Al die de los molinos

Cume dizen que hoije ye l die de los molinos, traio-bos eiqui la bóç de l Padre Manuel Preto que se calha naide cume él retrata tán bien l trabalho de l molineiro.

Ne la scrita oureginal:

Eilhi Naci Iou

La casa de l’molino, antriçadica
Antre la ribeira e la punta de la calêndra,
Toda l’auga bebê por três canales:
Dôs de las pêdras, alveira e morneira,
Outra, más lharga, de l’pisóm…

E era ua música de mil demonhos,
Sêm parar, nêm de nuite nem de dê!
L’s tarabêlhos:tatarará!
E l’s malhos: pómpóm, pompom!

Ouvê-se de las Peinhas de Gordo,
De la crona de la Dôrna,
De la punta de las Antraugas
E de l’alto de l’Castrelhóm.

Se l’aire venê de baixo,
E l'tempo stava de lei,
Para quêm venê de Spanha,
Iá s’ouvê no Alçapóm!

De toda parte eilhi acudê gente,
Cum burros cum albarda e sêm albarda,
Cargadicos de sacos que moler,
De xergas e burelas que pisar,
E outros venên só para ver…

Gente de Samartino,
Avelhanoso u Angueira,
La Zpeciosa e Zenízio,
La Prôva e Infainz,
Cicuiro e Costantim,
Vêlhos, moços e moças,
Era um ir e venir
Que num tenê parar,
Que num tenê fim!

Fusse einvêrno u verano,
U primavera u outonho,
Sêmpre s’ouvê de las bestas
Um roznadeiro medonho!

E antóm eran seranadas
A la lhuz de la candeia,
A cuntar lhonas e a rir,
A filar e a fazer meia!

E quando l’sônho apertava
Acabava-se l’berreiro:
Uns deitavan-se na cama,
Outros no sôlo u no scanho,
Outros iban p’l’palheiro!

E nas palas de l’s rodreznos
A rodrar, sêmpre a rodrar,
Desfazê-se l’auga an scuma
Cumo la nêve a brilhar.

Tatarará, pom, pom, pom,
Era l’molino a moler,
Era l’pisóm a pisar,
Era l’pardo a tomar côrpo,
Era la tolba a vaziar.

“Dlim, dlim, dlim,
L’pan iá stá no fim!”
(Era l’chocalho a avisar).
E l’pai u la mai,
U Zé Luis u Manuel
U Marê u Abel,
Tenên que se lhevantar
A colhé’la farina
E outro saco a botar.

- “Tan, tan, tan! – stá seca l’arca!
Tan, tan, tan ! – quêro más auga! "
(Era l’pisóm a chamar).

E antóm algum de la casa
Tenê que s’alhevantar
A botar auga calênte
Para la pisa molhar.

Mas ai, quando venên
A anaugar la raneira
Las terribles anchenas,
Parava molino e pisóm,
L’auga metê-se na casa
E eran trabalhos e penas!

Ai, quantas vezes la mai,
Quando sentê l’auga a antrar
A chorar se lhevantou!

Ai, quantas vezes la pobre,
Chapuçando chapuçando
E chamando po’l’sou nino
A la sô cama chegou!

Ai, quantas vezes, ai, quantas,
Cum mêdo que s’afogasse
Al sou peito l’apertou!
......................................
Aqueilha cama era la mê,
E aquel nino era iou!

.