Laica

Al salir de missa alhá estaba eilha a la puorta de casa siempre que nun salie cun l’amo pul monte ou a faer de cumpanha al boieiro. Chamaba-se Laica la perdigueira de tantas caçadas de Lházaro i la alegrie de la garotada quando le pediemos para mos dar ua manzada. Quedabamos ancantados cun las hablidades de la perra siempre que mos arrimabamos al cabanhalico de tiu Cassaco solo para ber l deitar, alhebantar, esticar la pata, saltar i anté correr atrás de algue bigarda chena de cuçpinha atirada adreitos al curral de la Abadia.
Bien espierto era aquel bicho que nun lhadraba a ningun garoto nien a los más atrabessados i que faie todico l que le mandaban: tanto iba a guardar las pitas de la raposa, punie a léguas los gatos çcoincidos cume quedaba la nuite anteira a guardar algue arado ou çadón deixado ne l termo de un die para outro, cume ua tarde que Laica nun bieno cun las bacas.
Que l tenerie acuntecido a la perra para nun haber benido cun l boieiro? Mas furan aguardando la sue chegada quando a la hora de la cena, aspuis de quemer las chebicas de berça nua malga meio sboucelhada ye que tiu Furmino dou por falta de la faquita palaçuola de quemer la merenda. Solo podie haber quedado na esquina de l cerrado de lo Siete a la punta de riba de l cabeceiro antre l’augueira e la esquina de la parede adonde habie feito lhume.
Acabada la cena, lampión na mano, bán a dar cun la perra deitada al pie de la dita faca cume se guardasse l maior tesouro de l mundo. I guardaba. Todo l que fusse de l amo, para Laica serie siempre la sue bida.
Aquel die tamien guardaba l esquife negro anriba de la mesa feita altar ne l meio de l’eigreija muda i frie, un die que nós nun tebimos que oubir las ladainhas mal cuntadas de ua “doutrina” de lhenga lhenga dada por catequistas tan analfabetas cume nós nessas cousas de Dius i de la religión. Quien iá tenie pouca deboçón inda quedaba cun menos. L que mos traie eilhi era la oubrigaçón ampuosta por nuossos pais para que nun quedassemos eireijes i por ua eiducaçón que esquemungaba qualquiera un que espreitasse para fuora de l’eigreija daqueilhes curas tan debotos cume l padre Juan.

Daba pena ber aquel animalico a cuincar tan baixico, talbéç cun miedo de acordar l’amo que repousaba antre belas i dous “Padre nossos” dun terço rezado antes de la redadeira çpedida. Tiu Candeias inda le dou dous puntapies para que nun antrasse n’eigreija – que diç que nun era sítio para perros - mas por Lházaro anté la podien anterrar biba que nun s’amportarie nien un cachico i se eilha antrasse nun serie l purmeiro perro a missa. Nien l último! Quejiran trancar la puorta mas assi que antraba algun xaile negro a anrebulhar ua alma, alhá estaba eilha a mirar i a ouliar al para drento, anté que deixoran antrar la perrica. Nun parou durante toda la missa, andaba de trás para delantre, debaixo de l caixón, lhebantaba l çofino i abaixaba las oureilhas, cerraba ls uolhos anquanto fareaba i aspuis lhatie tan lebe que mal se oubie.

Cada béç menos se tomaba atento al cura i más miraba la gente adreitos al bechico triste. Eilha sabie l que era la muorte i nós estábamos a ampeçar a cumprender-la. Eran liçones de bida a cada béç que algue persona se morrie i la garotada salie de la scuola para ber l defunto, ou antón quando acumpanhabamos a nuossas mais n’algun serano a rezar l muorto. Criaba-se cunçéncia de la muorte. La muorte que Laica choraba i que hoije escundemos cume se d’eilha tebissemos la maior de las bergonhas. Deixamos morrer los que más queremos atrás dua canhiça de panho, solicos, nalgue cama de spital antre ua picada cun morfina i un carón de çreija que al derretir pon froles i lhuzicas de quelores nun ultimo mirar pal mundo. Mas Laica nó, seguiu todo l camino antre los quatro que lhebaban l esquife anté l barranco cerca de l cipreste de l cortineiro triste cun piedras mármoles al alto i a la purmeira manada de tierra suobre la madeira a rugir a uoco, caminou pul meio de las eiras de la Cruç anté se anroscar quetica no cabanhal de la lheinha a espera que l’aire lhebasse l cheiro a campo esbaziado que ampestaba l sagrado i la preça de casa.

Nunca más Laica tornou a caçar. I se le benie meia gana, daba ua buolta a l’eigreija, fareaba la puorta de l lhado i tornaba a deitar-se nuns fachucos bielhos antre la lheinha i l carro de las bacas, cun oureilhas murchas i l mirar adreitos a nada.

Buonas tardes
i buona suorte!
.

L'antruido a la puorta de Tiu Praça

Possiblemente este retrato fui tirado por Tiu Praça / Tiu Cantino a la sue puorta. El tenie ua daqueilhas máquinas de trés patas i de anfilar la cabeça no saco de panho negro. A Maria, a Elias i a Tolentino, causo tengan retratos destes, mesmo que nun los quergan amostrar, pido-le que nunca los perdan. Que balor nun tenerá ua eimaige destas para un nieto ou biznieto de tiu Zé ?!?!?!
Lházaro Cassaco - l amo de Laica, la perra más lista que yá se biu - está sentado ne l bombo i tiu Zé Monteiro trai la caixa.
L'outra gente nun sei quien ye mas tie Júlia apunta-los todos. A mi l garotico asparece-se a Diamantino Sanjoanico i talbéç que la garotica çcalça seia la armana.
Pu l'eidade de las personas, talbéç tenga sido tirado cerca de 1950.

Buonos dies
i buona suorte
.

Calachas

À Demingos, mira a ber quando chegan los retratos que tue abó te dou i que són bien belhicos. Mas se nun quejirdes ... amostraremos las çreijeiras a la puorta ou la pereira de las peras tempranas por trás de la casa adonde estaba l quemércio i la dega. Anté de nuite se coincien las maduras! Tu nun t'anraibes que l crime iá prescrebiu. Félç ye que sabie cume era. :)

buonas tardes

i buona suorte

.

Cicuiro Perdido?!?!

L'outro die Cicuiro apareciu ne l Jornal Nordeste.

Diç que está perdida. Ou será "perdido"? ... ahn, se calha ye aldé perdida. Assi iá me calhais!

Mas antón se está perdida cume la achestes bós?

Nun me lhebeis a mal, mas al melhor bós ye que bos perdistes i aspuis dezistes que fui essa "tierra".

Nun dapranderiedes la cuonta de Abílio Modarra i de la sue Catraia?!?! essa tamien andaba perdida ...

Un die destes quando benir a modos iou cunto-la, a nun ser que algun l querga faer por mi, cousa que agradeço.

.

Buonas nuites

i buona suorte.

.

Puntones de l Molinico

Destas paredes i alrededores saliran muitas piedras para aguçadeiras!

.

Buonas nuites

i buona suorte

.

Armandina

Aquel anho la besita al santuairo de la Bierge de l’Aparecida fui menos apressiado. L nieto yá tenie cinco anhos i nun era neceçairo andar cun panhales nien cun lheite angarrafado que el sorbie pu la teta de borraixa.
Ajoeilhada delantre de l altar pensou na sue Birge de l Rosairo i nas lhágrimas que se escurrien de l curaçón siempre que pensaba naqueilha eimaije de santa cun pelo quelor de ouro que quedaba eilhi quetica na eigreija donde la batizoran. Fazie quarenta anhos que deixara Cicuiro cul sou home i la filha, fugida de fomes i canseiras an busca de dies menos agres i más calientes do que naqueilha tierra çquecida ne l fin de mundo. Achou l calor i antruidos cume nunca manginou mas aquel lhembrar de las boiadas no Balhe de la Baglina nien un die le saliran de l’eideia: L pai, la armana, l armano, cunhados i suogros, todo quedara para trás. Nun fura la cumpanha de l’home, de la filha i de los nietos i todo nun passarie d’un çterro. I esse anho eilhi estaba eilha outra béç delantre de la Santa ora rezando ora quedando quetica cume un reixenhor amansiado a pedir fuorças para poder tornar un die a sue casa. Si, que la sue casa era lhougo eilhi antre l’eigreija i l ribeiro.
Furan salindo daquel sagrado maior que cien eiras de Bouça Çanca cun las promessas cumpridas i los deseios pedidos, adreitos a ua sierra mui alta, anté la pensón que l genro habie guardado para çcansar dous ou trés dies cun toda la família naquel lhugar antre sierras, loinge de l mar i de l rebolhiço de la grande cidade. Furan chubindo chubindo anté quedar bien ne l alto i donde se podie abistar meio mundo.
Inda se you bisse los pinhos de tiu Primo na Cándena, pensaba Armandina. Esses abistaban-se zde l cabeço de Mogadouro, mas daqueilha Mantiqueira … solo se bien cidades grandes, uas seis ou siete. Al sentir la mano de l sou home ne l ombro, apuntou adreitos al mar, agarrou-le los dedos cun fuorça i dixo-le cun la bóç a tembrar que nun passarie outro anho sien beber auga de la fuonte de la Senhora. I inda haberie fuonte de la Senhora?!
Nien meio anho passado i yá eilha i l nieto estaban na carreira de l Santos que bai de Lisboua a Miranda. Habie dues nuites que nun dromie i l suonho tamien nun l apertaba. De Pertual pouco habie coincido a nun ser la biaije anté l barco que la habie lhebado pal Brasil, mas parecie todo tán zfrente. I staba: l pai, un santo i buon home i los suogros yá habien muorto, l cunhado reformado de la Alemanha, fuora las casas, las estradas, la lhuç por filos, l’auga an canhos, tratores, alcatrán i gente bielha de la sue eidade i nuoba que nunca saberie quien era nien que la bisse a la sue puorta.
L curaçón batie más fuorte quanto más cerca estaba de l lhugar. Salida de la carreira an Miranda, inda tenie que apanhar outra para Cicuiro. La de Lisboua quedaba eilhi.
Dous ou trés rapazolas de fardeles cun quelores que tamien iban para aqueilhes lhados, era la carreira de ls estudantes, ajudoran-la a meter las malas. Si habie crecido Miranda! De ua cousica an drento de las muralhas puso-se quaije anté Peinha Branca! Yá nun pensaba dreito solo de manginar cume ancuntrarie la sue tierra mas inda le pediu a l cundutor que la abisasse quando chegasse a Cicuiro.
Abisar quando chegasse a Cicuiro? Bá, nun sei porquei, pensaban ls estudantes i l cundutor. An Cicuiro nun demudaba nada a nun ser los uolmos que se habien secado todos i un ou outro palheiro caído, mas esso nada, que l de más estaba eigual al que siempre coinciran! Quien serie aqueilha persona i l garotico a falar brasileiro? Al melhor andaba perdida ou buscaba algun amigo ou pariente por aqueilhas paraiges.
Aquel oulhar miraba para todo: la estrada, las touças, l cielo, las personas, nun le escababa nien mosca. La carreira parecie parada antre l semitério i l meio de l lhugar quando se oube ua bóç:
- Cicouro!
Que poulo dou l curaçón! Si aguantarie? Armandina mirou pa la puorta, aspuis para todos, agarra la mano de l nieto cun fuorça i al pisar fuora de la carreira, antre choros i a çelhuçar, a muito custo inda cunseguiu dezir … “o … meu … Cicouro”. Naciu-le ua bida nuoba. Agora si podie chorar a la farta las lhágrimas que quedoran guardadas toda la bida. Ai cachicos que balen todo l que ai neste mundo i esse era un d’eilhes.
Ancubriu-se la carreira para alhá de Sant’Amaro i cun las malas de biaige inda ne l meio de la estrada, todo mundo cuntinou calhado a oubir l ribeiro que naqueilhes uolhos corrie i que a ls poucos ceboran ls manantiales lhacrimales de trés ou quatro estudantes que se ancantóran a ouserbar l milagre que ua tierra puode faer a ua filha que l bejita aspuis de tanta auga haber nacido na fuonte de la Senhora.

Buonas nuites
i buona suorte
.

Puntones de los Uolmos de la Rodeira

Al mesmo tiempo que falamos nas personas de l Balhe de la Baglina, péç-me que tamien nun será mal de todo se furmos besitando l termo i falando suobre el.
Assi, cuntinuamos hoije ua biaije por puontes i puntones (yá falemos de la puonte de Matáncia i de l'outra acerca de l nial de Picanço), mas por agora (falta-me Baldeglina, la Trabanqueira, la Buolta de l lhado de Matáncia, Fuonte Espino ...) i dalguns se calha yá nun se bos acorda d'eilhes.
De l lhado squierdo deste camino inda ai están los puntones que hoije por bias de chober menos quaije naide usa. mas están alhá!
La cria iba pul camino i las personas por la calçada zde la cortina de tiu Andreia anté acerca de l lhugar.

Buonas nuites
i buona suorte
.

Çreijeiras de tiu Cristo

Hoije deziran-me para bos amostrar más uas çreijeiras. Las de tiu Cristo, çreijas brancas i docicas que inda muitas bezes l apanhei l gusto.

Mas nun fui you solo.

A mi inda me iban calhando las de riba quando se chegaban d'anriba de l burro ou quando tie Oulinda me dezie para me chubir neilhas, mas los perros de tiu Calachas cume eran más gulosos i solo le gustaban la más docicas, quemien las que quedaban ne l suolo yá passadas! Nien quedaban que eilhes nun le daban tiempo. Péç-me q'inda las apanhaben ne l'aire.

Ah! I la gente que está no retrato esse die nun quemiu çreijas, quemiu bitela que a mi deziran-me-lo.

Buonas nuites

i buona suorte
.

Agricultura biológica

Un die destes al passar an Sant'Amaro al pie de la cruç, dei ua espreitadela pa la binha que fui de tiu Delgado i que agora está partida an trés.
Na de l meio - la de Fernando - chamou-me a la atençón ua semanteira de antremoços antre balados.
Quedei un cachico a ouserbar aqueilha ambultura i tirei-le l retrato que bos amostro.
Diç que ye agricultura biológica i que assi nun ye necessairo botar-le nitrato por causas que aspuis de l'antremoçal quedar cobierto por la arada bai-se a apodrecer e a azotar la tierra.
I inda ai quien diç que solo se daprende cun doutores i angenheiros ... muito si, mas nun chega.

Buonas tardes
i buona suorte
.

No Baldión

Trés retratos d'ua teçtemunha de Cicuiro. L nial mudou i yá nun ye no uolmo a la puorta de tiu Luissito. Mudou-se para un freixo nos cerrados de l Prado.

Mas qualquiera die torna a los uolmos que yá bán bien altos i gordos. You bi dous que yá daban las baras d'un carro de bacas. Chico Bonito ye que sabe, fui el que me los amostrou.

A ber se alguns crecen no meio de l lhugar para botar uas selombras i scunder niales de pardal. Se a algun se l'antolhar i se la junta nun fur contra, que se pongan dous u trés ne l canteiro al pie de l lhabadeiro.

.

Buonas nuites

i buona suorte

.