Aquel fin de tarde nun era eigual a tantos finales de tarde antre l çponer de l sol i l tocar de las trindades.
Habie cousas nuobas i quein pudie iba-se arrimando a algun radiico que traie bozes que benien purmeiro de loinge i aspuis iban-se achegando, assi cume las óndias de l mar a ir i a benir meio cortadas por uns pi pi pi i chiadeira que aparecie i dezaparecie.
An riba de la penhica que faie de puial i de lhabadeiro antre la puorta de tiu Delgado i l meio de l camino, ajuntaba-se gente de l bárrio alto a oubir la caixica essa anquanto los oulhares atiraban adreitos a la lhuna tentando çcubrir algua racica de nada que pudisse andicar la chegada de l fuguetón anté aquel queiso quelor de prata por bias de l spelhar de la lhuç de l sol que se habie ancubierto pa los lhados de Sant’Amaro. Se calha estaba tapado pu'l burdión de silbas que l home de la lhuna traie a las cuostas siempre qu’eilha botaba más lhuç!
Quando la sacoran de los lhados de la Molineira, acarreada a la rastra nua corça puxada por dues juntas de bacas, pensaba eilha que eirie a ser metida nos liçaces de la casa, mas fui-se quedando de lhado, u por bias de l peso u por mala gana de los oubreiros que nun le apetecie scachá-la cun miedo de partir las marras i los picos an tanta dureza, u porque Palmira, inda garotica, gustaba de poner las monicas de piedra anriba daquel talho grande feito andor de suonhos i de ganas de ser pursora.
Dezapareciran todas i quedou eilha solica eilhi:
- Á Antonho, mira que puial más liso mos dá esta peinha! I sierbe de lhabadeiro tamien. La bica queda a la mano i nien mos storba a nós nien a Zé para antrar ne l sou quintal. Dezie tie Cremilde.
- Pois então deixa-a ficar. Amanhã já falo com Júlio Prieto para a calçarmos bem calçada não vá ainda alguém ferir-se!
Dito i feito, ne l die a seguir anquanto uns terminaban de arrematar l telhado de la casa, pega-se tiu Antonho i tiu Júlio al redor de la piedra para la calçar. Cada un cun sue palanca de fierro: OU … OU … OUUUUUUUPA! OU … OU … OUUUUUUUUPA! OU … OU … OUUUUUUUUPA!
Estában nisto quando, cu'l peso de la peinha aspuis de se scapar dun calço, spipa-se la palanca de las manos de Antonho e dá-le ua burdoada nua canielha!
Cun dous rudiones, agarra l fierro nas dues manos mira para él mui sério, arreganhando-le los dientes, a los abanones i cun uolhos a botar lhume más brumeilhos que l sou pelo:
-
Olha lá minha Fera! Se fosses gente comia-te! Á tiu Delgado, se calha nun teniedes dientes para tanto! Morena si estaba la palanca essa, mas cume era de fierro … aposto que se fura reçandida d’África i más amerosa inda se bos antolhaba …
Quedou tán anraibado que nunca más mexiu na peinha i tamien por bias desso eilhi naciu l puial que agora staba rodiado de gente a oubir l rádio i a mirar la lhuna.
Todos ancantadicos i you tamien. Uns dezien que essas cousas éran ambençones de los amaricanos, outros dezien que era todo para traer l pobo eiludido i cun miedo, que solo assí se dominarie bien … pus quien çcute l que nun antende deixa por çcutir l que l’anteressa de beras. D’antes cume hoije!
- Mas bós pensais que eilhes chegan alhá? Bien anganados andais! Antón se stebissen nun se bie l fumo de l fuguetón?! Dezie tiu Claudino Checola.
- Nóoo, a mi tamien me parece que nun ye possible un airoplano chegar tán loinge! quementaba tie Joana que anté parecie un angenheiro!
-
Ó homes, mas escutai o que diz o rádio! Não tendes acompanhado as notícias?! Pois! só bos importam essas coisas dos folhetins i de Fátima! Buolbie tiu Delgado.
L puial nun dezie nada i you, pouco más alto que él, iba ouserbando. Sí, porque a mi naide me pedie oupenión. Diç que yá sabie ler mas inda nun sabie antander las seinhas de l mundo! Se calha tenien rezón.
Neste dá openión i nun dá, dixai oubir l rádio, mirai que nun se bei, si se bei, fumo nun hai, puolo tampouco, antre lérias d’uns, leis d’outros i eignoráncia de todos, tiu Delgado bira-se para mi, pon-se agachadico a la mie altura i cun joeilho ne l suolo, çquecendo l’outra gente toda, apunta l cielo i diç debagarico cuntrapiando l’oulhar antre mi, l rádio i las streilhas que a los poucos nacien:
- Os livros são para ler
E o mundo para observar,
Nisso tudo está o saber
Que tu irás precisar!
Oubrigado tiu Antonho. Teniedes rezón!
Buonos dies
i buona suorte
.
Quando m'amostroran este retrato deziram-me que fui tirado al pie de las huortas acerca dal chafariç de baixo. Pu la direçón i altura dal sol estou más anclinado pa las cortinas dal Lházaro al pie de la curralada de los Manjores ou antón antre l ribeiro i los huortos ancostados al lhabadeiro de la puorta de tie Hermínia. Toda esta giente ye d'eilhi: Alcino ... i los outros?!
Retrato tirado por tiu Albino Bara an 1953. Dues moças de Cicuiro. Quien son?
Este retrato deberá ser de amprecípios de los anhos 70.
O mesmo rodado con diferença de alguns anos entre as duas fotos.
Hoije deziran-me para bos amostrar más uas çreijeiras. Las de tiu Cristo, çreijas brancas i docicas que inda muitas bezes l apanhei l gusto. 
Un retrato tirou-lo Chico Checola an 1968 i l'outro tén trés dies.
Hoije mandoram-me este retrato fresquito de la puonte de baixo – de l mesmo sítio d’onde bos smostrei ua prociçón. Hay algues defréncias: uolmos a menos; strada a más; casas maiores i amanhadas; menos puolo i más alcatrán; outros quelores … sien gente!
Este retrato fui apanhado quaije na mesma direçón i de l mesmo sítio do que l que bos mostrei onte:
De béç an quando dá ganas de ir a beber auga a la fuonte de la Senhora, açofinar na fuonte de l Capitán u matar la sede na fuonte de la Buolta. 
Cume bos amostrei trasdonte las bistas zde la puorta de Tiu Delgado, hoije traio-bos eiqui la casa d'el bista de l sítio onde habie l famoso Puial /Lhabadeiro / Peinha de anzonar ... guardadora de stórias i de cumbersas.
Onte staba you a la léria ... i bieno-me a la eideia (assí cume ua çanteilha) l Puial / Lhabadeiro / Peinha resgalguina que habie a la puorta de tiu Delgado. Quedaba más u menos antre essa squinica de alcatrán que aparece an baixo a la dreita de l retrato i l xeixo branco ne l meio de la yerba.
Cume las ganas de screbir nun éran assi muitas i hoije ye Deimingo - die de fiesta pa los católicos - trai-bos ua prociçón. Hai gente coincida.
