Los triteiros

Cuonta salida no Jornal Nordeste de 28 de Outubre de 2010

Chegórun un die los triteiros a Cicuiro. Trazien un martielho i ua sartián, batien neilha i dában la buolta al lhugar para fazer propaganda. Habien pedido un curral para atuar i fui-les dado l de la Tie Fona (l curral de Tiu Bara, ambaixo de la eigreija) i alhá íban fazendo propaganda. You i miu armano bien mirábamos para miu pai mas nun teniemos coraige de l pedir. Al fin de cena dixo assi el:

- se quereis ir a ber los triteiros anchi las gorras de patatas i ide.

Nós, cumo denheiro naquel tiempo nun habie, alhá fumos adreitos al curral para ber los artistas, mas la mulhier de l triteiro dixo que patatas yá tenie muitas i nun mos deixou antrar. Quedemos eilhi a la puorta a espera. Antrórun alguns que tenien denheiro, cumo Tiu Donis Marcos (que se morriu no die de la boda de tie Sabel Pedrica quando botaba uns foguetes … rebentou-le na mano, amalingrou-se … desso se fui) i nós nada. Fumos para casa, alhá habie ua fogaça de centeno anriba la mesa tapada cua toalha de lhino. Nuossos pais yá estában deitados, miu armano más nuobo que you, cul faco cortou un cacho, apuis you cortei outro i alhá tornemos nós cul pan a tener cun la tie de l triteiro. La mulhier mirou pal pan que nós lhebábamos i pal denheiro que eilha tenie, agarrou-lo i dixo: - antrai!

Antremos. A la punta de baixo de l curral habie un grande munton de estierco yá furmentado, l estierco tamien furmenta quando bien feito, tem un cheiro acidulado caratelístico. L furmiento fai calor, l curral tenie un calor moderado cun sou cheiro próprio. Los lhabradores yá están aquestumados, nun estranhában. Los romanos até tenien na sue relegion un Dius Estercorário. Eilhi estaba resguardado por palos, tabras i galhas adonde las personas se íban aquemodando los que antraban a espera que ampeçasse. Por fin antrou l triteiro i dixo:

- you preciso duns rapazes! quien me ajuda? Ben acá, tu que antreste sien pagar, dixo para mi. You habie pagago mas sien denheiro, era solo troca de predutos porque denheiro nun habie.

- Ben, ajuda-me a fazer l que seia preciso i you mandar.

Saltei para alhá.

- Bamos a quemer este jornal! Coraige, mas cuidado! sien lo angulhir.

Atirei-me al jornal por ua punta i el por outra. Faziemos que quemiemos i apuis atirábamos fuora.

- Catanxo! Pareces un lhambon, tu sabes lo que comiste? Este jornal estaba ambenenado. Agora tenemos que tirar l beneno.

Miu armano, dous anhos i meio más nuobo que you, quando oubiu que aquilho estaba ambenenado ampeçou a chorar:

- Ai! Ai! miu armano nó! You nun quiero que se muorra, ai ai que inda se bai a morrer.

You, todo calmo porque sabie que nun era sério, sabie que era ua tramóia. Los que estában alhá rírun-se cun miu armano i dezien que el era l que más fazie rir. Mandórun-lo calhar.

- El está ambenenado mas nun se bai a morrer, dixo l triteiro.

Miu armano, cun cinco anhos i meio, nun defrenciaba l que era de beras ou a representar.

- Quieres que te tire l beneno José? Anton bira l culo pa la giente para que eilhes beian salir l beneno.

Dou-me un copo de auga a beber, you bebi i apuis cul funil na parte de trás de las nalgas apanhou ua auga amarielha para outro copo. Alhebantou alto i todo mundo batiu palmas, l beneno habie salido i miu armano parou de chorar.

Chamou outros rapazes i dixo para tiráren las gorras que puso colgados nun cordel. Quando puso l último caírun-se todos.

- Deixai-los cair, dixo l triteiro.

Passado más un cachico i apuis de fazer uas gigajogas dixo:

- Agarrai-los i esfregai-los na cara cumo you fago!

Esfregórun i quanto más esfregában bás anfarruscados de carbon quedában. Risada giral de doler la barriga!

Apuis dun espetáclo de robertos que fazírun rir i ancantar todo mundo, alhá acabou más un serano i l miu purmeiro die de magie a troco dun carolo de centeno.

Cuonta ditada pul Padre Zé, dando fé de sous tiempos de nino.