Al mirar para este retrato i pal puial adonde tie Marie da Cruç stá sintada bieno a la mie eideia un perro de sou nome "puço". Era un perreco de Arlinda, inda nuobico, quelor de burro a fugir i siempre cun ganas de fiestas cume quaije todos ls perros pouco más que mamones.Antón, naqueilha nuite, aspuis de la cena de lhimpa an casa de tie Marie iou i Ilídio Patarrin(?) - se la mimória nun me atraiçona - fumos pa la ruga i quedemos meio sintados nesse puial c'ua bota de bino nas manos. Al ber l perreco arrimado a nós, de rabo a çaracotear botemos un arrespincho de bino pal çufino que nien meio sigundo demorou a ser lhambido. Á! tu gustas de pinga, pensemos nós, anton bamos a ber cume te aguantas a buer a la catalana. Un pega no perro de boca abierta i l outro apertaba la bota, quanto más un apertaba más l perro bebie.
Feita la "perrice" alhá l animalico se fui, meio andeble de las patas, más la sue ama adreitos a casa.
Diç que lhatiu toda la nuite, bien podie, cun meia bota de bino no bulho!
A partir daquel die, nun passaba iou ua beç a la puorta de tiu Andreia que l perro nun me lhadrasse a "agradecer" pula borracheira que apanhou.
Çculpa puço.
Buonas tardes
i buonas pingas
4 comentários:
Guapa stória esta nun mirandés quelorido
Que lafraus!...
Cuitadico de Puças.
-Que ls buis antes de lhuitar ls amborrachában quaije to l mundo sabie, porque quedában tuortos i cumo to ls borrachos nun abandonában l terreiro.
-Agora ls perros ye que nun sabie!.....
Á Manuel, serie quelorido para "puço" porque a cuincar toda la nuite solo podie ser por mirar las streilhas. Cume gusto de te ber porqui. Un abraço.
Delaide: lafraus?! ... eh eh eh ... yá bien tiempo que nun me falában essa palabra. I mira que inda la oubi un buono par de bezes, al loinge i acerca:). solo nun oubi más porque hai siempre cousas que inda hoije nun se cuntan!
Faustino: ye cume bés, estamos siempre a daprander. uas buoltas por Cicuiro i berás que até Tiu Cagón - de que iou mal dou fé - mos fai mejar cula risa.
Enviar um comentário