Perros Spanholes

quemércio de la filha de l "Goebero", na Lhuç

Habien terminado faer ua rambóia, cada qual lhebaba ua pieça de fumeiro, menos Antonho i l’armanico Manuel respunsables por la fogaça. L bino tenerie que benir de Mobeiros, más barato que l palheto de la taberna de tiu Xagatas.

Todo cumbinado para aqueilha nuite, juntan-se nos rodeinhos de Bouça Çanca. Ir i benir nun le lhebarie más de ua hora i meia, ou menos.
Atrabessada la raia i acerca de los castanheiros, todos calhados i an carreirina yá cul cheiro a escabeche de l quemércio de tiu Pedro, saltan-le de rumpón los perros de l ganado que drumie na corriça acerca de l camino. GAU GAU GAU GRRR … GAU GAU ..

Tanto cuidado para nun faer strelhouço i sal aqueilha bicharada toda a lhadrar tanto cume se houbira bido l lhobo. Se los carabineiros oubien, estaban amolados: alhá quedaba la rambóia sien bino i sien escabeche cun azeitonas.
Manuel, l más nobico, yera la purmeira béç que passaba para Spanha cume aprandiç de cuntrabandista i assi que se biu seguro an casa de l "Goebero" de Mobeiros, aspuis de l susto de la matilha, mira l restro de la quadrilha i cun ar de çcubridor …
- Carai! Los perros spanholes lhadran cume an Cicuiro!!?
.

Buonas tardes

i suorte! ... ne l cuntrabando.

.