Cunsoada

Inda l sol nun s’acabou de çponer i yá pulas chubineias se escapa la brancura salida de la urze i de la carqueija, purmeiro meio a miedo que l’aire bén friu, aspuis más fuorte ampurrado pul calor de galhas de freixo a çfazer-se an chamardielhas saltadoras antre un cepo i ua manada de guiços sobrantes de l cortadeiro. Por todo l balhe nace ua nubrina cun cheiro a monte, ou será a chougarço? ou a escoba? ou a urze? un anubrado andeble i delgadico antre l aire caliente i l friu de la gelada que nunca sal de l absedo, assi cume ua cama feita a modos para anjos guardadores de las almas que se bán arrimando al casariu de piçarra i cantarie arrespinchado donde adonde por algun azul ou amarielho ocres.
Restralha l carambelo ambaixo de las cholas de gente cargada de feixes de feno i de palha a camino de las manjedouras ou de la cama pa'las béstias i que se quier más seca que an qualquiera outro tiempo. Gente amugatada pul peso de la carga i pensamiento adreitos al sobrebibir no die de manhana cun cinco crouas para quatro sardinas i uito bocas. Talbéç hoije, biesperas de cunsoada, la tie ponga un cachico de barbada no pote de las batatas cun berças, ou antón un toucinico de la masseira inda anrebulhado an sal a modos de ser assado no brasedo culas tanazes a fazer de greilhas.
I bai birando más un solstício de sol baixo assi cume l mirar de las gentes adreitos al sustento que los baia mantenendo neste mundo. La palabra ye sobrebibir … más un anho, un Eimbierno, ua Cunsoada, un presépio ambaixo de l carrasco, mofos i algodón.
- Antón Juán, hoije cume ye die lomeado tenes buono almuorço …
- Sí! Batatas suobre batatas i un cacho de barbada a cozer!

Inda hai Eimbiernos i Cunsoadas, presépios i algodón a fazer de niebe, cun más ou menos mofos, carrasco i anubrados de fumo que són seinha de trindades no siléncio de lhumes a fazer fiesta.
.
Buonas nuites
i cunsoadas alegres