Avelino Torrão éra l abó de Óscar, de Mário Furriel i de Cristina, antre outros. Éra armano de tiu Primo Torrão, l abó de los Primos (Demingos, Delfin, Belmiro, ...).Stubo de guarda an Custantín adonde chegou a cabo por bias de ua grande apreensón de contrabando (ua boiada) alhá pa los lhados de la Ourrieta de la Guerra.
Diç que nun die de folga - él andaba meio çcunfiado que passaba cuntrabando para Spanha ne l tiempo de la Guerra Çebil i aspuis - seguiu los guardas que stában de patrulha i biu que habien ido adreitos al Camino Mourisco.
Antón él, ne le meio de ua nuite scura cume l péç fui-se an santido cuntrairo.
Aspuis de un cachico a sperar ne l meio de uns touçones, que inda nun habien sido rebuoltos ne las "Campanhas do Trigo" de Salazar, dou-se cuonta que la boiada staba a passar ne l meio de l balhe.
Ampeçou antón a rodiar l contrabando mui legeiro i botando bozes siempre zefrentes cunsante l sítio onde staba.
Los contrabandistas, todos acagaçadicos pensando que éran meia dúzia de guardas (tantos cume las bozes zefrentes que tiu Abelino faie) scaporan-se a siete pies antes que inda fussen presos tamien.
Quando ampeçou a clarear l die agarrou la boiada i metiu-la a la puorta de l posto. Habie ganho la nuite, la semana i l més. Diç que por esso fui promobido i inda le doran l suoldo eigual a un anho de trabalho!
Mas amostrou que de burro e medrunco nun tenie nada!
Buonas nuites
e buona suorte!
Sem comentários:
Enviar um comentário