartel para que nun me pesasse. Mas apuis senti la falta de peso. Cun todo l lhobo ye cobardo i solo ataca ls más cobardos que el. Senti bien ganas de tornar para trás, senti, mas atón…

Esta cumbersa chegou a ls oubidos de l cabo.

- Á si! Pus deixa star, miu Madureira, que quien te bai a acaçar sou iou! Mas apuis pensou melhor: - Quedará zgraciado, probe diabo! Melhor deixá-lo. Tu nada biste, nada sabes.

Esta agora a tirar-le la meia fogaça de cada die.

Yá sabemos que Demingos Brandão gastaba dues fogaças bien pesadas. – I gustabas tu Brandão que alguien te salisse a camino i te las roubasse?

- Nun bi, tamien nun sei. Mas se l apanho cula mano no saco. Deilhi an delantre cuntentaba-se a acunselhar an giral: tino i muito tino, tento na miolheira porque… i nun adelantraba más.

Muito tento na bola tebimos nés todos, miu cabo – remorcou a retrucar l fala barato de Madureira – nós somos serbidores de l Stado ye bien que se saiba. Rica bida esta, cuntinou el palrando solo, passar l die sintado na sierra, a ber atrabessar las fromigas i ls cuntrabandistas gelados de miedo nos palheiros.

Naqueilha madrugada, Alcídio Simprício Terrón Madureira alhebantou-se al purmeiro cantar de l galho para tornar al quartel. Caminou rés-bés al lhado de la raia, por atalhos cuincidos, batendo l tacón. A un momentico parou afinando l oubido. Pareciu scuitar un sonido baixico nas touças i nun se anganhou. Cosiu-se culas urzeiras, parou la respiraçón i puso-se a spreita. Que será? Que nun será? Nisto oubiu algo loinge bozes de giente. Eran eilhes: ls cuntrabandistas. Lhougo eilhes. Se fussen fromigas. Que lhembráncia tebiran de se atrabessar no camino, i lhougo nas mies barbas… cun tanta lhargueza parende!... ouserba melhor i nota an purmeiro dous búltios de personas abançar de la touça guardando ua junta de buis. Un de ls homes torna atrás i salen más dous cun nuoba junta, outra i outra. Al todo quatro homes i quatro juntas de bacas. Parórun. Houbo un cunseilho brebe an boç baixa, a rematar l plano. Que fazer?

Nun clarón, Madureira androminou l sou.

Manos a la obra. Al menos un susto han de lhebar, para que saiban, dzabergonhados! De antre nós alguien tenerá que fugir. Apuso-se i ampeça bozeando: - Guardas, guardas eiqui! Á binte siete anda depriessa que tenemos taluda! Muda de boç i direçón: - Yá bou ende, yá bou miu cabo. – Á nobenta i seis pega tu dende. Agarra, agarra, á trinta i trés agarra. Nuoba boç, outro modo de falar noutra direçón: - Ende, ende, pega pega, nun ls deixes scapar. Á trinta i trés, á nobenta i seis cuorre atrás, binte siete. Á tratantes se ls apanho. Mira que scápan, cuorre, cuorre, apanha, apanha. Nun ls deixes, nun lhargues. Un quelóquio. A fazer baile, “Fala Barato” balie un squadrón. Para oumentar l resultado puso cantabouços a rebolcos na barreira. Ls retombos fantásticos acordaban la solidón de la nuite.

Alcídio Simprício Terrón Madureira quedou amo solico de l termo i de la boiada. Cum miedo de un cuontra ataque tocou las bacas apressiado nun sfregante puls touçones que solo el cuincie até de uolhos cerrados.

Culas demoras, clareou l die i nesse antretiempo chega l cabo Brandão al quartel i achou-lo sien naide.

Batiu a la puorta, berreou, dzatinou. Nada, l plantón habie deixado l posto solo.

- Pus miu guapo Madureira desta beç quedas sien pan que te zgrácio. L cabo a dezir esto, cincerico i Madureira arrebantá-le a ls uolhos, çaçamelando cula rica presa que nien l quartel tenie adonde la guardar. Bacas nun son pitas. Demingos Brandão arregalou ls uolhos coçou l bigote amboçou de boca abierta.

Pus claro, miu cabo. Atón achábades guapo un guarda cume iou, drumir repimpado na cama amerosa, rapaç nuobo eiqui no quartel i estes marmanjos destes cuntrabandistas a pisar na raia, para mos dar nas bentas. A mi? Nas bentas lhebórun eilhes! I fizo rir l sou cabo i quantos scuitórun. Screbiu-se l auto de apreensón i de la justeficaçón de serbício para çtino de la legalidade. Antrórun alguas crouas no bolso cul nome de eimelumentos. Mas este promenor ye claro nun cuntaba quando, cun grande stardalhaço l praça de la Caseta de la Raia Alcídio Simprício Terrón Madureira gababa las sues façanhas i las siete partidas que nunca fizo. L sigundo cabo Demingos Brandão, por buonos serbícios prestados a la Fazienda, fui promobido a purmeiro i an pouco tiempo reformado cun buona fuolha. Madureira al cuntrairo nunca saliu de marcar passo cume suldado de la guarda i dezie muitas bezes: naquel tiempo l cabo Brandão gastaba dues fogaças de pan por die i, iou fazie la fiesta cun meia. Agora el reformou-se, dou amprego a la famíla i chega-le meia i sou iou que gasto dues i nun me remedeio.

Beio-me para sacar ls pies de la lhama. I á! Marabilha quando me sinto assossegado i quando stou de plantón. Eiqui se ganha i eiqui se sume. Cume las bidas se demudan.

José Francisco Fernandes - Padre Zé

Porto, 17 de Deziembre de 1961

L Tonto

2010-04-11T18:59:00.001+01:00

Alhá ben Tiu Leandro Calhau, tremelicando, cumponendo l sou caiato. Pies çcalços anchados, las roupas sfarrapadas amostran bien que nel secoran hai muito ls gustos de bibir. Las greinhas brancas an beneiro no quegote dán le ua parcença d’ua eidade abançada quando na berdade Tiu Leandro mal ampeça a baixar la cuosta … de la bida.

La garotada parou de pinotear, de repente i ampeçou a segredar: - L tonto! Mira l tonto, l tonto! …

Tiu Leandro Calhau sintou-se nun cepo arredado de l mundo moço que le parecie un suonho a léguas i eirreal. Sorbiu ua malga de caldo que l apresentou al pie de la puorta Tie Cacilda i retomou l sou camino an frente.

- Mira l tonto! L tonto. La garotada seguie alhebantando la boç, atrás del. Tie Cacilda nun cunsegui quedar quieta i ralhou cun boç de mando:

- Garotos, que pouca bergonha? Nun sabeis tener respeito? Canalha? Malcriados!

Tiu Calhau dzaparciu na rebuolta i la garotada cuntinou no dibertimiento, a jogar l “caldeirico”, cumo antes! Cunsistie este jogo an poner ua guelhada no suolo i atirá-le cun outra i acertar. Quien fazisse resbalar esta sigunda más loinge, salie ganhador. An beç d’ua guelhada tamien podie ser ua caiata. I este era l causo.

Manuel Lé apartou-se de ls outros i chegou al pie de Tie Cacilda que questuraba a la soleira de la puorta. Eilha chena de bundade aporbeitou la oucasion para dar abisos:

- Para outra beç tomai fé, nun debeis de bos meter culs bielhos! I menos cun Tiu Calhau … el nun ye tonto, mas un home que muito sufriu!

I ampeçou a cuntar la cuonta.

An pouco rato la garotada se fui arrimando. Fazíran ruoda: uns de pie, outros sintados nos carcanhales, spinduraban-se ls beiços.

Tiu Antonho Juan, un bielho que eilhi habie acaçado l sol de la tarde, spechucou la mimória de la buona senhora, lembrando alguas passaiges. L Passado i l Presente falando al Feturo.

Tiu Leandro Calhau era un home de negócio, home bastante sério, feirante que andaba de tierra an tierra a bender cargas i a trocar centeno! Cun dues mulas, ála! Habie-se apegado a todo cunsante l tiempo. Bieno a necitar de denheiro i nun tubo melhor maneira de arranjá-lo, se nó trocando las mulas por dous burros balientes i recebie an pagas inda ua gorda maquila. Mas no die que fui a spurmentar ls jumentos, estes nun dóran, cume speraba, debida cuonta de l recado. atrancado no camino antre lhamas i silbas, Tiu Calhau dzasperou. Sentiu l sangre chubir a la cabeça, aguemitando pulas gorjas pulgas i carbalhos.

Quedou cume l cemacre!

Jurou i tresjurou que habie sido anganhado pul Granjo (assi se chamaba l parceiro de la troca). Aquel bandido! I que, ou se derramarie l cuntrato ou antón … Tán cierto cume iou ser Calhau … Eiqui ou se derrama ou tenemos-las putas. Bai a saber cun quien trata, bardino, traste, mala rés. I outros nomes assi.

Ralhoran ls dous, deziran quelobras i lhagartos i tropas i farrapos. Pintoran l diabo no lhugar. Mas l Granjo nun tornou atrás.

- Pus deixa star que …

Deilhi por delantre nunca más se faloran. Quedoran einemigos i cada cual seguie la sue bida. Tiu Calhau bendiu ls burros i mercou bacas. I deixou l negócio porque la cousa nun andaba.

L cielo habie l dado ua filha adorable la bundosa Malgarida que de pequeinha se fizo boieira, passando la bida pul termo, respirando l aire fresco que l trazie la cara quelorada.

Era manhana de la Ascençón quando se solta la “fuolha”. Bien sabeis que hai dues manos de arada, ua pa ls anhos pares i outra pa ls nones. Naquel anho de 1928 fabricaba-se la mano dreita para lhados de las Chanas i parlhi nun se podien lhebar ls animales até l die de la Ascençón. Nesse die soltou-se aton la “fuolha” ou couto cume l chaman. Repican-se las campanas, de manhana cedo, i todos ls boieiros, a l çpique, abriran la loija de ls animales, para chegar purmeiro. La pequeinha Malgarida acordou un cachico tarde. Espargie-se yá no aire ua música de sonidos de squilas i bozes de boieiros, ambuoltos cun rigaleijos. Passaban muntones cun fatos de deimingo pal termo de l couto. Malgarida, atrasiada, pegou l fardel. Chegou a la loija, puso la mano na aldraba de palo mas lhougo soltou un grito de susto, capaç de regelar la alma!

Hourrible! Un estiraçado no cabanhal, cobierto de ramalhos berdes. Arreculou tembrando i chamando por ajudas. Acudiu giente. Arrimoran-se. Nun hai anganho! L Granjo staba muorto cun seinhas no quegote.

- Acudi! Acudi! Matoran a Granjo. Tiu Calhau fui de ls purmeiros a chegar i a ber.

- Que galdromada agora esta! I lhougo al pie de la mie casa siempre se amanha cada ua! Creciu l ajuntamiento. Las bacas mandou-las soltar pal termo de la “fuolha” i Malgarida que caminasse atrás deilhas. Pensatibo, l coraçón an lhuito, anquanto la natureza i ls páixaros an fiesta alhá seguiu.

Naide tocou no muorto. Bieno l regidor i la guarda republicana, para alhebantar l auto i tirar l cadáber.

Quando Malgarida tornou, achou la casa dzerta i ierma. L pai staba preso.

Chorou, chorou mui ancunsolable. An todo l santo die sien quemer.

L juízio de l pai de Malgarida fizo-se de brebe i nun furan neçairas grandes probas. Todas eran teçtemunhas de que Tiu Calhau tenie repentes de génio! I ua lhéngua afilada. Robie ls fígados al más pintado que se l atrancasse no camino. Naide le las daba; nien l tuorto, nien l dreito. Ls dous nun falaban. L crime dou-se a las puortas de la loija. Al melhor nien tiempo tubo para arrastrar l muorto. Nien tiempo de se scapar. Quedou-se cun aire de spanto para nun criar çcunfianças. Esto dezie-se. Tan buono l Granjo. Un santo! … que mal poderie tener feito al sou algoç, mala béstia! Calhau! …

Todas las probas batiran ciertas. I, alhá bai! Binte siete anhos de degredo! I yá nun tornou a casa, nien sequiera para abraçar, pula última beç la filha adorada, cunsolá-la i dezir que staba einocente, cumo se matou de boziar no tribunal delantre de ls juízes i naide se ancreditou, naide l defendiu, que al menos eilha rezasse. Tornar a casa para quei. Nó, nun le doran esse cunsuolo a la delor tamanha antes de ambarcar pal degredo.

Agora Leandro Calhau ye cume se nun bibisse, bibe nua mazmorra i biste ua marca negra cul númaro 796.

Quein le quejir screbir, há de achá-lo na cadena de Lisboua, adonde, resignado, goza inda pouca lhibardade i çtrai l tiempo trabalhando de carpinteiro.

Mas quien hai ende que s’acorde del. Nien la filha tan sobressaltada. Nien sequiera essa a quien el deseaba eiducar i bé-la ua princesa. Passados dieç anhos, l preso recebiu ua carta deilha, la purmeira, a pedir permissión legal para se casar i cumponer la bida. Inda era menor d’eidade. L pai cula licença mandou-le ua maquila de denheiro de l sou nuobo oufício. Deseando-le que al menos fusse feliç i a terminar – “las bénçãos de Nuosso Senhor i de tue mai que tubo la suorte de bolar pal cielo antes de cuincer la mie dzdita, tu cubran i encaminen no bien”.

Passoran más dous anhos. Naide dada fé que no lhugar habie un home trabalhador i anfeliç chamado Leandro Calhau. Naide falaba nel i inda bien, porque çquecer ye tamien cousa buona quando Dius assi permite. Á! Pudissemos olbidar tanta cousa! Çquecido! Loinge de las bocas de l mundo! … Ningua lhéngua mala le muorde na honra cumo naqueilhes dies quando parece que l Cielo, i la Tierra i l Einfierno se ajuntóran cuontra el, de todos scunjurado.

Bendito seia l siléncio.

L Senhor Bispo de Bregáncia mandou pregar ua mission an toda la diocese, i bieno un missionário Jesuíta ambuolto de grande fama. Las personas ajuntoran-se aqueilhes dies, na eigreija, cume canhonas no redil.

Muitos que bidas habie, nun ponien alhá ls pies, ancantados de la fama ou talbeç de la grácia ou de la nobidade, furan tamien a oubir ls sermones. Era no fin de cena! Mas á! que sermones. Antraban pula alma até l coraçón. Nun cansaban. Ls pastores deixaban ls ganados pal benir a scuitar. Ls perros alhá se ancargarien de guardar las canhonas de l lhobo i esses nun precisiaban se nó de alimento de l cuorpo. Apareciu tamien, ambuolto na capa d’honras, un pastor que nunca habie puosto ls pies no sagrado, a nun ser naquel die quando recebiu las augas de l batismo. L Miguel de la Lhomba. Home seco i mal andonado, nariç de gabilan, gastaba ls anhos no termo metido cun el, loinge de las outras personas. Era l que se chamaba un bicho de l monte falando a las solas cun el.

- Tu hoije porqui?

- A gastar l tiempo.

- I l ganado?

- Stá a buono recado. Deixei-lo antregue a “farrusco” (era l perro).

- Pus bien haias; staba a stranhar: la purmeira beç que te beio por estes lhados.

- Nun me tengo perdido muito por estes sítios. Mas ls afazeres nien siempre deixan.

- Claro! Claro!

L missionairo naqueilha nuite falou de la cunfission i cuntou la parábola de l Filho Pródigo, tán guapa! Cunfessar ye desabafar. Todo mundo ten necidade de se abrir cun alguien para respiro de l’alma. Quantos, para achar paç chegan a cunfessar-se até a quien nun deben, a las árboles, a ls barrancos, até a ls própios einemigos, a las cartas, a ls jornales a las mulhieres de birtude ou sien eilha i al próprio juíç, Miguel de la Lhomba sentie todo esso por grande speriéncia. Ambaixo de la cotra dura de muntanhés, bulhie qualquiera cousa que nun l deixaba dromir assossegado, no eimbierno scuro an casa ou na cabanha. I nó de l friu. Se alta nuite boziaba al lhobo, a boca chena, ye que querie, l más de las bezes, tan solo resfolgar fondo, spantar un pantasma de lhuito que trazie andrento, na arca de l peito, cume un cuorbo, a rober no coraçón.

Ganhou coraige por fin.

… Sua Reberéncia Abade, stou arresolbido a todo. Bou a Miranda a declarar-me a las outeridades, para l librar. Fui iou! Quien matou porque la bítima me habie acusado. No momento de pagar la multa porque las mies canhonas habien saltado un cerrado, jurei de rábia, jurei que las pagarie caras. Aguardei muito tiempo. Él i Calhau anfadoran-se. Aton yá iou podie aguardar sien çcunfianças acuontra Granjo. I de causo pensado arrastrei-lo até la puorta daquel que ye einocente. Leandro Calhau ye einocente de la muorte daquel que fui sou einemigo. Meti-me pul monte cul ganado i naide pensou an mi. I mesmo assi nun me sinto assossegado. Que deberei fazer? Iou bou a la guarda, iou antrego-me i todo se resulbe!

- Armano, diç l sábio cura apuis de grande siléncio, antes de qualquiera resoluçon ye siempre buono pensar. L armano ye cierto, stá oubrigado an cuncéncia a çfazer l mal feito i librar l einocente, mas naide ye oubrigado an cuncéncia a antregar-se a la justícia. L buono nome i la lhibardade son dons einestimables de l Criador e podendo, deben ser salbos. Ecrebi ua carta … ou se me dais permission de buona fé iou usarei deste segredo, lhougo que stebirdes a salbo. Digo se me deixais de buona fé. Deiqui a la raia poucas horas hai de camino. Deixai todo bien cumpuosto. I salbai-bos. Fazei peniténcia dun desterro por buossa gana i bibi al menos loinge honradamente. Antregai buossa alma a la mesericórdia debina i reampeçai ua bida cumpletamente nuoba. Remediai i çquecei l passado, cume Dius tamien çquecerá.

Na última nuite de la mission, l missionairo de l alto de l púlpito fizo ua declaraçon solene.

- Hai doze anhos dou-se nesta tierra un crime de muorte i por el un einocente respundiu i fui cundanado i inda ye bibo. L respunsable de l crime ancarrega-me an sou nome de dezir de l alto de l púlpito la berdade de l feito: que houbo un erro de justícia, i al mesmo tiempo, de tornar a dar al degredado l buono nome i la lhibardade.

Lhougo que las últimas palabras se abafóran no siléncio, un ancuntrón altarado sacudiu la eigreija, cume las óndias d’ua senara suobre un pelubrino.

Faziran-se grandes fiestas quanto Tiu Leandro yá libre, tornou de la cadena. Mas el an buona berdade pouco folgou. Quaije naide l cuincie de tanto haber quedado bielho. Ampeçou a deleriar. Todo na bida parecie un suonho … ls garotos mal-eiducados fazen caçoada del quando bai de lhugar an lhugar … Á que ningun de bós benga a sufrir tanto.

Cousas desta bida: uns rien-se, outros choran. La garotada cuntinou a jogar l “caldeirico”, mas quando Tiu Calhau tornou a passar paróran ls folguedos. Talbeç tamien l tonto an nino houbira jogado cumo eilhes, cula mesma gana, si i cumo eilhes, muitas bezes l tocou a ganhar i a perder. Agora habie perdido todo, até la rezón, que l deixassen an paç! Manuel Zé agarrou la caiata de l jogo, de curaçon resgado, oufreciu-la i biu-se un antigo degredado botar meia risa, cumo a agradecer.

José Francisco Fernandes – Padre Zé

Porto, 24 de Nobiembre de 1961

Buonas tardes

i buonas tuntarias

Las fiestas de l Lhugar II

2010-04-09T14:56:00.000+01:00

cuntinuaçón

Ua de las cousas de que me admiro ye daqueilhes buonos aldeones celebraren l Santo Antonho no coraçón de l’Eimbierno. Respundiran-me ls antigos que alhá tenien las sues rezones. An tiempos dou-se ua grande mortandade nos animales i fazírun ua promessa al Santo de fazer ua fiesta se la peste terminasse, l que acunteciu naqueilha parte de l anho.

No die de Anho Nuobo, ajuntan-se ls moços i ban por carradas de lheinha i tuoros pal grande lhume. Eilhi se bei quien tem unhas i pulso para agarrar i puxar!

Prende-se ua maroma doble a la dceda ou cabeznalha de l carro, antremeia-se de stacas lhargas i bien presas. I agora bamos! Puxar dous a dous, ls de la mesma eidade.

Stacas al peito: - Upa, arriba, arriba, bamos.

- Dás fé daqueilha beç quando todos beijábamos l suolo porque las maromas se patiran?

- I mira que eran bien gordas.

- Nun eran ninguas lhinhas de questureira, nó. Grande fiesta la desse anho cun foguetes de lhágrimas i banda, i seis curas na eigreija a cantar. L que bai acascalhar ende de farrusteiros de todos ls lhugares al redor.

- Á tie Marie, ide purparando ls botielhos i ls galhos … i l arroç doce para ls dançadores.

- Quando ls mardomos passáren nas ruodas de l pan … tengo prometidos dous alqueires. Nó que ls cochinos custan a criar i iou bi un, l más nuobo que, yá de todo, naide daba bida por el.

Chegou l die. Repican las campanas de biespera. Apuis de la nobena acende-se l lhume que anchiu todo l cielo de claridade i d’ua esplosón de chiçpas balientes a sbolaciar. Ls dançadores beilóran ls lhaços más sabidos i ls foguetes estouróran. No fogo preso las bichas antroran a rabear por antre piernas, á! Paticas para que bos quiero! Solo oubi stouros i risadas fuortes anquanto l suolo me dzaparcie debaixo de las botas, aqueilhas nuobas de strena ansebadas i duras.

Las personas de más eidade, an pie, caras afogueadas ponira-se a razonable distáncia de l braseiro guardadas de la calor pulas manos abiertas na palma. La rapaziada, essa fizo la ronda pul lhugar a la lhuç de ls fachucos i al sonido de ls chocalhos. Sí, chocalhos! Porque l buono padre Santo Antonho, l dunzel franciscano ten na tierra sien scándalo, propiedades i ganados i nien paga décima cume ls demás amos que inda por anriba le guardan las canhonas, çquilan la lhana, para esta grande fiesta. Pula mesma rezon scuolhen de mardomo un pastor i el, l Santo, paga a manos lhargas librando todo l ganado de la morrinha i de l lhobo. Bereis manhana na prociçón las grácias feitas i quedareis a saber que l glorioso Santo Antonho ye un grande nuosso amigo, ye buono bezino an quien se puode cunfiar! Merece!

Bandito Santo Antonho i Santo Antão que cuidan de la nuossa fazienda. Nun les dou la maleita, i inda bien … a ls mius ricos cochinos. La ceba stá pronta, agora an passando Todos-ls-Santos que ls dies ampecen a arrefecer, mete-se la faca i fai-se l fumeiro!

- Mas antes hai que amassar l trigo.

- I mercar las tripas na feira pa las tabafeias i chabianos.

- I l miel pa las morcielhas.

- Dezis bien! I denheiro para todo esto?

- Há de se arranjar!

Iou bi, la purmeira beç, la lhuç de l mundo nua manhana frie de Outonho. Talbeç por esso mesmo sentir arrepelado de las matáncias. Deixában-me aperreado ls gritos zasperados de l animal, esse animal çoco que solo sirbe apuis de muorto i solo para esso bibe i angorda. Nun ye que tubisse pena mas metie duolo bé-lo a sufrir. Inda bien que ls matadores cumpadecidos al sigundo golpe de faca l deixan sien un gemido, anquanto l sangre corrie a golfiadas an borbulhones brumeilho i caliente quelor de fuogo. Desatan-se las cuordas i l animal chimpa murcho, arrancando un último sticón. Esses matadores gozan de merecida áurea. Sangre friu (al robés) son cume ua spéce de heiróis i beneméritos de la animalidade, a quein, cun pulso firme nien dan tiempo de sofrir para alhá de l susto! I fázen-lo cun naturalidade i cuncéncia pura!

Sangrados ls cochinos, stenden-se no terreiro i fai-se l lhume. Passou la tragédia, brebe. Las chamas lhebantan-se a restralhar, calcedoras … barbeado i lhabado l muorto prestable ye todo aporbeitado … atencion! atencion cul rabo. Hai nesta tierra ua tradiçon que ye ua perrice pa ls cumbidados de la matáncia i ua glória pal guicho que cunseguir fazer esta façanha: de sacar l rabo al bicho sien que naide l beia.

Nos purmeiros anhos de coleigio, iou, murto de suidades, screbie pul Natal a pedir, alhá an casa, para nun se çqueceren de ls Reis Magos i se pudissen mandar tamien … daquel rabo de cochino tan sabroso. Mas este por dreito pertencie al matador que dun golpe, l atrabessou l coraçón, i mal l deixou sufrir. L matador a sue beç, mostrando ser manos lhargas, questumaba dá-lo a la garotada para repartir: de l más bielho al más nobico. Agora que iou andaba no coleigio, meio-home, meio-rapaç, pertencie-me la parte más gorda. Por fabor … que nun se çquecíssen! Quando la anquemendica chegou, un cumpanheiro más acalorado, alhebantou-la para ls outros an palo de pendón para que todos bissen i se rissen. Houbo palmas i gritarie, mas iou apostei lhougo: yá sei quien nun ha de porbar del! I nó!

Aquel mesmo anho, por perrada, roubórun-mos ls cochinos. Assi mesmo! Na biespera a la nuite, ls bezinos, sorrateiros i, por grande i einorme cumpaixon, fazírun la maldade de abrir la corteilha, sien permisson i dar un passeio a la lhuç de la lhuna para dzanfado daqueilhes tristes que se çpedien de la bida. Apuis, altas horas, resguardóran-los, sabe-se alhá adonde?

Ls guichos cumbidados, se querien fiesta, que adabinassen! Se nó … por fin yá tarde apareciran antre risadas i grunhidos. Ye un questume que mete grácia. Mas ye nuite, a la calor de l lhume, antre l tlincar de la mesa i risas i remoques, saboreia-se ua çforra meio agre, cun pinga caliente, ua moda de passa-palabras. Bamos a pregá-la tamien! Deixai star!

- Quien mata manhana? Pus antón que nun tome cuidados i nun tranque bien la puorta.

I botan risas cuntentos, tomando l gusto a l chiste antre garfeadas de chanfaina. Desses, mius amigos, nun haba miedo que stan çafos, mas ai daqueilhes que nun colgan fumeiro, nien juntóran pan no celheiro.

José Francisco Fernandes - Padre Zé
Porto, 13 de Nobembro de 1961

Las Fiestas de l Lhugar

2010-04-07T12:18:00.001+01:00

Naquel lhugar habie cuatro fiestas prancipales: St.ª Bárbela, St.º Antonho, la matáncia i la lhimpa. Naide se admire de chamar fiestas a estas ultimas porque si eran de berdade. I bie-se la ligaçon antre todas eilhas. Sien St.ª Bárbela, adeus lhimpa, sien St.º Antonho nun spereis matáncia.

St.ª Bárbela ampeçou no anho de la piedra.

- Dás-te fé Miguel? Si te acordas …

- Carai! St.ª Bárbela me perdone – tornou de la sue squina Miguel Chona. Andaba iou na relba pal lhado de las Marcas. Á mai! nien querie que bíssades.

- I iou, atalhou Barandales, staba a segar la gadanha na Molineira.

- Benien dous anubrados de cada lhado! Iou staba no Sierro a guardar las oubeilhas i al ber aqueilhes castrelhouços de nubres negras, fumegando i zoando, ai de mi! Solo tube tiempo de me rebolcar para baixo d’ua touça cun fuolhas berdes. Esto passou-se a la antrada de la Primabera.

Staba eilhi cumigo Claudino Pepe, que Dius le perdone (yá se morriu); anrodelhemos-mos ls dous na capa de honras, i lharga a sgraniçar, a sgraniçar que parecie l fin de l mundo.

Cada cual puxaba la capa para scunder la cabeça. A dado tiempo sinto piedras a rodrar de l tamanho de uobos …

- Mas uobos de pita … ampeçan a martelhar-me nas cuostas cun fuorça, anquanto roncában trunos, hui! Que die. Cerrou-se todo. Senti ua auga caliente a escurrir pula tiesta i, quando lhebei la mano a ampalpar, beio-la ampastada de sangre. Claudino choraba … escalabrado. Santo Dius de l cielo! Passado tan solo meia hora, que bemos? Relhuziu l sol i atón, lhástima! La touça znudada sien fuolhas nien galha berde. Por aqueilhas ourrietas, por todo aquel Sierro alantre nien se bie un trigal an pie. Las oubeilhas spargidas: dalguas muortas outras ciegas!

- I a miu pai, Dius l perdone, nun le matou l melhor marón?

- I miu tiu? Que se librou suobre la ala d’ua parede?! Benie tamien de la Molineira cun la gadanha al ombro. Ampeçou l cielo a toldear-se i a resulbir-se. Nada! Toca a resguardar. Dais fé de l Cerrado de ls Florindos? Aquel uolmo metade seco, eilhi a la antrada de l portielho? Eilhi mesmo! Quando biu relhampar … Nó, eiqui nun stou sossegado … i más cun la gadanha. Bai dende i botou-se outra beç a camino. A duzientos passos apanhou ua obra de parede, amugatou-se debaixo deilha. Quando … bai que sentiu un fuorte cheiro a anxofre, reparou i biu a la lhuç dun relhampo un fumo a chubir … daquel mesmou uolmo.

Passados dies dou cun el

- Metade seco.

- De la centeilha. Mirai!

- Dende miu tiu ambarcou para Buonos Aires.

- Ui! Ambarcou un ror de giente aquel anho.

- Claro! Nien pan, nien yerbas! Nada se colhiu.

- Loubado seia Dius que ls mardomos de la Santa puoden botar buona fiesta, este anho i la promessa queda cumprida.

- I nun ye para menos!

Esta cumbersa fazie-se nas eiras de San Juan, nas tierras de Fuonte Frie las tronadas son a menudas bezes.

Cun las últimas palabras, Miguel Chona ampinou la bota i goleou, de mestre, uns balientes tragos, sien la chegar a ls beiços. Çtraidamente, cume era manha, lhimpou l gargalho a la manga, passou a la ruoda. Alhebantou-se!

Ouserbou cume staba l cielo, abaixou outra beç ls uolhos a la tierra.

La “parba” – assi chaman por modéstia a la colheita – staba eilhi a sous pies an monte de cordón, yá trilhada, trilhada an trés cumpridas semanas por seis juntas de bacas medianas. Apuis de junta, amuntonada i calçada chaman-le “cemba”.

De l ourizonte l aire-sul ampeçaba a picar siguro i meio fuorte.

- Ei! Rapaziada, bamos a la lhimpa!

La purmeira tornadeira, chena lhebanta-se al aire. Lhougo outras apuis d’outras, purmeiro ralas apuis juntas, abançan an tosca batalha, cuontra l aire que crece. De brebe ua chuba cumpassiada de grano, ben chimpar-se no suolo, an marciadas, soltando cabriolas. Era rir de gusto al bé-lo a beilar.

- Bamos a esto rapaziada! Benga! É! Marie, lhimpa-me esse pan i nun me l deixes ampastar. Barre aqueilha spiga! Tino nos dedos nun te pise. Essa pála la pála que stá ende a fazer? Coraige! Alma i coraige!

Ls lhimpadores, de lhenço ou mandil na cabeça i cachaço, siguen dobrados na mesma función cun golpes ternários al aire; alhebantando ls uolhos de quando an beç, solo de sgueilha, saben rigular-se para acertar la fuorça i l jeito.

Cuorda atrás de cuorda, abançan, óndean, acaban ls sucos i tornan a ampeçar. Ua nubre de palha suolta, bola an rebofiadas suobre las cabeças i bai a morrer más alhá nun sonido spartiçado. Rodan las pálas, las cerandas. Respira-se fondo. Roda tamien la calabaça adonde ban a sorber la alma. Estes son ls lhimpadores, pimpones, búltios de fuorça antre ourielhas de ouro i prata donde scuorre l maciço grano. Deste lhado stende-se l cordón cumprido de trigo amarelhado i ajunta-se, por fin na grade muola, antes que ampecen a medir.

Dous moços, mangas arrefucidas, pies çcalços cun meias de lhana, yá espipórun ls alqueires. Este sigura-se para sbaziar no saco cun proua i, seco, solta no aire boç cumpassiada i rouqueinha de la munha.

- Nome de Dius, dous, trés … - talha ua! I torna apuis dun trago animador: Nome de Dius … las bozes de ls medidores antressacan-se sobreponen-se! Ls sacos abultian.

- Á! Quemadre que fiesta ban a fazer este anho ls colheiteiros! Reparai para … la

- Boç cruzada de ls medidores … dezanuobe, binte – talhas trinta i cinco!

- Buona te bai eilha. Á! Mai! Bien podeis matar bitela i carneiro que aposto que nun hai por todo l lhado lhimpa más fuorte.

- Carneiros? – Torna la quemadre. Dous bi iou, a passar a la puorta yá amanhados.

- Giente nun bos falta! Para ls quemer.

Ye questume l pobo andar de torna jeira: hoije benes tu para mi manhana, iou para ti. Por esso se ajuntórun tantos! Al çponer de l sol ls carros chiában ls lhimpadores i lhimpadeiras cantában!

- Á Zé, anda dende, toma ua pinga.

- Carambas! – Hoije ye alegrie.

- Quantos? – Pregunta?

- Bacatela. Trinta i cinco!

- Buona jura! Trinta i cinco talhas, andar! Pus atón de hoije an binte, i Dius bos deia salude para quemerdes este i fazer por outro!

- Ámen Jasus i a ti que pinte.

- Atón Dius bos l pague.

ten cuntinuaçon ...

Padre Zé

Porto, 13 de Nobembro de 1961

Páscoas al fumo

2010-04-06T23:03:00.001+01:00

Cume diç la cuonta:

"anho buono? Nabidades al sol i Páscoas al fumo".

De l Natal yá nun me dou fé porque nun cuntei las cabanholas - ora ende stá outra cuonta para medir l tiempo que benirá, sien necessidade de ler l Xeringador - mas la Páscoa si que stubo cul tiempo bien ásparo! arre, arre, más un cachico i quedaba todo ancarambinado. Todo ye cume quien diç ... porque iou bien me resguardei al redor de l forno para me calcer por drento i por fuora. Por drento, cun folar d'uobos, folar de pan - este si que ye buono al salir de l forno - i roscos doces. Por fuora, l braseiro de cuatro cepos de freixo a stalhar cul sonido de cuontas doutros tiempos. De las cuontas, noutra hora bos falarei, agora de l folar, i porque nun sou tan garunho cume puodades manginar, reparto cun bós l fruito de la tradiçon. D'hoije nun anho mos tornemos a ber i que bos aporbeite este carolo dado de tan buona gana!

Fé, Sprança i Caridade

2010-03-31T09:55:00.001+01:00

L coraçón ten dous quartos
Neilhes bíben a la lharga
Nun la fé, noutro la caridade.

Para maior cunfiança
Hai ua puorta no meio
Que se chama sprança.

Quien quejir quemunicar
Antre eilhes cun armandade,
Essa puorta de bai i bén
Fai de las trés la ounidade.

La fé ye crer sien ber,
La caridade ye solo amor.
La spráncia ye cunfiar:
L que salba ye l amor.

(no oureginal)

Fé, Esperança e Caridade

O coração tem dois quartos,
Neles moram à vontade
Num a fé, noutro a caridade.

Para maior confiança
Há uma porta no meio
Que se chama esperança.

Quem quiser comunicar
Entre si com irmandade,
Essa porta de vaivém
Faz das três a unidade.

A fé é crer sem ver,
A caridade é só amor.
A esperança é confiar:
O que salva é o amor.

José F. Fernandes - Padre Zé
Mogofores, 2009-09-28

A spera nun cunsultório

2010-03-29T19:46:00.003+01:00

.          An tues manos iou sou un lápeç.
.          Yá fui árbol. Yá fui passado,
.          Serei tamien feturo
.          Á, miu Dius, i ye esso que iou precuro.
.          Mas l feturo ye tan grande
.          Cume l tiempo i l spácio,
Ye mesmo quaije anfenito.
Quererás, tu, arrochá-lo nun abraço?
.          Einutl! L feturo chama por ti
.          Mesmo que abance bagarosamente.
El bate an tous pulmones
An tous pies i tous braços:
I quaije nun se sinte.
.          Ye cume l bolo de la androlina
.          Reboltiante, parabolóide.
.          Mui ralo l feturo se adabina.
Quanto tiempo passou dzde
Que ampecei a screbenhar? Nun sei.
.          Sei que nada sei.
.          I assi l tiempo fuje
.          Un die tamien you passarei.
A cada resfuolgo stou deixando
Para trás, qualquiera cousa de l miu ser:
.          Iou sou tan solo ua lhágrima
.          Que persinto abrolhando
.          De l tiempo que yá passei
I, an parte, dzaporbeitei
I nun torna más. Á mie delor.
Mas l que alhá bai alhá bai.
Nien por esso stou chorando.

(no oureginal)

À espera num consultório

. Em tuas mãos eu sou um lápis.
. Já fui árvore. Já fui passado,

.          Serei também futuro
.          Ah, meu Deus, e é isso que eu procuro.
.          Mas o futuro é tão grande
.          Como o tempo e o espaço,
É mesmo quase infinito.
Quererás, tu, apertá-lo num abraço?
.          Inútil! O futuro espera por ti
.          Mesmo que avance lentamente.
Ele pulsa em teus pulmões
Em teus pés e teus braços:
E quase não se sente.
.          É como o voo da andorinha
.         Curvejante, parabolóide.
.          Muito raro o futuro se adivinha.
Quanto tempo passou desde
Que comecei a escrevinhar? Não sei.
.          Sei que nada sei.
.          E assim o tempo foge
.          Um dia também eu passarei.
A cada respiro estou deixando
Para trás, qualquer coisa do meu ser:
.          Eu sou apenas uma lágrima
.          Que pressinto abrolhando
.          Do tempo que já passei
E, em parte, até esbanjei
E não volta mais. Ó minha dor.
Mas o que lá vai, lá vai.
Nem por isso estou chorando.

José Francisco Fernandes - Padre Zé
Oliveira do Bairro 200...

Melindros

2010-03-28T19:29:00.000+01:00

Hai dues cousas que gustarie de deixar a respeito desta família: purmeiro suobre la mai de tiu Benjamin, que sigún se cunta quedou solica no mundo cul filho apuis de l sou moço se morrer, quando staba para se casar, inda sien conhecer l filho. Era armano de Tiu Manuel Marcos (MARCOS) i tie Eimília nunca se casou. Bibiu siempre cun sue mai Ermelinda (MELINDRA).

Tiu Benjamin, Tiu Jin cume era cuincido i que dou nome a la cereijeira, morriu sien decendéncia no Brasil i la sue mulhier, Tie Adelina, bibe hoije an Cicuiro na casa más acerca a la cereijeira;

Tiu Luís, que bibe an Abelhanoso fui la persona que me dou las anformaçones de l paradeiro de sou armano Carlos, de ls sous filhos i sobrinos.

De la parte de tie Marie Melindra haberá que tener an atençon la famíla de ls CASSACOS.

No tiempo de las cereijas yá mos beremos.

Cereijeira de Tiu Jin

2010-03-28T16:52:00.000+01:00

Sigún dados arrecolhidos, esta cereijeira fui puosta no anho que naciu Tie Melindra (Ermelinda Luzia Torrão), falhecida ende por 1950 cun cerca de cien anhos. A ser assi, esta guapa árbol, que inda dá cereijas, debe de tener por ende 160 anhos. L anho passado fui andicada para ber se poderie ser cunsiderada árbol de anteresse nacional, mas l que fui dito ye que debido al sou stado de cunserbaçon, tal nun poderie ser.

I se la Cámara l punisse alhá ua tabuleta cula sue eidade? Se calha era más un fincón de anteresse pal cunceilho.

Se astanho botar cereijas fago tençones de ir alhá a peto solo para la retratar de todos las maneiras i feitius. Habeis de quedar cun tal antuolho de las brumelhicas que na buossa boca ha de nacer ua fuonte!!!

Buonas tardes

i que renáçades todos ls dies cume eilha.

III la Princesa de ls çapatos rotos III

2010-03-25T22:58:00.003Z

... cuntinuaçon ...
Equi, a la dreita bie-se un castielho esbarrulhado. Cuntinemos a seguir ls passos. Eilha corrie pula cuosta de barreira cume un anjo que bolasse. Chubiu, ancarrapitou muralhas. Çcansou. Puso-se outra beç de pie i era bé-la fermosa apendonada suobre ls precepícios, nadando, recortada no cielo. Corriu las ameias de l castielho. Parou outra beç.
Á astros de la nuite – dezie –
Á aire, á mar …
Miedos de la muntanha,
Pudira iou antender
La buossa boç einigmática
Antressacada de siléncios:
Retombos de l miu ser!
Nun bos calhei yá más,
Suspiros de la naturaleza
Mas pudisse iou mandar calhar,
Cumo a las ranas ranacalhadeiras,
Ls deseios que nácen an mi
Cume un die nuobo
Que iou nun cumprendo!
Adonde bibes felcidade?
Diç-me: adonde bibes
I lhieba-me cuntigo
Aire friu de la madrugada
Iou benie a te fazer este pedido!
Al para trás las ranas ranacalhaban outra beç. La princesa botou l restro de las monedas i eilhas calhórun-se. Chegou al palácio ambuolta no siléncio, çcalçou ls çapatos; nós çcalcemos tamien. Solo antón me dei cuonta que iou tenie ls çapatos rotos, cume sue majistade, cun licéncia, podereis mirar.
…
L rei scuitou an siléncio de pensar, quedou-se, apuis alhebantou-se sien dezir palabra. Ancaminou-se a ls aposentos de la princesa i filha. Eilha drumie tranquila, cun l madeixa stendida al redor d’ua rosa. Parou un cachico a mirá-la. Stendiu las manos cun ganas de la acordar, mas quedou-se. La rosa tenie sangre. Balanciada no aire un suable perfume!
- Deixai-la – dixo al final – deixai-la drumir … i sonhar! A la salida tropeçou nos çapatos rotos …
- Cuidado, nun la acordeis! Nun la acordeis.
Salírun.
La anfeliç princesa era sonámbula. Probezica! Mas quanto más probes son aqueilhes que na mocidade nunca sonhóran.

Apéndece

- Ai, tamien, tie Marie Rosa, para que fustes a cuntar esta nuite ua cuonta que acaba tán zgustosa. Sclamou de l sou canto ua rapaza que mexie ls dedos de fazer meia.
- Nun ye nada zgustosa: ye berdadeira, puodes crer. anton nun hai personas que se alhebantan a sonhar?
- Mas ye que iou tengo miedo!
- De quei?
- De me alhebantar de nuite, sonhando, i chimpar-me por ende nun poço! … apuis …
- Mira, ata-te c’ua cuorda al trabessanho de la cama – angraciou dalgun.
- … ou aton c’ua arreata – acrecentou.
- Guarda-la para ti! – remoque de pronto.
- Bá! Tino na lhéngua – rezmungou ua bielha que yá ampeçaba a passar pulas brasas i acordou cul strugido.
- Nun se alhebanta nó, que eilha yá ten las alparagatas rotas. Mirai! Mirai.
- Zbia-te para trás que tenes ls pies a arder! Nun sentis? Las cholas arrimadas al borralho para calcer ls pies tenien-se queimado ambaixo sien eilha s’aporcatar, pul atento a la cuonta, i botában fumo!
La risada fui giral, sien se daren fé, l serano alhebantou, i cada cual ampeçou a scamugir para penates! Até manhana se Dius quejir i an bien passemos la nuite! Debie ser tarde porque las cabricas ou pléiades relhuzien a pino mui bibas i giladas.
Aqueilhas horas, yá, talbeç, la princesa corrie puls montes i moraba culs animales de las florestas; cantaba cun ls reissenhores i las fuontes an que graciosa se spelhaba; falaba cun las árboles i rie-se cun ls lírios i sorbie l perfume doce de ls chupa miels de ls caminos.

Fin

Cuonta screbida por José F. Fernandes - Padre Zé
S. Bicente, Cabo Berde, 14-Set-1962

II La Princesa de ls çapatos rotos II

2010-03-23T23:15:00.003Z

... cuntinuaçon ...

Sue majestade l rei nun se cansou de saber anformaçones pal causo. I se yá dantes staba ancantado, más spantado quedou quando bieno a saber que sue alteza i filha rumpie ls çapatos de nuite nas horas de maior suonho.
Era neceçairo çcubrir l mistério. Ancargou ls guardas i scudeiros, cun grandes pormessas, de spreitar solo para çcubrir ls filos daqueilha meada que naide cumprendie.
Mas inda eiqui, la princesa spierta cume l sol, tubo artes de scapar i até rir-se de la urdidura an que querien cercá-la. Todos ls guardas i scudeiros ancargados de la guarda i que nun disse cuonta de l recado, probes anfelizes, yá sabien la suorte: que eirien parar al calabouço. Sí eran presos … a punto tal de no palácio de l rei cun más de cien muralhas, tenie de haber un salon bielho para çapatos, todico atafulhado, i ua corteilha escura al lhado pa ls guardas presos que yá eran muitos.
Aquilho nun andaba bien. L rei staba cunsemido cun el mesmo, anque cume soberano nun disse amuostras de tal. Cunsemidos ls guardas, scudeiros i fidalgos de todo l reino. Solo la princesa nun se amportaba muito.
Al final zlindou-se l segredo i fui de la seguinte maneira.
…
Chegados eiqui tie Marie Rosa fizo ua paraige grande a la medida de la nuite. Amanhou la striga! … chamando para eilha las atençones. Nesse antretiempo ganhou cuçpinha.
Cuntai! cuntai! – Eilha cuntinou.
Ora, nua dessas nuites, l rei lomeou dous scudeiros de la sue cunfiança de spreitar bien la muralha que miraba, an frente, ls aposentos de la princesa. Cume de questume Sue Alteza, antes de antrar no quarto oufereciu mui amablemente un cálce licoroso a cada un de ls guardas. Assi questumaba fazer siempre cun nobres modos i naide por natural respeito adragarie a nun aceitar la oufierta. Mas un deilhes, bielho scudeiro de barbas ruças aceitou – nun podie deixar de ser – fizo que bebie i, sien la princesa se aporcatar, nun angulhiu, deixou l licor resbalar pula striga de las barbas, e retirou-se cun agradecimiento. L outro cumpanheiro drumiu-se lhougo cumo ua piedra nun poço, porque l licor tenie ua mistela de dromir a que naide rejistie.
Altas horas, quando la lhuna chena s’assomou nos montes, oubiran-se passos: era la princesa que salie de ls sous aposentos, atrabessando las ameias i abrie debagarico ua puorta que eilha conhecie. L scudeiro de las barbas ruças, sien perder tiempo acordou l outro i ls dous fúran seguindo atrás, tenendo cuidado de nun atopinar ou fazer bulha. Agora deixámos-los seguir.
…
Na manhana seguinte l rei chamou-los a dar cuonta.
- Antón? Alcancestes algua cousa?
- Sí majistade. Quergades dignarbos a oubir: iou darei cuonta de todo, todo! Era meia nuite quando la princesa deixou l palácio. Fumos atrás deilha. Assopraba un airico fresco que fazie folharascar las árboles i nun deixaba oubir ls nuossos passos.
Eilha ancaminou-se para adonde l sol stremóntia i fui andando, andando, ambuolta no sou manto de seda branca cun las madeixas por riba de ls ombros sbolaciando. L manto i las madeixas grandes guardában-mos de qualquiera relhance de uolhos. Nós cosidos cun las paredes caminemos no sou rastro, parando se eilha paraba, apressiando se eilha apressiaba.
Chegando al pie dua roseira que de l alto ampinaba pal camino, sue Alteza, puso-se na puntas de ls pies, para colher ua rosa. Sentiu-se mui claro l perfume que se soltou al çprendé-la. Debie-se tener picado porque botou un suspiro quaije ampercetible apanhado pul aire. Bai dende puso la rosa no pelo. Fazimos la mesma cousa. Mirai la mie rosa. Cumo proba eiqui amostro a buossa majistade tamien, la picadela que, parece, an bingáncia, recebi neste dedo. Cuntinuai – dixo l rei. Seguimos an frente. Apuis la princesa atrebiu-se por un camino streito, ásparo i cumprido. Lhargou a correr. Nós tamien. Na punta cruzaba-se nun ribeiro. Eilha parou i tirou ls çapatos pal atrabessar: l sou búltio spelhaba-se nas augas cume l búltio dua fada. Quedou a mirar aquel speilho. Na borda de l outro lhado florie un lirial. Para el se ancaminou. Abaixou-se respirando l parfume anquanto stroncaba i l guardaba no peito. Fazimos l mesmo, cume buossa majestade rial podeis eiqui ber.
- Adelantre – dixo l rei.
Calçou-se outra beç. Seguiu pula borda l ribeiro pisando beigas saltando piedras i galatones. A bezes ponie un pie an falso i sumie-se antre brimaleiros. Tornaba a aparecer. L ribeiro cantaba nos xeixos ua cantilena zgarriada de cuordas de prata pula nuite alhunarada. Apetecie parar para oubir la guapa seranata. Assi quedemos algun tiempo atamando la respiraçon. Más para alhá oubie-se çtinto l ranacalhar de las ranas. De brebe cheguemos a ua lhagona cun puntones, abaixo d’ua fuonte d’auga pura. La princesa abaixou-se para buer nas conchas de las manos. An berdade tamien nós sentimos sede i cansácio. Agachei-me de zinolhos a buer a gola chena.
No fondo bie-se la lhuna spelhada cume un queiso de prata. Las ranas al dzafio nua algarbiada. La princesa atirou-le ua lapada para que se calháran. Fazírun-se óndias de muitos relhuzires até morreren a sous pies. Las ranas tornában al dzafio a cantar i la princesa neste ponto sacou de la jabeira i atirou, pa las calhar, ua moneda de ouro e apuis outra i más outra. Bien bimos relhuzir l ouro, caras a la lhuna; ua lhuna alumiadora no fondo de la lhagona … spreitaba de uolhos arreganhados. Las ranas i la lhuna parecien denunciá-la. L camino agora zbiaba-se, chubindo an cachaceira: ua caleija barreira a chubir un cabeço. Al loinge muito al loinge, relhuzien a sfregantes las óndias de l mar, cume pastoricas.

... ten cuntinuaçon ...

Cuonta screbida por José F. Fernandes - Padre Zé
S. Bicente, Cabo Berde, 14-Set-1962

La Princesa de ls çapatos rotos

2010-03-22T22:51:00.003Z

Era ua nuite cerrada de Nobiembre, nuite scura, cume la boca de l lhobo i cumprida que parecie nun tener fin.
Apuis de la cenica atiçonou-se l lhume i las bezinas de l questume, a sue beç, batírun a la puorta, traendo cada cual sue ruoca ou estriga i cume siempre an pagas un rachonico. Agarrados a ls xailes de las mais alhá benien tamien ls garotos maiores, ls que spantan l suonho para scuitar ua cuonta de serano, aqueilhas cuontas que se ban dezindo de pais para filhos i abós a nientos quien sabe dzde quando.
Tie Marie Rosa ampeçou cume doutras bezes, anquanto l fuso zolaba nos dedos an sou rodrar de suonho.
Era ua beç … Bou a cuntar la cuonta de la Princesa de ls çapatos rotos. Nun sei se serei capaç de dar fé deilha por anteiro porque la oubi inda nina, yá muito anho. Quereis scuitar?
Lhougo se fizo siléncio an que se cunseguie oubir la chamardielha de l lhume i l sonido de l fuso assoprando ansonhado.
Cuntai, cuntai! – pediran trés de ls garotalhos i rapazas quaije a la par, al se dar cuonta que eilha lhebaba tiempo a ampeçar.
Cuntai, cuntai! … Nós stamos calhados. Psiu!
Diç que an tiempos antigos, nun palácio dourado, de cien muralhas, bibie ua princesa tan guapa cume las streilhas i tan spierta cume l sol madrugador.
Solo tenie ua maca que naide çcubrie (i era pena). Todos, todos ls dies por artes ou sien artes, la princesa rumpie ls çapatos. I, pobrezica alhá tenie que se apresentar al rei de suolas rumpidas que eilha tenie l cuidado de arrastrar pul suolo para nun las çcubrir.
Era ua cousa stranha i ua bergonha para sue majestade que la filha de l rei, tan graciosa cume las streilhas, tebisse que se apresentar siempre, siempre naquel purparo que daba pena. L rei, para remedeio, mandou lhougo dá-le un par nuobo, relhuziente, que no die a seguir yá era sabido, tamien aparecie roto. Andou muito muito tiempo.
L rei chamou al final la princesa, preguntou a las buonas i cun fiestas: cume podie rumper todos ls dies uns çapatos nuobos? Ralhou cun eilha, sien mesmo assi tener ningua respuosta. Cuntinuaba l segredo! Anton era possible nua princesa linda cume las streilhas i lebe cume un páixaro? … I an tan pouco tiempo? Bai-se alhá a saber! …
Habie no palácio un çapateiro real solo para eilha i nun fazie más nada l probe çapateiro que trabalhar pa la princesa i nien assi daba cuonta de l recado. Tenie que se alhebantar cedo i trabalhar até alta nuite, a la lhuç dua bela … solo para serbir cume era sue oubrigaçon a sue real alteza, la princesa linda de ls çapatos rotos.
Ls çapatos íban-se ajuntando eilhi a ua squina nua sala tamien bielha atafulhada até las bigas que alhá más nun cabien.

...ten cuntinuaçon

Cuonta screbida por José F. Fernandes - Padre Zé
S. Bicente, Cabo Berde, 14-Set-1962

CORAÇÓN

2010-03-11T22:57:00.003Z

Miu coraçón, cumo nun habie de te amar?
Iou sei que sou más tou do que tu sós miu.
Cien mil bezes por die sinto tues batidas
Qual ninico arrolhado inda que drumindo:
Todo esto, senhores, ye por cierto lindo.
Tic tac tic tac reloijo de amor.

I nun te cansas, nien reclamas un feriado.
Melhares de melhones de bezes sien folgar.
An ti grebes nun hai. Nien sequiera pensar.
Á tou amor por mi! A quanto te oubriga,
Tu miu pequeinho mundo, pequerrica bola,

Mas que rodiones tamanhos, potentíssima mola;
Cun cuorda oureginal que mie mai te dou …
Nada te custa, l trabalho ye todo tou.
Drento de ti ambiçones i amores
Coubisse l mundo anteiro i sous arredores …

Bou passear. L coraçón comigo bai.
Pide recreio cumo se fura un ninico
Amenaça chober, mas yá passou.
Passo a lhimpo no antretiempo quanto el me ditou,
Coraçón bien amado, pongo na ti la mie fé.

(no oureginal)
CORAÇÃO
Meu coração, como não havia de te amar?
Eu sei que sou mais teu do que tu és meu.
Cem mil vezes por dia sinto teus batimentos
Qual bebé embalado ainda que dormindo:
Tudo isto, senhores, é decerto lindo.
Tic tac tic tac relógio de amor.

E não te cansas, nem reclamas um feriado.
Milhares de milhões de vezes sem folgar.
Em ti greves não há. Nem sequer pensar.
Hã teu amor por mim! A quanto te obriga,
Tu meu pequeno mundo, pequenina bola,

Mas que impulsos tamanhos, potentíssima mola;
Com corda inicial que minha mãe te deu …
Nada te custa, o trabalho é todo teu.
No teu seio de ambições e amores
Coubera o mundo inteiro e seus arredores …

Vou passear. O coração comigo vai.
Pede recreio como se fora um bebé
Ameaça chover, mas já passou.
Passo a limpo entretanto quanto ele me ditou,
Coração bem amado, ponho em ti a minha fé.

Mogofores, 28.3.2008
José F. Fernandes

GULAG

2010-03-07T15:00:00.004Z

Onte tube ua beç más l prebileijo de cumbersar cul Padre Zé. Furan falas menos cumpridas que outras de tiempos atrás mas assi i todo capazes de mos apegar la buona manha de escuitar modos cenzielhos i al mesmo tiempo estruturados de ber l mundo. "Sabes", dezie, "passo la maior parte de l tiempo a ler i a escrebir"... i no almairo delantre, antre diários i lhibros de eiditora, alhá estaba un, de capa branca, gordo, c'ua sola palabra no lhombo: GULAG
L resultado dessas leituras passou-lo a poema, ls bersos que el mos dá, de graça.

GULAG
Nun sei cume ye possible un tanto sofrir?!
La esplicaçon parece ser mesmo esta:
Todo neilhes yá se morriu,
Solo la esperança de bibir ye que resta.

Son muortos-bibos cadáberes ambulantes
Para quien solo hai l agora na hora
Sien brilho, sien aspuis i sien antes.
Boubos de fome, nien sáben que inda eisisten.

Mesmo assi, arrastrando-se, rejisten.
Yá nun sabemos se se diç manhana ou “amanhã”
Bibimos? Morreremos? Nien se pensa;
Maior que la bida la delor ye eimensa.

Anboldrigando-se quales lhumbrizes, bamos i esperamos.
Ls abutres, de l alto espreitan la sue suorte
Admirados por achá-los, purmeiro, que a la muorte.
Mesmo assi nun hai fé dalgun suicídio:

Las ganas de bibir son eiqui un prodígio …
Ou por ser crudo? Nun será antes un tabu?
Abaldonan-se, nien sequiera yá se lhaban,
Nien catan ls chizmes que manaban.

Perdiu-se toda la denidade houmana;
I estando esta perdida, cumo? I quien la sana?
Á Dius, mas essa palabra GULAG
Nun se diç. Ye cume un çurriago
Un tabu … paraíso perdido i anfeliç …

(no oureginal )
GULAG
Não sei como é possível um tanto sofrer!?
A explicação parece ser mesmo esta:
Tudo neles já morreu,
Só a esperança de viver é que resta.

São mortos-vivos cadáveres ambulantes
Para quem só existe o agora na hora
Sem brilho, sem depois e sem antes.
Loucos de fome, nem sabem que ainda existem.

Mesmo assim, arrastando-se, persistem.
Já não sabemos se se diz amanhã ou “manhana”
Vivemos? Morreremos? Nem se pensa;
Maior que a vida a dor é imensa.

Rastejando quais vermes, vamos e esperamos.
Os abutres, do alto espreitam-lhe a sorte
Surpresos por encontrá-los, primeiro, que a morte.
Mêsmo assim não nos consta de algum suicídio:

As ganas de viver são aqui um prodígio …
Ou por ser cru? Não será antes um tabu?!
Negligenciam-se, nem sequer já se lavam,
Nem catam os insectos que prolificavam.

Perdeu-se toda a dignidade humana;
E estando esta perdida, como? E quem a sana?
Ó Deus, mas essa palavra GULAG
Não se diz. É como um azorrague,
Um tabu … paraíso perdido e infeliz …

Mogofores, 23/07/2009
José F. Fernandes

Dous anhos

2010-03-03T23:41:00.006Z

Fai algun tiempo que eiqui - i noutros sítios tamien - pouco tengo escrebido. Nun sei se ye falta de gana, pouca anspiraçon ou "bruxedo" de curandeiros de tiempos modernos. Mas hoije dezafiei todo mundo: tenie que benir eiqui. Afinal de cuontas tengo que cunfessar que se nun fura este rinconico, muita cousa tenerie quedado por fazer, tanta persona por conhecer, tanta palabra por escrebir, tanto mundo raiano por amostrar ...
... cume por eisemplo l escritor cicuirano que siempre ye un gusto ler.
Cun el bos deixo neste die.

CANÇON TELÚRICA
“Iou digo a la tierra que me cria: Mai,
Tu sós la mie bida”.
Citaçon de l lhibro: Terra Minha Mãe

Tierra ye nuossa mai pus deilha nós bibimos
I a la qual – negar nun puodo – un die tornaremos.
I anquanto esse rato selumbron nun chegar
Puodan mius uolhos ber l sol i l lhunar.
La tierra ye nuossa mai, a las bezes pedregosa
Mas quei? Se an cada frincha nacir ua rosa?!
Nós somos spinos, la rosa, l candor
Daqueilha que mos cria, e respira amor.
Ye por esso que iou canto l suolo de que sou feito;
Solo pido que aceite l miu último preito
Até repousar de las cuontas desta bida.
Siléncio! Acolhouca está la tierra pormetida.
Mai querida, mie camica i mie última xerga.

(no oureginal)
CANÇÃO TELÚRICA
“Eu digo à terra que me cria: Mãe,
Tu és a minha vida”.
Citação do livro; Terra Minha Mãe

Terra é nossa mãe pois dela nós vivemos
E á qual – negar não posso – um dia voltaremos.
E enquanto esse momento ignoto não chegar
Possam meus olhos ver o sol e o luar.
A terra é nossa mãe, às vezes pedregosa
Mas quê? Se em cada frincha nascer uma rosa?!
Nós somos os espinhos, a rosa, o candor
Daquela que nos cria, e respira de amor.
É por isso que eu canto o húmus de que sou feito;
Só peço que aceite o meu último preito
Até repousar das lides desta vida.
Silêncio! Além está a terra prometida.
Mãe querida, meu berço e meu último leito.

Padre Zé - Mogofores

Nota: Abraço especial para Manuel Carbalho pula fuorça i las eideias que botou.

Maruxinhos II

2010-02-21T23:02:00.007Z

Buonas nuites

i buona semana

Maruxinhos I

2010-02-07T23:08:00.006Z

Cume yá muito tiempo que nun ponie família nanhue i habie chegado la beç de ls Maruxinhos deixo eiqui la cara más cuincida deilhes: Tie Eirestina, la única que quedou an Cicuiro.

Sue mai, tie Marie, moraba no bárrio de l Palombar an frente a la casa de Tiu Manjor i sue abó era de San Martino.

Buonas nuites

i buonas lhembráncias

Hi, i'm White Devil.

2010-01-28T22:24:00.001Z

Más anzonas dun cicuirano

Fiesta de Santo Antonho

2010-01-14T13:20:00.004Z

La fiesta de Santo Antonho, an Cicuiro, será talbeç ua de las poucas que nun se fázen no die de l santo, a treze de l més de San Juan, mas si no die dieç de Janeiro. Diç l pobo que la fiesta ten ouriges an promessas feitas pulas personas de l lhugar nua oucasion de muita mortandade de ls animales, prancipalmiente cochinos i ganados. Prometírun anton a Santo Antonho que l fazerien ua fiesta cun nobena, todos ls anhos, no die dieç de Janeiro, que deixában cume die santo l sou die no més de San Juan i que cruzarien l lhugar de Sul para Norte i de Ouriente para Oucidente, culs ganados.
Cume denheiro nun habie, para se poder fazer la fiesta era neceçairo botar mano a todo l que se podie apedurar. Assi, cada pastor darie un canhono que criarie cume sou, l que dou ourige al ganado de Santo Antonho. Ende puls anhos trinta de l séclo binte, esse ganado tenie dieç canhonos espargidos puls ganados de Tiu Manuel Cabero, Tiu Zé Cabero, Tiu Alexandre Caldeireiro, Tiu Antonho Cabero, Tiu Flipe, Tiu Chico

Ferreiro, Tiu Cebolho, Tiu Claudino Checola i Tie Mariecola.
Se adiles nun habie i la yerba andaba ratunhada, esse ganado nun debie tener oubeilhas para que nun crecisse i para nun dar trabalho de más a ls pastores. Un canhono ou un marón inda ye cume diç la cuonta, mas guardar i tratar meia dúzia de oubeilhas i ser respunsable por eilhas era más do que cada un podie tratar.

Ende de dous an dous anhos, ls pastores bendien esse canhono i criaban outro para reponer no sou lhugar. L denheiro era dado al santo, assi cume todo l que se recebie cula benda de la lhana. Se a las bezes fazie falta denheiro pa la fiesta tamien se bendie un ou dous canhonos para pagar l gueiteiro (tiu Jesé Juan de la Eigreija de Infainç) que tocaba na missa, na prociçón i apuis no baile. Más tarde benírun las concertinas para fazer l baile i a partir dende la anfluéncia de l gueiteiro fui-se perdendo.
L ganado de l santo fui ua beç bendido por tiu Agusto Cristo, mas apuis cume l santo nun podie estar sien nada, cada pastor dou-le outro canhono i quedou l santo cul ganado outra béç, mas fui-se acabando al mesmo tiempo que ls pastores. Inda hoije la tradiçon se mantén i ls pastores ténen l questume de dar un canhono al santo para botar no pregón, que agora se fai l die de la fiesta a la nuite nun anterbalo de l baile.
A bien deizir, essa fiesta ampeçaba no die de anho nuobo culas nobenas, ditas a las nuites apuis de cenar i terminaba no die dieç a la nuite no fin de l baile.
Antes de las nobenas, l santo salie de l altar i era puosto nua mesa, al pie de la pila d’auga benta. Al lhado de la mesa habie un cesto para meter las promessas i anriba de la mesa habie ua bandeija para arrecolher uobos i esmolas an denheiro.
No die nuobe, apuis de la nobena, ua persona de cada casa iba a casa de l mardomo que quedaba más acerca de la eigreija i arrecolhie ua malga de antremoços por cada persona de la família. Tamien nessa nuite, aspuis de la nobena salie la chocalhada: la mocidade daba la buolta al lhugar, tocando chocalhos, bombo i caixa, chocalhos que representában l ganado de l santo. A las bezes inda me pergunto se esta tradiçon de la nuite de l die nuobe nun serán resquícios de las fiestas paganas de l solstício de eimbierno.
No final de la buolta i de ls antremoços, todo mundo se ajuntaba no meio de l lhugar, al redor de l lhume, para ampeçar l baile até las tantas de la nuite: era l baile de cholas, roupas de pardo, capas, xales i cotras de eimbierno.
L die de la fiesta, apuis de missa fazie-se l pregón para bender todo l que l habien dado al santo: patas, oureilhas, çofinos, chouriças, uobos, maçanas, fogaças anramadas (ua fogaça cun trés ou quatro palos de urze espetados cun maçanas nas puntas i arrebuçados spindurados de filos que ligában ls palos). De muitos lhugares al redor iba giente a esse pregón i cunta-se que tie Arminda Ginja de Malhadas, estaba alhá todos ls anhos.
Hoije, la fiesta ye feita no sábado que quedar más acerca de l die dieç, ou anton no deimingo quando, cume este anho, assi calhou.

Alcides Meirinhos

(testo salido na Fuolha Mirandesa de l Jornal Nordeste l passado die 12

Die de lheinha

2010-01-06T23:47:00.005Z

Santo Antonho

Die de Reis era l die de ir pula lheinha pal lhume de Santo Antonho. Toda la mocidade se ajuntaba, terminaba l sítio - cuncelhiu - adonde ir pula lheinha que era cortada e cargada nesse die, lheinha delgada de carbalho cortada pul pie.

L último anho que dou fé de ber la mocidade acarrear dous carros de lheinha, fui un anho an que la cortórun na passaige de l Touçón de los Barreiros adreitos a la Sierra, na punta de las Oulibeiras: dous carros!! i chubir la cuosta de la Trabiessa si fui trabalhoso. A la cabeçnalha iba un de cada lhado agarrado a la cabielha para amparar l carro que era puxado por pareilhas de moços agarrados a estadulheiras anuladas an maromas esticadas al para delantre ua buona bintena de metros, outros ampurraban agarrados a los borbiones i habie dous que lhebaban dous bareiros gordos para calçar l carro quando las "pareilhas" paraban para çcansar un cibo.

Era un die de fiesta i de rambóia.

Buonas nuites

i nobenas alegres

Martinicos

2010-01-05T00:17:00.003Z

Morában no bárrio de l Palombar, a la selombra d'ua parreira que inda hoije ye teçtemunha de canseiras i cumbersas de soalheiro.

Altino ten dues filhas i péç-me que nietos. Quedo a espera de ls nomes.

Marie Antonha tamien ten dues filhas, mas nun dou fé de ls nomes i Adelina acho que tamien ...

L tiempo loinge de l Balhe pon la maçana macada.

Buonas nuites

i buonas nobenas

2010 i l Nino Jasus de la Cartolica

2009-12-31T11:47:00.004Z

Uns tiempos atrás andaba iou a saber de la cuonta de Nino Jasus de la Cartolica na lhéngua mirandesa i nun la achei. Solo an pertués ye que la bi na anterneta. Assi, i cume esta ye ua lhenda de spráncia i un bózio cuontra todo l que achamos perdido, eiqui la traio neste cibo que sobra de 2009 cul deseio que 2010 seia l melhor anho que cada un puoda querer.

“La lhenda de l Nino Jasus de la Cartolica ye de l anho de 1711 (mil sietecientos i onze) quando Miranda de l Douro staba arrodiada de tropas spanholas i quaije a cair nas manos deilhes porque las sues muralhas eran de muita amportáncia estratégica. L pobo nun tenie ganas de lhuitar porque yá muitos meses que la cidade staba cercada i l eisército que debie de ajudar aquel pobo, benido de Algoso, Outeiro, Peinhas Róias, Mogadouro i Bregáncia nunca más chegaba.
Anton, un nino çcuincido, c’un chapéu de palhas, botou-se a correr pulas rugas gritando acuontra ls spanholes i chamando las personas para lhuitar i defender la cidade. Nistante saliu todo mundo, cun çacholas, machadas, tornadeiras, roçadeiras, fouces i gadanhas, l que tenien a la mano i que pudisse ajudar na batalha, ounindo-se a ls soldados yá cansados e çfalhecidos. Todos juntos ampuntórun las tropas spanholas para fuora de las tierras de Miranda i quando la batalha acabou, las personas buscórun l nino refilon i abintureiro que ls habie ajudado. De nada l baliu i naide l achou, habie dzaparcido.
L pobo ancreditou-se que habie sido l Nino Jasus que eilhi apareciu para salbar la cidade. I lhougo mandórun fazer ua eimaige para poner nun altar de la Sé Catedral. Nesse antretiempo, ua rapaza que na mesma batalha habie perdido l moço, un oufecial de las tropas pertuesas, fizo ua farda de capitán i dou-la al nino. Dende naciu la tradiçon de l dar roupas. Cunta-se que puode poner ua defrente todos ls dies. Muitos anhos aspuis achórun que l chapéu de palha nun quedaba bien cula nobreza de la farda brumeilha de melitar nien tampouco cula posiçón de quemandante i ponirun-le ua cartola.
I que bien que le queda!”

Buonas tardes
i melhores antradas no anho nuobo.

Noite de consoada

2009-12-29T01:35:00.023Z

A St-Laurent estava quase deserta. Não fossem os enfezados enfeites luminosos, a pingar das árvores despidas e famélicas, que pintalgavam os restos de neve arremeçados contra os bordos dos passeios, nem se acreditaria que era a noite de consoada.
O homem, ainda novo, quarenta anos mal feitos, caminhava com passada mole, sem destino, num remar cansado contra a noite infindável. Vergavam-no o peso das recordações que lhe tinham cravado a dentuça no pescoço e teimavam, raivosas, em não lhe dar tréguas.
As mais antigas, nebulosas mas ainda assim felizes, eram fragmentos cada vez mais esboroados das consoadas da infância em Miranda: a crepitante fogueira acesa pelo entusiasmo da rapaziada, carradas e carradas de lenha queimadas num imenso braseiro que alimentavam noite fora as labaredas esfomeadas de chegar ao céu; a missa do galo, na Sé enregelada, com a ladainha do padre a ressoar pelas imensas naves , tão interminável que até impacientava o seráfico Menino Jesus da Cartolinha como sempre regaladamente instalado na sua guarida; o silente regresso a casa, a paz pousada como pombas brancas nos beirais dos telhados, os passos a ressoar nas pedras lisas e escorregadias da calçada medieval.
Nos primeiros anos em Montreal, lar de imigrantes aturdidos em busca de sentido para a nova vida, eram noites tristes, cheias de saudades mal saradas, de lágrimas furtivas da mãe sufocadas pelos cantos da casa, disfarçadas por sorrisos apagados.
Já homem feito, numa fuga constante às fragilidades coladas para sempre à pele, as noites de consoadas eram passadas, nas mais diversas e inesperadas circunstâncias, ao sabor das suas relações amorosas frívolas, inebriantes, sem cadeias. Quando as coisas corriam para o torto, havia sempre os braços abertos da casa dos pais, as eternas bolas mirandesas, o calor duma alegria mais resignada e o vozeirão sadio do pai repleto de recordações. Era a elas que se agarravam todos com a fúria de náufragos num mar estranho a que nunca pertenceram por inteiro.
Estava, agora mesmo, a ouvir a voz do pai: que rapaz este, recordas-te mulher?, não havia presente de Natal que lhe servisse. Só tinha olhos para os canivetes mirandeses, até lhe saltavam os olhos da cara quando via um nas mãos de alguém. Ainda mal se sustinha nas pernas, parecia um cachorrito a saltar atrás de quem lhe mostrasse o dianho dum canivete. - As palavras rudes ensopavam-se de lágrimas ternurentas. - Nunca vi uma coisa assim, o garoto parecia enbruxado.Como é que se podia dar um brinquedo desses a uma criança! Só se fôssemos doidos..
A mãe, sombra diáfana, sorria, passava-lhe a mão protectora pelos cabelos e, sem que eles se apercebessem, ia-se despedindo aos poucos do filho, do marido, soltas, desde há muito, as amarras ao cais da vida.
O falecimento dos pais quebrara a derradeira ligação umbilical aos prados floridos da infância. O fascínio dos canivetes fora, para sempre, assim o acreditara,vencido pelo do mistério das mulheres. Mas com o correr da vida, principalmente nesta época do ano, face a face com as recordações assanhadas, cada vez se apercebia, com mais crueza, da fraqueza das raízes que o agarravam ao chão que pisava, da sua solidão. Uma solidão imensa, dolorosa, que lhe perfurava as entranhas e abria sulcos profundos de tristeza que nada, nem mesmo as mais envolventes aventuras amorosas, podia sarar.

Quando chegou ao Parc du Portugal, as pernas trémulas recusaram continuar a caminhada sem norte, forçaram-no a sentar -se num banco mesmo à beira do fontanário donde o leão de pedra da bica, seca nesta época do ano, o observava meio intrigado. Mais à frente, o padrão dos descobrimentos, esguio e esbranquiçado, na sua frieza pétrea, era sentinela vigilante, indiferente à sua presença. No telhado do coreto, os pombos encolhiam-se uns contra os outros para se protegerem do frio cortante e também não lhe prestavam atenção. Só o manto de neve que cobria a calçada do parque é que rastejava ao seu encontro para o envolver no seu abraço frígido.
Enregelado, estava disposto a erguer-se, prosseguir o calvário da caminhada, quando, assombrado, pressentiu um vulto sentado a seu lado. Sem pinga de sangue, olhos dilatados de espanto, reconheceu logo a figura inconfundível do Menino Jesus da Cartolinha: rosado, a cartola na cabeça, todo aperaltado na sua farpela de cetim bordado a oiro dos dias de festa, um sorriso fraterno desenhado nos lábios infantis.
A um gesto do Menino, o parque animou-se rapidamente. Um grupo de anjos desceu do céu, instalou-se no coreto com um farto instrumental de harpas, cítaras e flautas que encheram a noite com a magia da sua música celestial. Logo de seguida, dois outros anjos, surgidos do frio, desdobraram alva toalha de linho sobre a neve e serviram em silêncio, uma frugal ceia de consoada composta de pão de centeio, salpicão e presunto.
O Menino, sorridente, retirou da algibeira da casaca um belo canivete de cabo de madeira esculpido que ofereceu ao homem.
- Reconheces? É o canivete dos sonhos da tua infância. Podemos começar a cear.
O homem lentamente, num ritual litúrgico, a saborear cada instante, cortou o pão em longas e suculentas fatias, o salpicão em rodelas finas e sumarentas, o presunto em lascas rosadas, com firmeza e uma sabedoria que só podia nascer do fundo da memória ancestral.
Faltava o vinho mas logo da boca do leão do fontanário começou a jorrar um bica-aberta fresco e capitoso que recolhiam na concha das mãos e sorviam deliciados.
Finda a ceia, os anjos recolheram os restos das vitualhas e os instrumentos musicais e evolaram-se, sem ruído, nas profundezas da noite. O Menino Jesus da Cartolinha, um tudo nada mais corado pelos efeitos do vinho, demorou um último olhar nos olhos do homem e preparou-se para partir também.
- O canivete - balbuciou o homem.
A suave mão do Menino aflorou-lhe o ombro.
- É teu. É o teu presente de Natal.
Quando, instantes depois, com passo firme e decidido, o homem regressou ao seu apartamento, com o canivete no fundo da algibeira, era a criança mais feliz do mundo.

FELIÇ NATAL

2009-12-22T16:09:00.005Z