Manolacas

Buonas nuites,

Hoije al final de la tarde cumbidoran-me a porbar uas quemenéncias adreitos al mar: selada de polbo, anguilas de escabeche, bacalhau cume nun se puode dezir que yê ua praga i se l senhor padre Paulo me oube inda me lhieba a la rastra cul sou cabalho, çorda cun polbo frejido ... you sei alhá quantas culidades más de charrascas puniran a la mie frente.
Çpenhiquei pouco de cada cousica mas si estaba buono. Anté se lhambien los dedos.
I you scusaba bien de bos cuntar esto mas estou cun eideias de bos anaugar cun la gana!
Yá uns meses que yera caldo de berças ou caldo de freijones, caldo de garbanços ou caldo de nabiças, caldo i caldo i más caldo! Nien l más deboto por caldo se aguanta. Algun die haberie que pecar. I pequei. Cun gusto mas pequei, á mai se pequei, l pior de la cuonta bai a ser la peniténcia que tenerei que pagar por esso ... que seia antón.
Mas la parte melhor fui quando cheguei a casa i abri la maleta esta de los botones para benir a ber se algun de bós nun se haberie escapado pul carreirón de la Lhagonica adreitos a Mobeiros atrás dalgua boieira espanhola. Se assi fusse anté que nun me amportaria, la carne ye fraca ... l que nun podereis ber, se bos scapardes, ye l'home que ten andado siempre por anriba de l Balhe assi cume un anjo de la guarda a dar fuorça para qu'este baldiu cunsiga los sous perpósitos. Chama-se Manuel Carvalho, nieto de tiu Manolacas i a partir de hoije eiqui ponerá l que achar por bien, an pertués ou an mirandés.

Bien benido Manuel a la casa que siempre fui tue.

... i buona suorte
.