Armandina

Aquel anho la besita al santuairo de la Bierge de l’Aparecida fui menos apressiado. L nieto yá tenie cinco anhos i nun era neceçairo andar cun panhales nien cun lheite angarrafado que el sorbie pu la teta de borraixa.
Ajoeilhada delantre de l altar pensou na sue Birge de l Rosairo i nas lhágrimas que se escurrien de l curaçón siempre que pensaba naqueilha eimaije de santa cun pelo quelor de ouro que quedaba eilhi quetica na eigreija donde la batizoran. Fazie quarenta anhos que deixara Cicuiro cul sou home i la filha, fugida de fomes i canseiras an busca de dies menos agres i más calientes do que naqueilha tierra çquecida ne l fin de mundo. Achou l calor i antruidos cume nunca manginou mas aquel lhembrar de las boiadas no Balhe de la Baglina nien un die le saliran de l’eideia: L pai, la armana, l armano, cunhados i suogros, todo quedara para trás. Nun fura la cumpanha de l’home, de la filha i de los nietos i todo nun passarie d’un çterro. I esse anho eilhi estaba eilha outra béç delantre de la Santa ora rezando ora quedando quetica cume un reixenhor amansiado a pedir fuorças para poder tornar un die a sue casa. Si, que la sue casa era lhougo eilhi antre l’eigreija i l ribeiro.
Furan salindo daquel sagrado maior que cien eiras de Bouça Çanca cun las promessas cumpridas i los deseios pedidos, adreitos a ua sierra mui alta, anté la pensón que l genro habie guardado para çcansar dous ou trés dies cun toda la família naquel lhugar antre sierras, loinge de l mar i de l rebolhiço de la grande cidade. Furan chubindo chubindo anté quedar bien ne l alto i donde se podie abistar meio mundo.
Inda se you bisse los pinhos de tiu Primo na Cándena, pensaba Armandina. Esses abistaban-se zde l cabeço de Mogadouro, mas daqueilha Mantiqueira … solo se bien cidades grandes, uas seis ou siete. Al sentir la mano de l sou home ne l ombro, apuntou adreitos al mar, agarrou-le los dedos cun fuorça i dixo-le cun la bóç a tembrar que nun passarie outro anho sien beber auga de la fuonte de la Senhora. I inda haberie fuonte de la Senhora?!
Nien meio anho passado i yá eilha i l nieto estaban na carreira de l Santos que bai de Lisboua a Miranda. Habie dues nuites que nun dromie i l suonho tamien nun l apertaba. De Pertual pouco habie coincido a nun ser la biaije anté l barco que la habie lhebado pal Brasil, mas parecie todo tán zfrente. I staba: l pai, un santo i buon home i los suogros yá habien muorto, l cunhado reformado de la Alemanha, fuora las casas, las estradas, la lhuç por filos, l’auga an canhos, tratores, alcatrán i gente bielha de la sue eidade i nuoba que nunca saberie quien era nien que la bisse a la sue puorta.
L curaçón batie más fuorte quanto más cerca estaba de l lhugar. Salida de la carreira an Miranda, inda tenie que apanhar outra para Cicuiro. La de Lisboua quedaba eilhi.
Dous ou trés rapazolas de fardeles cun quelores que tamien iban para aqueilhes lhados, era la carreira de ls estudantes, ajudoran-la a meter las malas. Si habie crecido Miranda! De ua cousica an drento de las muralhas puso-se quaije anté Peinha Branca! Yá nun pensaba dreito solo de manginar cume ancuntrarie la sue tierra mas inda le pediu a l cundutor que la abisasse quando chegasse a Cicuiro.
Abisar quando chegasse a Cicuiro? Bá, nun sei porquei, pensaban ls estudantes i l cundutor. An Cicuiro nun demudaba nada a nun ser los uolmos que se habien secado todos i un ou outro palheiro caído, mas esso nada, que l de más estaba eigual al que siempre coinciran! Quien serie aqueilha persona i l garotico a falar brasileiro? Al melhor andaba perdida ou buscaba algun amigo ou pariente por aqueilhas paraiges.
Aquel oulhar miraba para todo: la estrada, las touças, l cielo, las personas, nun le escababa nien mosca. La carreira parecie parada antre l semitério i l meio de l lhugar quando se oube ua bóç:
- Cicouro!
Que poulo dou l curaçón! Si aguantarie? Armandina mirou pa la puorta, aspuis para todos, agarra la mano de l nieto cun fuorça i al pisar fuora de la carreira, antre choros i a çelhuçar, a muito custo inda cunseguiu dezir … “o … meu … Cicouro”. Naciu-le ua bida nuoba. Agora si podie chorar a la farta las lhágrimas que quedoran guardadas toda la bida. Ai cachicos que balen todo l que ai neste mundo i esse era un d’eilhes.
Ancubriu-se la carreira para alhá de Sant’Amaro i cun las malas de biaige inda ne l meio de la estrada, todo mundo cuntinou calhado a oubir l ribeiro que naqueilhes uolhos corrie i que a ls poucos ceboran ls manantiales lhacrimales de trés ou quatro estudantes que se ancantóran a ouserbar l milagre que ua tierra puode faer a ua filha que l bejita aspuis de tanta auga haber nacido na fuonte de la Senhora.

Buonas nuites
i buona suorte
.