Passo todas las manhanas por ua rue guardada an d'ambos lhados por çreijeiras antressacadas cun magnólias. Estas, las purmeiras o botar frol, trazen la primabera, mas quando la frol cai i las fuolhas ponen todo a berdegar, arrebentan las çreijeiras: manhuços de branco a rir-se pa las pessonas que nien tiempo tenen de ouserbar la albura nacida da tanto botón. Hai uns dies que están assi a sorber l sol çpejado a manadas nestes purmeiros dies de primabera. Todas las manhanas, na mesma esquina de l passeio alhá está aquel floreiro branco a relhuzir n'ua brancura que nun aparenta berdadeira nien feliç.
Parei antón, arrimei-me al tuoro i mirei cada galho de punta a punta. Parecie gelado, quieto, cume se houbira salido de la fábrica de las froles de plástico: nien ua abeilha al redor para amprenhar esta frol ... i aqueilha ... i la outra ... Nada! l zonido de anxame eran motores d'altemobles i camenhones. Eilhi tan solo un floreiro alto a anfitar l camino de la giente apressiada.
Buonas tardes
i buona suorte
Sem comentários:
Enviar um comentário