Çreijas brancas

L’ alberoto i l rugido de las máquinas atelundraba toda la Senhora, retumbaba nas cortinas de la Ferreira i tornaba pal Bárrio Alto adonde las personas más aquestumadas a oubir la chiadeira de los carros de bacas de tiu Branco no acarreio, pronto se furan arrimando a la polareda i al esgaçar de galhos salagres cume menudas na ramalhada.
Metie duolo ber aqueilha arrinqueira de çreijeiras brancas, uas cinco ou seis, birada caras al çponer de l sol, guardianas de l camino que chubie adreitos a la casa de Tiu Cristo cume ua queluobra a buoltas para melhor ancarrapitar la cuosta. A cada palada no tuoro ou na rama era cume se me estebissen a belhiçcar ou a dar uas buonas lambadas cume a las bezes me caien anriba por bias de algun atrasiar juldeiro aspuis de l tocar las trindades … ber esmenhuçar çreijeiras tán fermosas, ua deilhas daba brancas i brumeilhas, que l maior mal que habien feito era cunsolar gentes i páixaros cul doce fruito de carón duro fazie chorar la fuonte que tanta çreija lhabou, apanhadas de l suolo ou roubadas dalgun galho. Nun haberie más sítios para poner casas?! Lhougo na barreira soalheira de piçarra branda an frente a la casa de quien eilhi splanchou i dou agarimo a las armanas de la çreijeira de los Melindros (más tarde de tiu Gin) que a un tiro de lapada quedaba guardiana de todas las outras!
L camino quedou más alto, las paredes de las huortas quaije tapadas, la fuonte de la Senhora esquecida i las casas de tiu Coxo i de Tiu Maraxo acupórun l campo de l camino i de las çreijeiras. I fui tiu Emílio que ajudou a matá-las, tiu Emílio que antón bibie na casa que habie sido de sou abó, Emílio Rá.
Tiu Emílio Rá, pai de tiu Xanola, de Tiu Cagón, de Tiu Lazarete (Lázaro Rá) i de tie Hermínia (la mulhier de tiu Cristo), era guarda an Miranda i cunta-se que un die biu, nua de las sues rondas, uas çreijeiras que dában çreijas brancas! Cume an Cicuiro las çreijeiras se dában bien, tratou lhougo de poner i anxertar a la sue puorta aqueilha culidade de tán gustoso fruito. Zde antón para cá, más ou menos maduras, cun más ou menos cocos, nun hai persona ou milpiendena que nun le guste la decendéncia de las puias de tiu Rá.

.

Buonas tardes

i carones çcarnados