Antre l'uolmo de la cigunha i las huortas de la Senhora, nua casa ancostada a la parede de las cortinas bibie un casal, se calha al casal más dezamparado i pobre de todos.
Habien benido de l'Arjantina, onde la tie habie nacido i adonde Tiu Luissito stubo eimigrado.
Nun tubiran filhos nien dou fé de famílias más chegadas. Tie Sessária péç que traie siempre cun eilha las soudades de las pampas.
Tiu Antonho Andreia e tie Ster péç-me que temoram cuidado neilhes quando yá staban muy belhicos. Siempre ay uas almas buonas no mundo!
Tiu Antonho Pedrico habie sido guarda an Lisboua, falaba fidalgo i era mui anzonas. Andaba siempre ne l sou huorto - adonde Abraião aumentou la casa e fizo l garaije pa'l altemoble - cun ferragachos chabicas.
Quedou famoso l sou tarantán spetado nun bareiro ne l meio d'ua maçaneira na sue binha de Peinha Redonda. Diç que era para spantar las melras i las mielpiêndenas mas quando you passaba pu'l camino anriba dal burro, a la purmeira bóç parecie un anxame de paixarada a scapar-se de la figueira e de las parreiras de uba bastarda.
Ah Senhor António! aqueilha lhata tocaba bien mas péç-me que era para ansinar los figos a las gralhadas.
Era armano de tie Sabel Pedrica, casado - nun me acorda l nome de la tie lisboeta(?) - sien filhos, postura de home fino, calhado e de bun trato, talbéç por causas de l tiempo que stubo por fuora. Sabie star.
E hoije si me parece que nombrei toda la gente sien filhos ou que nun se casou.
Buonas nuites
i buona suorte
.
Sem comentários:
Enviar um comentário